2026 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕަށް ތައްޔާރުވުމުގެ ގޮތުން ބްރެޒިލްއިން އެކުލަވާލި 55 ކުޅުންތެރިންގެ ވަގުތީ ސްކޮޑުގައި އެ ގައުމުގެ އެންމެ ނުފޫޒުގަދަ ތަރި ނޭމާ ޖޫނިއާ ހިމަނައިފިއެވެ.
މިއީ 2023 ވަނަ އަހަރު ކުޅުމުގެ ތެރޭގައި ލިބުނު ސީރިއަސް އަނިޔާއަކަށްފަހު، ނޭމާ ގައުމީ ޓީމުގެ ސްކޮޑުން ޖާގަ ހޯދި ފުރަތަމަ ފަހަރެވެ. އަނިޔާއިން ސަލާމަތްވެ، ސަންޓޯސްއަށް ކުޅެމުންދާ ނޭމާ ވަނީ އޭނާގެ ފިޓްނަސް އާއި ފޯމު ވަރަށް ބޮޑަށް ރަނގަޅުކޮށްފައެވެ. ނަމަވެސް، މުބާރާތަށް ދާ ފައިނަލް 26 ކުޅުންތެރިންގެ ސްކޮޑުން ޖާގަ ކަށަވަރު ކުރުމަށްޓަކައި ނޭމާ އަދި އިތުރު މަސައްކަތްތަކެއް ކުރަންޖެހޭނެ ކަމަށް ރިޕޯޓުތައް ބުނެއެވެ.
ބްރެޒިލްގެ ކޯޗު ކާލޯ އަންޗެލޮޓީއަށް މިހާރު ކުރިމަތިވެފައިވާ އެންމެ އުނދަގޫ މަސައްކަތަކީ، މި ވަގުތީ ސްކޮޑުގައި ހިމެނޭ ހުނަރުވެރި 55 ކުޅުންތެރިންގެ ތެރެއިން އެންމެ މޮޅު 26 ކުޅުންތެރިން ހޮވުމެވެ. ޓީމުގައި ހިމެނޭ ކުޅުންތެރިންގެ ފެންވަރަށް ބަލާއިރު، މިއީ ކޯޗަށް ކުރިމަތިވާނެ ބޮޑު ގޮންޖެހުމަކަށް ވާނެއެވެ.
ބްރެޒިލްގެ މުޅި ގައުމާއި ޓީމުގެ މައިގަނޑު އުންމީދަކީ މިފަހަރުގެ ވޯލްޑް ކަޕް ކާމިޔާބުކޮށް، ތާރީޚީ ހަވަނަ ފަހަރަށް ދުނިޔޭގެ ރަންތަށި އުފުލާލުމެވެ. ނޭމާ ފަދަ ތަޖުރިބާކާރު ކުޅުންތެރިއަކު ސްކޮޑުގައި ހިމެނުމަކީ މި އަމާޒަށް ވާސިލްވުމަށް ލިބޭނެ ބޮޑު ހިތްވަރެއް ކަމަށް ގަބޫލުކުރެވެއެވެ.