ވެރިކަން ކުރާ ކޮންގްރެސް ޕާޓީ (ޕީއެންސީ) ގެ އެތެރޭގައި ފިތުނަ އުފައްދައިގެން އެ ޕާޓީ ބައިބައި ނުކުރެވޭނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ. އަބްދުއްރަހީމް މިހެން ވިދާޅުވީ ޕީއެންސީގެ އެތެރޭގައި ޚިޔާލުތަފާތުވުންތަކެއް އުފެދި، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސީ ބާރު ކުޑަވަމުންދާ ކަމަށް ބުނެ ބައެއް މީޑިއާތަކުން ފަތުރަމުންދާ ޚަބަރުތައް ދޮގުކުރައްވަމުންނެވެ.
މި މައްސަލަ ފެންމަތިވެގެންދިޔައީ ޕީއެންސީގެ ސެނެޓް މެންބަރަކާ ހަވާލާދީ “އަދަދު” ނޫހާއި ބައެއް އެހެން މީޑިއާތަކުން ޝާއިއުކުރި ރިޕޯޓްތަކަކާ ގުޅިގެންނެވެ. އެ ރިޕޯޓްތަކުގައި ބުނެފައިވަނީ، 2026 ވަނަ އަހަރު ބާއްވާ ކޮންގްރެސްގެ އިންތިޒާމުތައް ލީޑަޝިޕުން ނިންމާ ގޮތަށް ހެދުމަށް ރައީސް މުއިއްޒު ހުށަހެޅުއްވި ހުށަހެޅުއްވުމަށް ސެނެޓުން ދެކޮޅު ހަދާފައިވާ ކަމަށެވެ. ނަމަވެސް މި ވާހަކަތަކަށް ރައްދު ދެއްވަމުން އަބްދުއްރަހީމް ވިދާޅުވީ އެއީ ކަނޑައެޅިގެން ހަގީގަތާ ޚިލާފު ވާހަކަތަކެއް ކަމަށެވެ.
“މިއީ ކަނޑައެޅިގެން ހަގީގަތާ ޚިލާފުވާހަކައެއް. މެންބަރުންގެ މަޖިލީހުން ވަކި ގޮތަކަށް ކަމެއް ނިންމާކަށް ރިޔާސަތުން ޕާޓީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށައެއް ނާޅުއްވާ،” އަބްދުއްރަހީމް ވިދާޅުވިއެވެ. އޭނާ އިތުރަށް ވިދާޅުވީ ޕީއެންސީއަކީ ޑިމޮކްރަސީގެ ރިވެތި އުޞޫލުން ހިންގާ ޕާޓީއެއް ކަމަށާއި، ބޭރުން އުފައްދާ ފިތުނައިގެ ސަބަބުން ޕާޓީގެ ބަދަހިކަމަށް ބުރޫ ނާރާނެ ކަމަށެވެ.
މިކަމާ ގުޅިގެން ޕީއެންސީގެ ޕީޖީ ލީޑަރު އިބްރާހިމް ފަލާހު ވެސް ވަނީ މީޑިއާގެ ރިޕޯޓްތައް ދޮގުކުރައްވާފައެވެ. ފަލާހު ވިދާޅުވީ ރައީސް މުއިއްޒު ބޭނުންފުޅު ނުވާ އެއްވެސް ކަމެއް ޕާޓީގެ ސެނެޓްގައާއި ލީޑަޝިޕްގައި ނުހިނގާނެ ކަމަށެވެ. އަދި ރައީސް މުއިއްޒަކީ އަބަދުވެސް ޕާޓީގެ އަސާސީ ގަވާއިދާއި މަޝްވަރާގެ އުސޫލު އިސްކުރައްވާ ބޭފުޅެއްކަން އޭނާ ފާހަގަކުރެއްވިއެވެ.
މީޑިއާ ރިޕޯޓްތަކުގައި ބުނެފައިވާ ގޮތުގައި، ކޮންގްރެސްގެ ކަންކަން ވިލަރެސްކުރަން އެކުލަވާލި ކޮމިޓީގައި ރައީސް މުއިއްޒު އެހާ ގަޔާނުވާ ބޭފުޅުން ހިމެނިވަޑައިގަންނަވައެވެ. އޭގެ ތެރޭގައި މަޖިލީހުގެ ރައީސް އަބްދުއްރަހީމާއި ޕީޖީ ލީޑަރު ފަލާހު ހިމެނޭ ކަމަށް ބުނެފައިވީ ނަމަވެސް، ލީޑަޝިޕުން ބުނަނީ މުޅި ލީޑަޝިޕް އޮތީ ރައީސް މުއިއްޒާއެކު ސާބިތުވެ ކަމަށެވެ.
ނިންމާލަމުން އަބްދުއްރަހީމް ވިދާޅުވީ، ފިތުނަ ފަސާދަ އުފައްދައިގެން ޕާޓީ ބައިބައި ކުރުމަށް ކުރާ މަސައްކަތް ކާމިޔާބު ނުވާނެ ކަމަށާއި، ޕާޓީގެ އެތެރޭގެ ގުޅުން އޮތީ ވަރަށް ބަދަހިކޮށް ކަމަށެވެ.