މެދުއިރުމައްޗާއި ގަލްފުގެ ސަރަޙައްދުގައި ހިނގަމުންދާ ހަމަނުޖެހުންތަކުގެ ސަބަބުން ރާއްޖޭގެ ފަތުރުވެރިކަމަށް ކުރިމަތިވި ހީނަރުކަމުން އަރައިގަތުމުގައި ބޮޑެތި ކާމިޔާބީތަކެއް ލިބެމުންދާކަމަށް، އެ ހަމަނުޖެހުންތަކާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކުލަވާލެއްވި ވަޒީރުންގެ ޚާއްޞަ ކޮމިޓީން ހާމަކުރައްވައިފިއެވެ.
މިކަން ހާމަކުރައްވާފައިވަނީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި ވަޒީރުން ވަނީ އިޤުތިޞާދީ އެކި ދާއިރާތަކަށް ކުރިމަތިވަމުންދާ ގޮންޖެހުންތަކުން އަރައިގަތުމަށް ސަރުކާރުން ކުރަމުންދާ މަސައްކަތްތަކުގެ ތަފުސީލު ހިއްސާކުރައްވާފައެވެ.
މި ބައްދަލުވުމުގައި ވާހަކަފުޅުދައްކަވަމުން، ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު، މުޙައްމަދު އަމީން ވަނީ، މިދިޔަ އަހަރާ އަޅައިބަލާއިރު، މާރިޗު މަހު ފަތުރުވެރިން ޒިޔާރަތްކުރި ނިސްބަތް 22.5 އިންސައްތަ ދަށަށް ގޮސްފައިވާކަމަށާއި، އެޕްރީލް މަހު މި ނިސްބަތް 26.5 އިންސައްތަ ދަށަށް ގޮސްފައިވާކަމަށް ވިދާޅުވެފައެވެ. އެހެންނަމަވެސް، މި ހިނގާ މޭ މަހުގެ މިހާތަނަށް، މި ނިސްބަތް ހުރީ 8.9 ގައި ކަމަށް އެމަނިކުފާނު ވިދާޅުވިއެވެ. މިހާލަތުގައި، ފަތުރުވެރިކަން ދަށަށް ދާ މިންވަރުގެ ފަރަގު، މިހާ ބޮޑަށް ކުޑަކުރެވުން އެމަނިކުފާނު ސިފަކުރެއްވީ ކާމިޔާބީއެއްގެ ގޮތުގައެވެ. އަދި މި ކާމިޔާބީ ހާސިލުކުރެވިފައިވަނީ، ކަމާ ގުޅުންހުރި ހުރިހާ ވުޒާރާތަކާއި، މުއައްސަސާތަކާއި، ފަތުރުވެރިކަމާއި ދަތުރުފަތުރުގެ ސިނާޢަތުން އެކުގައި ކުރެވުނު މުހިންމު މަސައްކަތްތަކާއި، ރައީސުލްޖުމްހޫރިއްޔާގެ ދުރުވިސްނުންފުޅުންކަމުގައި އެމަނިކުފާނު ވިދާޅުވިއެވެ. އެގޮތުން މޯލްޑިވިއަން އިން އުދުހުންތަކުގައި ބޭނުންކުރުމަށް ވައިޑް ބޮޑީ އެއާކްރާފްޓް ގެނައުމަށް ނިންމެވި ނިންމެވުން މިހާރު ވެގެންގޮސްފައިވަނީ، ހައްސާސް ޙާލަތެއްގައި އިޤުތިޞާދީ ގެއްލުން މިޓިގޭޓްކުރުމަށް ރާއްޖޭގެ އަމިއްލަ ޤާބިލިއްޔަތު އިތުރުވެގެންދިޔަ، ޙިކުމަތްތެރި ނިންމެވުމަކަށްކަން އެމަނިކުފާނު ފާހަގަކުރެއްވިއެވެ.
މިކަމާ ގުޅޭގޮތުން މައުލޫމާތު ދެއްވަމުން، މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު، އަޙްމަދު ޝިޔާމް ވަނީ މަސްވެރިކަމުގެ ސިނާޢަތުގައި ހުރި ކަންބޮޑުވުންތަކަށް ސަރުކާރުން އަހަންމިއްޔަތުކަން ދެއްވާ މިންވަރު ހާމަކުރައްވާފައެވެ. ވަޒީރު ވިދާޅުވީ މަސްވެރިންނަށް ދަތިކަމެއް ނެތި މަސްކަނޑަށް ނިކުމެވޭނެ މަގު ފަހިކޮށްދެއްވުމަށް ގިނަ މަސައްކަތްތަކެއް ކުރެވެމުންދާ ކަމަށެވެ. ޚާއްޞަގޮތެއްގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ހުރިހާ އަތޮޅަކުން ތެޔޮ ލިބޭނެ ބިނާރު ޤާއިމުކުރެވި، އޭގެ ފައިދާ މިހާރު މަސްވެރިންނަށް ލިބެމުންދާކަން ޝިޔާމް ފާހަގަކުރެއްވިއެވެ.
