ކޮންގޯ އާއި ޔޫގެންޑާގައި ހަލުވިކަމާއެކު ފެތުރެމުންދާ އެބޯލާ ބަލިމަޑުކަމަކީ ބައިނަލްއަގުވާމީ ފެންވަރުގައި ސަމާލުކަން ދޭންޖެހޭ ސިއްހީ ކުއްލި ނުރައްކަލުގެ ހާލަތެއްގެ ގޮތުގައި ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ކަނޑައެޅުމާ ގުޅިގެން، ބަލިފެތުރޭ ސަރަހައްދުތަކަށް ދަތުރުނުކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
އެޗްޕީއޭއިން ބުނީ ރާއްޖެއަށް މި ބަލި އައުމުގެ ފުރުސަތު ކުޑަ ނަމަވެސް، ރައްކާތެރި ފިޔަވަޅެއްގެ ގޮތުން އެ ސަރަހައްދުތަކަށް ދަތުރުނުކުރުން މުހިންމު ކަމަށެވެ. މިގޮތުން ކޮންގޯ އަދި ޔޫގެންޑާގައި އެބޯލާ ފެތުރެމުންދާތީ އެ ގައުމުތަކަށް ދަތުރުކުރުން މިވަގުތަށް ހުއްޓާލުމަށް ވަނީ އަންގާފައެވެ.
އދ. ގެ ސިއްހީ އިދާރާއިން ނެރުނު ބަޔާނެއްގައިވާ ގޮތުން، މިހާރު ފެތުރެމުންދަނީ އެބޯލާގެ ބާވަތެއް ކަމަށްވާ “ބަންޑިބުގްޔޯ” ވައިރަހެވެ. މި ވައިރަހަށް އެއްވެސް ވެކްސިނެއް މިހާތަނަށް އުފައްދާފައެއް ނުވެއެވެ. ކޮންގޯގެ އިޓޫރީ ޕްރޮވިންސްގެ ތިން ސަރަހައްދަކުން ބަލި ޖެހިގެން މަރުވި ކަމަށް ބެލެވޭ 80 މީހުން ރިޕޯޓްކޮށްފައިވާއިރު، ލެބޯޓްރީ ތަހުލީލުތަކުން ބަލި ޖެހިފައިވާކަން ކަށަވަރުވެފައިވާ އަށް މީހުންނާއި، ބަލި ޖެހިފައިވާ ކަމަށް ޝައްކު ކުރެވޭ 246 މީހުން ވަނީ ފެނިފައެވެ.
ޑަބްލިއުއެޗްއޯ އިން ވަނީ ކޮންގޯއާ ބޯޑަރު ހިއްސާކުރާ އަވަށްޓެރި ގައުމުތަކަށް މި ބަލި ފެތުރުމުގެ ނުރައްކާ އިންތިހާއަށް ބޮޑުވެފައިވާ ކަމަށް އިންޒާރު ދީފައެވެ. މި ބަލީގެ އަލާމާތްތަކުގެ ތެރޭގައި ހުންއައުމާއި، ބޮލުގައި ރިއްސުމާއި، ބޭރަށް ހިންގުމުގެ އިތުރުން ހަށިގަނޑުގެ އެކި ގުނަވަންތަކުން ލޭފޭބުން ހިމެނެއެވެ.
ރާއްޖޭގެ ހެލްތު މިނިސްޓްރީގެ މީޑިއާ އޮފިޝަލަކު ވިދާޅުވީ، ރާއްޖޭގެ ސިއްހީ އިދާރާތަކުން މި ހާލަތު ވަރަށް ގާތުން މޮނީޓާ ކުރަމުންދާ ކަމަށެވެ. އަދި ބަލިމަޑުކަމާ ގުޅޭ އިތުރު މައުލޫމާތު ލިބެމުންދާ ވަރަކަށް އާންމުންނާ ހިއްސާކުރަމުންދާނެ ކަމަށްވެސް އެ މިނިސްޓްރީން ބުނެފައިވެއެވެ.