އިންޑިއާގެ ޓެމިލް ނާޑޫގެ މަޖިލިސް އިންތިޚާބު ކާމިޔާބުކުރެއްވި މަޝްހޫރު ފިލްމީ ތަރި އަދި ޓެމިލަގަ ވެޓްރީ ކަޒަގަމް (ޓީވީކޭ) ޕާޓީގެ ލީޑަރު ޗަންދްރަސެކަރަން ޖޯސެފް ވިޖޭ، އެ ސްޓޭޓްގެ ޗީފް މިނިސްޓަރުކަމުގެ ހުވާކުރެއްވުމަށްފަހު ރައްޔިތުންނަށް ވެފައިވާ މުހިންމު ތިން ވަޢުދެއް ފުއްދުމުގެ އަމުރުގައި ސޮއިކުރައްވައިފިއެވެ. 2026 މެއި 10 ވަނަ ދުވަހު ބޭއްވި މި ރަސްމިއްޔާތުގައި ވިޖޭ ވަނީ އޭނާގެ ސަރުކާރުގެ ފުރަތަމަ ފިޔަވަޅުތަކެއްގެ ގޮތުން ތިން ކަމެއް ތަންފީޒުކުރަން ނިންމަވާފައެވެ.
ވިޖޭ ސޮއިކުރެއްވި އެންމެ މުހިންމު އެއް އަމުރަކީ ކޮންމެ ގެއަކަށް މަހަކު 200 ޔުނިޓުގެ ކަރަންޓު ހިލޭ ފޯރުކޮށްދިނުމެވެ. މީގެ އިތުރުން، އަންހެނުންގެ ރައްކާތެރިކަން ކަށަވަރުކުރުމަށްޓަކައި ފުލުހުންގެ ޚާއްޞަ "ވުމަންސް ޕްރޮޓެކްޝަން ޓާސްކް ފޯސް" އެއް އުފެއްދުމަށާއި، މަސްތުވާތަކެތީގެ ވަބާއިން މުޖުތަމަޢު ސަލާމަތްކުރުމަށްޓަކައި ޑިސްޓްރިކްޓް ފެންވަރުގައި މަސައްކަތްކުރާނެ ‘އެންޓި-ޑްރަގް ޓާސްކް ފޯސް، އެއް އުފެއްދުމަށް ވެސް ވަނީ ނިންމަވާފައެވެ.
މަޤާމާ ހަވާލުވެވަޑައިގަތުމަށްފަހު ދެއްވި ފުރަތަމަ ތަޤުރީރުގައި ވިޖޭ ވިދާޅުވީ އޭނާގެ ސަރުކާރު ވެގެންދާނީ ކޮރަޕްޝަނުން ސަލާމަތްވެފައިވާ، ދެފުށް ފެންނަ ސަރުކާރަކަށް ކަމަށެވެ. "ދައުލަތުގެ ފައިސާގެ އެންމެ ރުޕީއެއްގައި ވެސް ޚިޔާނާތްތެރި ނުވާނެކަމުގެ ޔަޤީންކަން އަޅުގަނޑު ދެން،" ވިޖޭ ވިދާޅުވިއެވެ. އަދި ސްޓޭޓްގެ މާލީ ޙާލަތު ބަޔާންކޮށްދޭ "ވައިޓް ޕޭޕަރެއް" ނެރުއްވާނެ ކަމަށް ވެސް އޭނާ އިޢުލާންކުރެއްވިއެވެ.
ތަޢުލީމާއި، ޞިއްޙަތާއި، ފެނުގެ ދާއިރާ ފަދަ އަސާސީ މައްސަލަތަކަށް ފުރިހަމަ ސަމާލުކަމެއް ދޭނެކަމަށް ވިޖޭ ވިދާޅުވިއެވެ. އޭނާއަކީ ފަގީރުކަމާއި ބަނޑުހައިހޫނުކަން އިޙުސާސްކުރަން ދަންނަ މީހެއްކަން ފާހަގަކުރައްވަމުން ވިދާޅުވީ، އޭނާއަކީ ޝާހީ އާއިލާއަކަށް ނިސްބަތްވާ މީހަކަށް ނުވުމުން ގިނަ ގޮންޖެހުންތަކަކާ ކުރިމަތިލާން ޖެހުނު ކަމަށާއި، އެހެންކަމުން ހުރިހާ ކަމެއް ވެސް ކުރާނީ ރައްޔިތުންގެ ޙާލަތު އެނގިގެން ކަމަށެވެ.
އިތުރު ވަޢުދުތަކުގެ ތެރޭގައި 5 ލައްކަ ސަރުކާރު ވަޒީފާ އުފެއްދުމާއި، އަހަރަކު 6 ގޭސް ސިލިންޑަރު ހިލޭ ދިނުމުގެ އިތުރުން، އަންހެނުންނަށް މަހަކު 2,500 ރުޕީސްގެ މާލީ އެހީތެރިކަން ފޯރުކޮށްދިނުން ހިމެނެއެވެ. ވިޖޭ ނިންމެވީ އެއްވެސް އިތުރުފުޅެއް ނުހައްދަވައި، ރައްޔިތުންނަށް ވީ ވަޢުދުތައް ފުރިހަމައަށް ތަންފީޒުކުރެއްވުމަށެވެ.