ނަމަވެސް، އެސް.ޓީ.އޯ މެދުވެރިކޮށް އަތޮޅުތަކަށް ތެޔޮ ފޯރުކޮށްދިނުމުގައި ލޮޖިސްޓިކަލް ދަތިތަކެއް ހުރިކަން ގަބޫލުކުރައްވާ ކަމަށާއި، އެކަން ޙައްލުކުރުމަށް ސަރުކާރުން ހުއްޓުމެއްނެތި މަސައްކަތް ކުރަމުންދާނެ ކަމުގެ ޔަޤީންކަން ވަޒީރު ދެއްވިއެވެ. މީގެ އިތުރުން، މަސް ޕްރޮސެސް ކުރާ ކުންފުނިތަކުގެ އޮޕަރޭޝަނަލް ކޮސްޓު ކުޑަކުރުމަށާއި، ދަނޑުވެރިކަމުގެ އުފެއްދުންތައް އުފުލުމަށް ހިނގާ ނާލު ޚަރަދު ކުޑަކޮށް، ލުއިފަސޭހަ ގޮތްތަކެއް ހަމަޖެއްސުމަށް މަސައްކަތް ކުރަމުންދާ ކަމަށްވެސް ޝިޔާމް ވިދާޅުވިއެވެ.
ޚާރިޖީ ވަޒީރު އިރުތިޝާމް އާދަމް ދެއްކެވި ވާހަކަފުޅުގައި، ބޭރުގެ ޤައުމުތަކުގައި ހިނގަމުންދާ ހަނގުރާމައިގެ ޙާލަތު ސަރުކާރުން ވަރަށް ގާތުން ބަލަމުންދާ ކަމަށް ވިދާޅުވިއެވެ. އަދި ހަނގުރާމައިގެ އަސަރުކުރާ ސަރަޙައްދުތަކުގައި ދިރިއުޅޭ ދިވެހިންގެ ރައްކާތެރިކަން ކަށަވަރުކޮށް، ބޭނުންވާ އެހީތެރިކަން ފޯރުކޮށްދެމުންދާކަމުގެ ޔަޤީންކަން އެކަމަނާ ދެއްވިއެވެ. މީގެ އިތުރުން، އިޤުތިޞާދަށް ކުރާ ނޭދެވޭ އަސަރުތައް ކުޑަކުރުމަށްޓަކައި ބޭރުގެ އެކި ޤައުމުތަކާއި މުއައްސަސާތަކާއެކު ޚާރިޖީ ދާއިރާއިން މެދުނުކެނޑި މަޝްވަރާ ކުރަމުންދާ ކަމަށްވެސް ވިދާޅުވިއެވެ.
މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު އަދި ކޮމިޓީގެ މުޤައްރިރު، މޫސާ ޒަމީރު ވިދާޅުވީ، ދުނިޔޭގެ ބާޒާރުގައި ތެލާއި ކާޑުގެ އަގަށް އަންނަ ބަދަލުތަކާއެކުވެސް، ރައްޔިތުންނަށް ބޭނުންވާ އަސާސީ މުދަލާއި ޚިދުމަތްތައް މެދުނުކެނޑި ފޯރުކޮށްދިނުމަކީ ސަރުކާރުގެ އެންމެ އިސް އަމާޒު ކަމަށެވެ. އަދި ދައުލަތުގެ ޚަރަދުތައް އިތުރަށް ހަރުދަނާކޮށް ރޭޝަނަލައިޒް ކުރައްވައި، ދަރަނިތައް އަދާކުރުމަށް ކުރެވުނު މަސައްކަތުން، މިހާރު ރާއްޖޭގެ ދަރަނި ހުރީ ދެމެހެއްޓެނިވި މިންވަރެއްގައި ހިފެހެއްޓިފައިކަން ވަޒީރު ޒަމީރު ފާހަގަކުރެއްވިއެވެ.
މި ކޮމިޓީގެ މަސައްކަތްތަކުން ހާމަވެގެންދަނީ، ދުނިޔޭގެ ނުތަނަވަސްކަމުގެ ތެރޭގައިވެސް ރާއްޖޭގެ އިޤުތިޞާދީ އަދި އިޖުތިމާޢީ ޙާލަތު ހަމަހިމޭންކަންމަތީ ކުރިއަށް ގެންދިއުމަށް ރައީސް މުޢިއްޒުގެ ސަރުކާރުން ދެއްވާ އަހަންމިއްޔަތުކަމެވެ.