ރައްޔިތުންގެ މަޖިލީހުގެ ތެރެއިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިތުބާރު ނެތްކަމުގެ ވޯޓެއް ނެގިޔަ ނުދެއްވާނެ ކަމަށާއި، އެއީ އިދިކޮޅު ފަރާތްތަކުން ދެކެމުންދާ “ނަނާ ހުވަފެނެއް” ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ރޭ ވިދާޅުވެއްޖެއެވެ.
ޢަބްދުއްރަޙީމް މިފަދައިން ވިދާޅުވީ، ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ވެރިކަންކުރާ ޕީއެންސީގެ ފަރާތުން ވާދަކުރައްވާ ކެންޑިޑޭޓް އަޙްމަދު ސަޢީދުގެ ކެމްޕޭން އިފްތިތާޙްކުރުމަށް ރޭ އައްޑޫ ސިޓީގައި ބޭއްވި ޚާއްޞަ ޖަލްސާގައި ވާހަކަފުޅު ދައްކަވަމުންނެވެ.
އިދިކޮޅު އެމްޑީޕީއަށް ވަރަށް ބޮޑަށް ފާޑުވިދާޅުވަމުން ޢަބްދުއްރަޙީމް ވިދާޅުވީ، ރައީސް މުޢިއްޒުގެ އިތުބާރު ނެތްކަމުގެ ވޯޓެއް ނެގުމުގެ އެއްވެސް ފުރުޞަތެއް މަޖިލީހުގެ ތެރެއިން ނުދެއްވާނެ ކަމަށެވެ.
“އަޅުގަނޑު މިރޭ ދަންނަވާލަން ބޭނުންވަނީ ނަނާ ހުވަފެން ނުދައްކަވާށޭ. ރައްޔިތުންގެ މަޖިލީހުގެ ތެރެއިން ރައީސް ޑރ. މުޙައްމަދު މުޢިއްޒުގެ އިތުބާރު ނެތްކަމުގެ ވޯޓެއް ތިބޭފުޅުންނަކަށް ނުނެންގެވޭނެ. އެކަން ކުރާކަށް އަޅުގަނޑުމެން ފުރުސަތެއް ނުދޭނަން،” ޢަބްދުއްރަޙީމް ވިދާޅުވިއެވެ.
މީގެއިތުރުން އޭނާ ވިދާޅުވީ ރައްޔިތުން ތިބީ މި ސަރުކާރާއި ޕީއެންސީއާ އެކުގައި ކަމަށާއި، ރައްޔިތުންނަށް އޮޅުވާލައިގެން އިދިކޮޅު ފަރާތްތަކަށް އެއްވެސް ކާމިޔާބީއެއް ނުހޯދޭނެ ކަމަށެވެ.
ޢަބްދުއްރަޙީމް މިފަދަ ރޫޙެއްގައި ވާހަކަފުޅު ދައްކަވާފައި މިވަނީ، ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމްގެ އިތުބާރު ނެތްކަމުގެ މައްސަލައެއް ޕީއެންސީން ހުށަހެޅީ، ރައީސް މުޢިއްޒުގެ އިތުބާރު ނެތްކަމުގެ ވޯޓެއް ނަގަން އުޅޭތީ ކަމަށް ބުނެ ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކާ ގުޅިގެންނެވެ.
އައްޑޫގެ ތަރައްޤީއާ ގުޅޭގޮތުން ވާހަކަދައްކަވަމުން ޢަބްދުއްރަޙީމް ވިދާޅުވީ އައްޑޫ ސިޓީގެ ރައްޔިތުންނަށް ބޭނުންވާ ކުރިއެރުން ގެނެސްދޭނީ ރައީސް މުޢިއްޒުގެ ސަރުކާރުން ކަމަށެވެ. އަދި މަޖިލީހުގައި މިހާރު ތިއްބެވި އެމްޑީޕީގެ މެންބަރުންނަށް ސަރުކާރު ޖަވާބުދާރީކުރުވުމުގެ މަސައްކަތް އެކަށީގެންވާ ގޮތެއްގައި ނުކުރެވޭ ކަމަށްވެސް އޭނާ ފާހަގަކުރެއްވިއެވެ.
މި ޖަލްސާގައި ޢަބްދުއްރަޙީމް ވަނީ ހިތަދޫ އުތުރު ދާއިރާގެ ގޮނޑި މީގެކުރިން ފުރުއްވި މުޙައްމަދު ސިނާން (ސިނާ) ގެ މަސައްކަތްތަކަށް ޝުކުރު އަދާކުރައްވައި، ސިނާއާ އެކު ނުކުމެ ޕީއެންސީން މި ބައި-އިލެކްޝަން ކާމިޔާބުކުރާނެ ކަމުގެ ޔަޤީންކަން ދެއްވާފައެވެ.
ހިތަދޫ އުތުރު ދާއިރާގެ މަޖިލިސް ގޮނޑިއަށް މެންބަރަކު ހޮވުމަށް ބާއްވާ ބައި-އިލެކްޝަން އޮންނާނީ އަންނަ ޖޫން މަހުގެ 6 ވަނަ ދުވަހުއެވެ.