ސިއްހީ ދާއިރާއިން ސަރުކާރުން ބޮޑު ކުރިއެރުމެއް، ޒަމާނީ ލޭޒާ އޮޕަރޭޝަންތައް 2 ހޮސްޕިޓަލެއްގައި ފަށައިފި

ރައީސް ޑރ މުހައްމަދު މުއިއްޒުގެ ދުރުވިސްނުންފުޅާ އެކު ރާއްޖޭގެ ސިއްހީ ނިޒާމު އިތުރު ހަރުފަތަކަށް ދަތުރުކޮށްފިއެވެ.
އެގޮތުން ޒަމާނީ ލޭޒާ ޓެކްނޮލޮޖީ ބޭނުން ކޮށްގެން ކުރާ އޮޕެރޭޝަންތައް ދަރުމަވަންތަ ހޮސްޕިޓަލާއި އައިޖީއެމްއެޗްގައި ހޯމަ ދުވަހު ވަނީ ފަށަފައެވެ.
އެގޮތުން، ހޮސްޕިޓަލުގެ ޑިޕާޓްމެންޓް އޮފް ސާޖަރީގެ ޖެނެރަލް ސާޖަރީ ޓީމުން މިހާރު ވަނީ އާންމުކޮށް މީހުންނަށް ދިމާވާ ހަތަރު ބައްޔަކަށް ލޭޒާ ކްލިނިކަލް ވަސީލަތްތައް ފުރިހަމަކޮށްފައެވެ.
އޭގެ ތެރޭގައި ހިމެނެނީ:
އީވީއެލްޓީ: ފައިގެ ލޭނާރުތައް ފުއްޕައި، ދުޅަވެ ގޮށްޖެހޭ ބައްޔަށް ދޭ “އެންޑޯވީނަސް ލޭޒާ ޓްރީޓްމެންޓް”
ލޭޒާ ހެމޮރޮއިޑޯޕްލާސްޓީ: ގިނަ ބަޔަކަށް ދިމާވާ ފުރަގަސްފަރާތުގެ ބަލި (ޕައިލްސް) އަށް ހާއްސަ ލޭޒާ ފަރުވާ
ފިލަކް: ފުރަގަސްފަރާތުގައި އުފެދޭ ދޮސް އަންނަ މަގު ނުވަތަ “އޭނަލް ފިސްޓުލާ” ބައްދާލުމަށް ކުރާ އޮޕަރޭޝަން
ސިލަކް: ބުރަކަށީގެ ތިރީގައި އުފެދޭ ޕައިލޯނީޑަލް ސައިނަސް ނައްތާލުމަށް ކުރާ ލޭޒާ އޮޕަރޭޝަން އެވެ.
މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމް ހާމަކުރެއްވި ގޮތުގައި، މިއީ ރާއްޖޭގެ ސިއްހީ ދާއިރާގައި ފަރުވާ ދެވޭ ފެންވަރު މަތިކޮށް، ބޭރު ގައުމުތަކަށް ބަރޯސާވުން ކުޑަކުރުމަށް އެޅުނު މުހިންމު ފިޔަވަޅެކެވެ. މިއާއެކު، ދިވެހިންނަށް ދެން އަމިއްލަ ގައުމުގައި ތިބެގެން މި ޚިދުމަތުގެ ފައިދާ ލިބޭނެކަން އޭނާ ފާހަގަކުރެއްވި އެވެ.
މިއައު ޓެކްނޮލޮޖީއާ އެކު، މީގެ ކުރިން ބަލިތަކަށް ކުރަމުން އައީ ބޮޑެތި އޮޕަރޭޝަންތަކަށް ލުއި ލިބި، ސާޖަރީގެ މުޅި ތަޖުރިބާކުރެވޭނެއެވެ.
ހަށިގަނޑުން ބޮޑުތަނެއް ކަފާލުމެއް ނެތި، ހަމައެކަނި ލޭޒާ ދޯދި ބޭނުންކޮށްގެން ބަލި ހުންނަ ސަރަހައްދަށް ފަރުވާ ދެވުމުން، އޮޕަރޭޝަނަށްފަހު ވާ ތަދު އިހުނަށްވުރެ އެތައް ގުނައެއް ކުޑަވެ، އަވަހަށް ރަނގަޅުވެ ބަލިމީހާ ބޮޑެތި ތަކުލީފާ ވޭނުން ސަލާމަތްވާނެއެވެ.