ދައުލަތުގެ އިދާރާތަކާއި މުއައްސަސާތަކުގެ މުވައްޒަފުންގެ އުޖޫރަ އެއްހަމަކުރުމަށް ކުރިއަށްގެންދާ ޕޭ ހަމަނައިޒޭޝަންގެ މަސައްކަތްތަކުގެ ތެރެއިން، ސިވިލް ސާވިސް އަދި ޝަރުއީ ދާއިރާގެ މުވައްޒަަފުންގެ މުސާރައަށް ގެނައި ބަދަލުތަކުގައި ކުރިމަތިވި މައްސަލަތައް ހައްލުކުރެވިފައިވާ ކަމަށާއި، މި މަހުގެ މުސާރަ ޖަމާކުރާއިރު އެކަމުގެ ހެޔޮ އަސަރު ފެންނާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ހަފުތާއަކު އެއްފަހަރު ސިލްސިލާ ގޮތެއްގަައި ކުރިއަށްގެންދަވާ ނޫސްވެރިންގެ ބައްދަލުވުންތަކުގެ ތެރެއިން މިއަދު ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ޕޭ ހާމަނައިޒްކުރިއިރު ބައެއް މުވައްޒަފުންގެ މުސާރަ ބޮޑުވެފައިނުވާ ކަމަށާއި، އަދި ބައެއް މުވައްޒަފުންގެ މުސާރަ ކުރިއަށްވުރެ ކުޑަވެފައި ހުރިކަންވެސް ފާހަގަކުރެވިފައިވާ ކަމަށެވެ. ނަމަވެސް އެމަނިކުފާނުގެ ވައުދަކީ ހުރިހާ ރައްޔިތުންނަށް މުސާރަ ބޮޑުކޮށްދިނުން ކަމަށް ރައީސް ތަކުރާރު ކުރެއްވިއެވެ.
“އަޅުގަނޑު ހުރިހާ ރައްޔިތުންނަށްވީ ވައުދަކީ މުސާރަ ބޮޑުކޮށްދޭނަމޭ. ޕޭ ކޮމިޝަނުން ޕޭ ހާމަނައިޒްކުރިއިރުގައި މުސާރަ ބޮޑުނުވެ، އެހެންނަމަވެސް ކުޑަވި ބައެއް ފަރާތްތައްވެސް ތިބިކަން އެނގިފައިވަނީ. މިފަހަރު މުސާރަ ލިބޭއިރުގައި ޖުމްލަކޮށް، މުސާރަ މައްޗަށް ނުގޮސްތިބި ސްޓާފުންގެ މައްސަލަ ހައްލުވާނެ،” ރައީސް ވިދާޅުވިއެވެ.
ރައީސް ފާހަގަކުރެއްވި ގޮތުގައި މި މައްސަލަ ބޮޑަށް ކުރިމަތިވީ އޮފީސްތަކުގެ ހިއުމަން ރިސޯސް (އެޗްއާރު) ޑިޕާޓުމެންޓުތަކުގައި މަސައްކަތްކުރާ މުވައްޒަފުންނާއި، ގާނޫނީ ދާއިރާގެ މުވައްޒަފުންގެ އިތުރުން ކައުންސިލުތަކުގެ ބައެއް މަގާމުތަކުގައި ތިބި މުވައްޒަފުންނަށެވެ. މިއީ އެތައް ޒަމާނެއްވަންދެން އެކި ގޮތްގޮތަށް އޮތް ވަޒީފާގެ އޮނިގަނޑުތަކެއް އެއްގޮތްކުރަން އުޅުމުގެ ތެރެއިން ދިމާވި ފަންނީ މައްސަލަތަކެއް ކަމަށް އެމަނިކުފާނު ވިދާޅުވިއެވެ.
މި މަހުގެ މުސާރަ ދޭއިރު މިފަދަ ހުރިހާ މައްސަލައެއް ހައްލުވެ، މުވައްޒަފުންގެ މުސާރަތައް ބޮޑުވާނެ ކަމުގެ ޔަގީންކަން ރައީސް ދެއްވިއެވެ. އަދި ވަކިވަކި މުވައްޒަފުންގެ ތެރެއިން އެއްވެސް މީހަކަށް މިފަދަ ހާލަތެއް ކުރިމަތިވެފައިވާނަމަ، އެ މުވައްޒަފުންނަށްވެސް ކުރިއަށް އޮތް ތަނުގައި ހައްލުތަކެއް ހޯދައިދެއްވާނެ ކަމަށް ވިދާޅުވިއެވެ.
މީގެ އިތުރުން، ވަރަށް ކުރިއްސުރެ ވަޒީފާއަށް ވަދެފައި ތިބި މުވައްޒަފުންގެ މައްސަލަތަކަށް ވަކިވަކިން ބަލައިގެން، ޕޭ ކޮމިޝަނުން ހައްލުތަކެއް ހޯދައިދޭނެ ކަމަށްވެސް ރައީސް ޑރ. މުޢިއްޒު މިއަދުގެ ބައްދަލުވުމުގައި ވިދާޅުވިއެވެ.