އެޓެންޝަން ޑެފިސިޓް ހައިޕަރ އެކްޓިވިޓީ ޑިސްއޯޑަރ (އޭ.ޑީ.އެޗް.ޑީ) ހުންނަ ފަރާތްތަކަށް ފަރުވާ ދިނުމުގައި ފަސްޓްލައިން ޓްރީޓްމަންޓަށް ބޭނުންކުރާ ބޭހެއް ކަމަށްވާ މިތައިލްފެނިޑޭޓް ރާއްޖެއިން ލިބޭނެ ގޮތް ހަމަޖެއްސުމަށްޓަކައި، މަސްތުވާތަކެއްޗާބެހޭ ގާނޫނަށް އިސްލާހު ގެނައުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ގަރާރެއް ނެރުއްވައިފިއެވެ.
ރައީސުލްޖުމްހޫރިއްޔާ ނެރުއްވި ނަންބަރު 10/2026 ގަރާރުގެ ދަށުން އިސްލާހު ކުރައްވާފައިވަނީ މަސްތުވާތަކެއްޗާބެހޭ ގާނޫނުގެ ޖަދުވަލު 1 އެވެ. މި ނިންމެވުމަކީ ނޭޝަނަލް ޑްރަގް ކޮންޓްރޯލް ކައުންސިލުން ހުށަހަޅާފައިވާ ލަފަޔާ ގުޅޭގޮތުން ވަޒީރުންގެ މަޖިލީހުގައި މަޝްވަރާ ކުރެއްވުމަށްފަހު ނިންމެވި ނިންމެވުމެކެވެ.
މި ބަދަލު ގެނައުމަށްޓަކައި މަސްތުވާތަކެއްޗާބެހޭ ގާނޫނުގެ ދަށުން ރައްޔިތުންގެ މަޖިލީހުގެ ރުހުން ހޯއްދެވުމަށް ހުށަހެޅުއްވުމުން، މަޖިލީހުން ވަނީ މި ބޭސް މަނާކުރެވިފައިވާ ތަކެތީގެ ލިސްޓުން އުނިކޮށް، ބޭހުގެ ގޮތުގައި ބޭނުންކުރެވޭ މަސްތުވާއެއްޗެއްގެ ގޮތުގައި ކަނޑައެޅުމަށް ރުހުން ދީފައެވެ. މިގޮތަށް މަޖިލީހުން ފާސްކޮށްފައިވަނީ 11 މޭ 2026 ގައި ބޭއްވުނު މިއަހަރުގެ ފުރަތަމަ ދައުރުގެ 17 ވަނަ ޖަލްސާގައެވެ.
މި އިސްލާހުގެ ދަށުން، މަނާކުރެވިފައިވާ މަސްތުވާތަކެތީގެ ލިސްޓުގެ 89 ވަނަ ނަންބަރުގައި ހިމެނޭ މިތައިލްފެނިޑޭޓް (Methylphenidate) މިހާރު ވަނީ އެ ލިސްޓުން އުނިކުރެވިފައެވެ. ރައީސުލްޖުމްހޫރިއްޔާގެ މި ގަރާރު މިހާރު ވަނީ ސަރުކާރުގެ ގެޒެޓުގައި ޝާއިޢުކޮށް، އަމަލުކުރަން ފަށާފައެވެ.
މި ތާރީޚީ ބަދަލާއެކު، އޭ.ޑީ.އެޗް.ޑީ ހުންނަ ފަރާތްތަކަށް ބޭނުންވާ މުހިންމު ފަރުވާއެއް ކަމަށްވާ މިތައިލްފެނިޑޭޓް، ގާނޫނީ އޮނިގަނޑުގެ ތެރެއިން ރާއްޖެއިން ފަސޭހަކަމާއެކު ލިބޭނެ އިންތިޒާމު ހަމަޖެހިގެންދާނެއެވެ. މިއީ މި ބައްޔަށް ފަރުވާ ހޯދާ ފަރާތްތަކަށާއި އެފަރާތްތަކުގެ އާއިލާތަކަށް ލިބިގެންދިޔަ ބޮޑު ލުޔެކެވެ.