ކުރީގެ ސަރުކާރުން އިންޑިއާއިން ނަގާފައިވާ 150 މިލިއަން ޑޮލަރުގެ ލޯނުގެ ތެރެއިން 50 މިލިއަން ޑޮލަރު މިއަދު ދައްކާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ. ރައީސް މިކަން ހާމަކުރެއްވީ ނޫސްވެރިންނާ ބައްދަލުކުރެއްވުމަށް ސިލްސިލާކޮށް ބާއްވަމުންދާ ބައްދަލުވުމުގެ ތެރެއިން މިއަދު ބޭއްވި ބައްދަލުވުމުގައެވެ.
ރައީސް ވިދާޅުވި ގޮތުގައި ކުރީގެ ސަރުކާރުން 2019 ވަނަ އަހަރު ތިން ފަހަރެއްގެ މަތިން އިންޑިއާއިން 150 މިލިއަން ޑޮލަރުގެ ލޯނު ނަގާފައިވެއެވެ. މި ލޯނުތަކަކީ ސްޓޭޓް ބޭންކް އޮފް އިންޑިއާ (އެސްބީއައި) އަށް ޓްރެޝަރީ ބިލް ވިއްކައިގެން ހޯދި ފައިސާއެވެ. ނިމިދިޔަ ސަރުކާރުން މި ލޯނުތައް ނުދައްކައި، އެއް އަހަރުން އަނެއް އަހަރަށް ރޯލްއޯވާ ކުރަމުން ގޮސްފައިވާތީ، މި ސަރުކާރަށް ވެރިކަން ލިބުނުއިރު މުޅި ދަރަނި އޮތީ ދައްކަން ޖެހިފައެވެ.
ސަރުކާރުން ދަރަނި ދެއްކުމަށް ކުރަމުންދާ މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ، މިދިޔަ ޖެނުއަރީ މަހު 50 މިލިއަން ޑޮލަރު ދައްކާފައިވާ ކަމަށާއި، މިއަދު ދެއްކި 50 މިލިއަން ޑޮލަރާއެކު މިހާތަނަށް ޖުމްލަ 100 މިލިއަން ޑޮލަރު ދައްކައި ނިމިފައިވާ ކަމަށެވެ. އަދި ބާކީ އޮތް 50 މިލިއަން ޑޮލަރު އަންނަ ސެޕްޓެމްބަރު މަހުގެ 17 ވަނަ ދުވަހު ދައްކައި، އެ ދަރަނިން މުޅިން ސަލާމަތްވާނެ ކަމަށް އެމަނިކުފާނު ވިދާޅުވިއެވެ.
ރައީސް ޑރ. މުޢިއްޒު ފާހަގަކުރެއްވި ގޮތުގައި ފާއިތުވި 40 ދުވަހުގެ ތެރޭގައި ސަރުކާރުން ވަނީ ބޮޑެތި ދަރަނިތަކެއް ޚަލާޞްކޮށްފައެވެ. އޭގެ ތެރޭގައި 524 މިލިއަން ޑޮލަރާއި، 400 މިލިއަން ޑޮލަރުގެ ސްވޮޕް ފެސިލިޓީގެ އިތުރުން އިންޑިއާގެ 50 މިލިއަން ޑޮލަރާއެކު ޖުމްލަ 974 މިލިއަން ޑޮލަރުގެ ދަރަނި ވަނީ ދައްކާފައެވެ. “އިރާދަކުރެއްވިއްޔާ 17 ސެޕްޓެމްބަރުގައި އެ 50 ވެސް އަޅުގަނޑުމެން ދައްކައި ނިންމާނަން. އެހެންވީމަ މިދިޔަ ސަރުކާރުން ރައްޔިތުންގެ ބޮލުގައި އެޅުވި ދަރަނި 150 މިލިއަން ޑޮލަރުގެ ދަންތުރައިން ސަލާމަތްކޮށް މި ނިންމަނީ،” ރައީސް ވިދާޅުވިއެވެ.
ދައުލަތުގެ އިސް މަޤާމުތައް ފުރުއްވާފައިވާ ބޭފުޅުން އިޤްތިޞާދީ ހާލަތާ މެދު ހަޤީޤަތާ ޚިލާފު ވާހަކަ ދައްކަވާތީ ރައީސް ވަނީ ހިތާމަކުރައްވާފައެވެ. އެމަނިކުފާނު ވިދާޅުވީ ކުރީ ސަރުކާރުން ނެގި ދަރަނިތައް މި ސަރުކާރުން ދައްކަމުންދާއިރު، އެކަމާ ބައެއް ފަރާތްތަކުން ކަންބޮޑުވުން ފާޅުކުރުމަކީ ބަލައިގަނެވޭނެ ކަމެއް ނޫން ކަމަށެވެ. ސަރުކާރުގެ އަމާޒަކީ ރައްޔިތުންގެ ބޮލުގައި އެޅިފައިވާ ދަރަނިތަކުން ގައުމު ސަލާމަތްކުރުން ކަމަށްވެސް ވިދާޅުވިއެވެ.
ދަރަނިތައް ދައްކަމުންދާ ހިނދުވެސް، ދައުލަތުގެ މުވައްޒަފުންގެ މުސާރައާއި، ތެލަށް ދައްކަންޖެހޭ ފައިސާގެ އިތުރުން ރާއްޖޭން ބޭރުގައި ކިޔަވާ ދަރިވަރުންނަށް ދޭންޖެހޭ ފައިސާ މެދުނުކެނޑި ދައްކަމުން ގެންދާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.