ލަލީގާއަކީ އެ ކްލަބުގެ "އަބަުވެސް ދުޝްމަނެއް" ކަމަށާއި، ކްލަބުން އޭނާ ބޭރުކުރަން ބޭނުންވާ ބަޔަކު ތިބިނަމަ، އެކަން ކުރެވޭނީ އޭނާ "ގަޔަށް ބަޑިޖަހައިގެން" ކަމަށް ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެއެވެ.
މީޑިޔާ ބްރީފިންގައި ސްޕެއިންގެ ގަދަބާރު ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ވަނީ އެނާ އެ މަގާމުން އިސްތިއުފާ ދެއްވަން އުޅޭ ކަމަށް ދެކެވޭ ވާހަކަތައް ދޮގުކުރައްވައިފައެވެ. އަދި ކްލަބުގެ ރައީސްކަމުގެ އައު އިންތިޚާބަކަށް ގޮވާލައްވައިފިއެވެ. ކޯޕޭގެ ރިޕޯޓްތަކާ ހަވާލާދީ ޕެރޭޒް ވިދާޅުވީ، އޭނާ މަގާމުން ވަކިކުރަން ބަޔަކު ރާވައިގެން ކެމްޕޭނެއް ހިންގަމުންދާ ކަމަށާއި، ނަމަވެސް އިސްތިއުފާ ދެއްވުމުގެ އެއްވެސް ވިސްނުމެއް ނެތް ކަމަށެވެ.
"އަޅުގަނޑު އިސްތިއުފާއެއް ނުދޭނަން. އަދިވެސް އެއްފަހަރު ބުނަން، އަޅުގަނޑު އިސްތިއުފާއެއް ނުދޭނަން،" ވަރަށް ސާބިތުކަމާއެކު ޕެރޭޒް ވިދާޅުވިއެވެ. އޭނާ އިތުރަށް ވިދާޅުވީ ކްލަބުގެ ހާލަތު ގޯސްކަމަށް ދައްކައިގެން ބަޔަކު އޭނާއަށް އަމިއްލަގޮތުން ހަމަލާދެމުންދާ ކަމަށެވެ.
އައު އިންތިޚާބަކަށް ގޮވާލެއްވި ސަބަބާ ގުޅޭގޮތުން ޕެރޭޒް ވިދާޅުވީ، 2000 ވަނަ އަހަރުން ފެށިގެން އޭނާ މަސައްކަތް ކުރަމުން އަންނަނީ ކްލަބުގެ މިލްކުވެރިންނަކީ ކްލަބުގެ މެންބަރުން (ސޯޝިއޯސް) ކަމުގައި ހެދުމަށް ކަމަށެވެ. އަދި އޭނާ މަގާމުން ވަކިވާނީ އިންތިޚާބަކުން މީހަކު އޭނާގެ މައްޗަށް ކުރިހޯދުމުން ކަމަށްވެސް ވިދާޅުވިއެވެ.
"ބައެއް މީހުން ބުނަނީ އަޅުގަނޑަށް ކެންސަރު ޖެހިފައިވާ ކަމަށާއި، އަޅުގަނޑު ދާން ބޭނުންވާ ކަމަށާ، އެކަމަކު ތިމީހުން އަޅުގަނޑު ދާން ބޭނުންނަމަ، މިއޮތީ އިންތިޚާބު އިޢުލާންކޮށްފައި، ބަލަމާ ކާކަށްތޯ އަޅުގަނޑުގެ މައްޗަށް ކުރިހޯދެނީ،" ޕެރޭޒް ވިދާޅުވިއެވެ.
ބާސެލޯނާއާ ގުޅިފައިވާ "ނެގްރެއިރާ މައްސަލަ" އަށް އިޝާރާތް ކުރައްވަމުން ޕެރޭޒް ވިދާޅުވީ، މިއީ ފުޓްބޯޅައިގެ ތާރީޚުގައި ހިނގި އެންމެ ބޮޑު ކޮރޮޕްޝަން ކަމަށެވެ. އަދި އެ ދުވަސްވަރުގެ ރެފްރީން އަދިވެސް ދަނޑުމަތީގައި ހަރަކާތްތެރިވަމުން ދިއުމަކީ ގަބޫލުކުރެވޭނެ ކަމެއް ނޫން ކަމަށް އޭނާ ވިދާޅުވިއެވެ. ޕެރޭޒް ތުހުމަތު ކުރެއްވި ގޮތުގައި، ރެއާލް މެޑްރިޑަށް ލިބެންޖެހޭ ލީގު ތަށިތަކެއް ވަނީ މިފަދަ ކަންކަމުގެ ސަބަބުން "ފޭރިގެންފަ" އެވެ. "އަޅުގަނޑަށް ރެއާލްގައި ލިބުނީ އެންމެ 7 ލީގު ތަށި؟ ނޫން، އަޅުގަނޑަށް 14 ތަށި ލިބެންޖެހޭ. އަނެއް 7 ތަށި ވަނީ އަޅުގަނޑުގެ އަތުން ފޭރިގެންފައި،" އޭނާ ވިދާޅުވިއެވެ.
މީގެއިތުރުން ޕެރޭޒް ވިދާޅުވީ، ސްޕެއިންގެ މީޑިއާތަކުން ރެއާލް މެޑްރިޑާ ދެކޮޅަށް ރާވައިގެން ކެމްޕޭނެއް ހިންގަމުންދާ ކަމަށާއި، ނަމަވެސް ދުނިޔޭގެ އެހެން ގައުމުތަކާއި ފީފާ އަދި ޔޫއެފާ އިން ރެއާލް މެޑްރިޑަށް ވަރަށް ބޮޑަށް އިޙްތިރާމް ކުރާ ކަމަށެވެ. ކްލަބަށްޓަކައި ދުވާލާއި ރޭގަނޑު ބުރަ މަސައްކަތް ކުރައްވާ ކަމަށާއި، ކްލަބުގެ ފަރާތުން އަމިއްލަ އެއްވެސް މަންފާއެއް، ފައިސާއެއް ނުވަތަ މަޝްހޫރުކަމެއް ބޭނުންނުވާ ކަމަށްވެސް އޭނާ ވިދާޅުވިއެވެ.