ކައުންސިލްތަކުގެ 5 ވަނަ ދައުރަށް އަލަށް އިންތިޚާބުވި ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (އ.ތ.މ.ކ) ތަކުގެ މެންބަރުން މަޤާމަށް އަހުލުވެރިކުރުވުމަށް ލޯކަލް ގަވަރމަންޓް އޮތޯރިޓީ (އެލް.ޖީ.އޭ) އިން ކުރިއަށް ގެންދިޔަ ޚާއްޞަ ތަމްރީނު ޕްރޮގްރާމް 2026 މޭ 14 ވަނަ ދުވަހު ކާމިޔާބުކަމާއެކު ނިންމާލައިފިއެވެ.
"ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުން މަޤާމަށް އަހުލުވެރިކުރުމުގެ ޕްރޮގްރާމް 2026" ގެ ނަމުގައި ކުރިއަށް ގެންދިޔަ މި ހަރަކާތަކީ އެލް.ޖީ.އޭ އާއި މޯލްޑިވްސް އިންސްޓިޓިއުޓް އޮފް ލޯކަލް ގަވަރނަންސް (އެމް.އައި.އެލް.ޖީ) ގުޅިގެން ފަސް ދުވަހުގެ މުއްދަތަށް ކުރިއަށް ގެންދިޔަ ޕްރޮގްރާމެކެވެ. މޭ މަހުގެ 10 އިން 14 އަށް ކުރިއަށްދިޔަ މި ޕްރޮގްރާމްގެ މައިގަނޑު މަގުސަދަކީ އައު ދައުރަށް ހޮވުނު މެންބަރުންނަށް އެ ބޭފުޅުންގެ ދައުރާއި، ޒިންމާތަކާއި މަސްއޫލިއްޔަތުތައް އޮޅުންފިލުވައިދީ، ކައުންސިލްތަކުގެ ހިންގުން ހަރުދަނާކުރުމަށް ބޭނުންވާ މުހިއްމު މަޢުލޫމާތު ފޯރުކޮށްދިނުމެވެ.
ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުން މަޤާމަށް އަހުލުވެރިކުރުމުގެ ޕްރޮގްރާމް 2026″ގެ ތެރެއިން – ފޮޓޯ: އެލް.ޖީ.އޭ
މި ޕްރޮގްރާމްގައި ޖުމްލަ 174 ކައުންސިލަކުންނާއި 166 އ.ތ.މ ކޮމިޓީއަކުން މެންބަރުން ބައިވެރިވެވަޑައިގެންފައިވެއެވެ. މީގެ އިތުރުން، ކައުންސިލްތަކުގެ ސެކްރެޓަރީ ޖެނެރަލުންނާއި އިދާރީ މުވައްޒަފުން ހިމެނޭހެން 74 ބޭފުޅަކުވެސް މި ތަމްރީނުގައި ބައިވެރިވެވަޑައިގެންނެވިއެވެ. ބަޖެޓުގެ ތަށިކަމާހުރެ މި ޕްރޮގްރާމް އޮންލައިންކޮށް ކުރިއަށް ގެންދިޔަ ނަމަވެސް، ކައުންސިލްތަކުން ވަނީ މެންބަރުން އެއް ތަނަކަށް ޖަމާވެ، ޓީމެއްގެ ގޮތުގައި މަޝްވަރާކޮށް ޚިޔާލު ބަދަލުކުރެވޭނެ ފަދަ އިދާރީ އިންތިޒާމްތަކެއް ހަމަޖައްސައިދީފައެވެ. ޕްރޮގްރާމްގެ ބައިވެރިން ފާހަގަކުރި ގޮތުގައި، ކުރިއަށް އޮތް ތަނުގައި މިފަދަ ޕްރޮގްރާމްތައް "ފޭސް-ޓު-ފޭސް" ކޮށް ކުރިއަށް ގެންދިއުމަކީ އެދެވިގެންވާ ކަމެކެވެ.
މި ފަހަރުގެ ޕްރޮގްރާމްގެ އެންމެ ފާހަގަކޮށްލެވޭ އެއް ކަމަކީ، އެހެން ދައުރުތަކާ ޚިލާފަށް، މެންބަރުން މަޤާމުގެ ހުވާކުރުމުގެ ކުރިން މި ތަމްރީނު ފުރިހަމަކުރުމެވެ. މި މަހުގެ 17 ވަނަ ދުވަހު އައު ދައުރުގެ މެންބަރުން ހުވާކުރައްވާއިރު، އެ ބޭފުޅުން ތިއްބަވާނީ މަޤާމުގެ މަސްއޫލިއްޔަތުތަކަށް ފުރިހަމައަށް އަހުލުވެރިވެވަޑައިގެންނެވެ.
ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުން މަޤާމަށް އަހުލުވެރިކުރުމުގެ ޕްރޮގްރާމް 2026″ގެ ތެރެއިން – ފޮޓޯ: އެލް.ޖީ.އޭ
ޕްރޮގްރާމްގެ ސެޝަންތަކުގައި ލާމަރުކަޒީ ނިޒާމުގެ ޤާނޫނީ އޮނިގަނޑާއި، އިދާރީ އަދި މާލީ ހިންގުމާއި، ތަރައްޤީގެ ޕްލޭންތައް އެކުލަވައިލުމާއި، ރައްޔިތުންގެ ބައިވެރިވުން އިތުރުކުރުމާއި، ޑިޖިޓަލް ގަވަރނަންސް ފަދަ މުހިއްމު ދާއިރާތަކުން މަޢުލޫމާތު ދީފައިވެއެވެ. މި ސެޝަންތައް ކުރިއަށް ގެންގޮސްފައިވަނީ އެލް.ޖީ.އޭ، ސިވިލް ސަރވިސް ކޮމިޝަން އަދި އިންފޮމޭޝަން ކޮމިޝަނަރުގެ އޮފީހުގެ ފަންނީ ބޭފުޅުންނެވެ. އަދި ބައިވެރިންގެ ސުވާލުތަކަށް ޖަވާބު ދިނުމަށް ކޮންމެ ދުވަހަކުވެސް ޚާއްޞަ ވަގުތުތަކެއް ހުސްކުރެވުނެވެ.