ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ސަރުކާރުގެ ޚިދުމަތްތައް ޑިޖިޓަލައިޒްކުރުމުގެ މަސައްކަތް ބާރުމިނުގައި ކުރިއަށްދާކަން މައިންޑްކޯއިން ހާމަކޮށްފިއެވެ. އެ ކުންފުނީގެ މައިގަނޑު އަމާޒަކީ މިއަހަރު ނިމުމުގެ ކުރިން ސަރުކާރުގެ އިދާރާތަކުން ދޭ ޚިދުމަތްތަކުގެ 70 އިންސައްތަ "ވަންގަވް" މަންސަ މެދުވެރިކޮށް ލިބޭނެ ގޮތް ހެދުމެވެ.
އިގުތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވުޒާރާއިން ކުރިއަށްގެންދާ "ޓްރޭޑް ޑެސްކް ވިތު އަނާ" ޕޮޑްކާސްޓުގައި ވާހަކަދައްކަވަމުން މައިންޑްކޯގެ މެނޭޖިން ޑިރެކްޓަރ ސައީދާ އުމަރު ވިދާޅުވީ، އެ ކުންފުނިން މިހާރު ދެ މުހިއްމު މަންސައެއް ތަރައްގީކޮށް ބަލަހައްޓަމުންދާ ކަމަށެވެ. އެއީ ރާއްޖެއަށް މުދާ އެތެރެކުރުމުގެ ޚިދުމަތްތައް އެއްތަނަކުން ލިބޭ "ޓްރޭޑިއަން" މަންސައާއި، ސަރުކާރުގެ އެކި ދާއިރާތަކުގެ ޚިދުމަތްތައް ލިބޭ "ވަންގަވް" މަންސައެވެ.
ސައީދާ އުމަރު ފާހަގަކުރެއްވި ގޮތުގައި މިހާރުވެސް ވަންގަވް މެދުވެރިކޮށް 23 އިދާރާއަކުން 400 އަށްވުރެ ގިނަ ޚިދުމަތް ފޯރުކޮށްދެމުންދެއެވެ. މިއަހަރުގެ އަމާޒުތަކުގެ ތެރޭގައި ކައުންސިލްތަކުން ދޭ ޚިދުމަތްތަކުގެ 40 އިންސައްތަ ވަންގަވްއަށް ބަދަލުކުރުމާއި، މަންސައިގެ ޚިދުމަތްތައް ދިވެހި ބަހުން ލިބޭނެ އިންތިޒާމު ހަމަޖެއްސުން ހިމެނެއެވެ. މިއީ ޚިދުމަތް ހޯދުމުގައި އާންމުންނަށް ހުރި ހުރަސްތައް ނައްތާލުމަށް ކުރެވޭ މުހިއްމު މަސައްކަތެކެވެ.
ޓްރޭޑިއަން މަންސައާ ގުޅޭގޮތުން ވާހަކަދައްކަވަމުން ސައީދާ ވިދާޅުވީ، އެއީ ރާއްޖޭގެ ބޯޑަރުން މުދާ އެތެރެކުރުމުގައި ފޯރުކޮށްދޭންޖެހޭ އެކި ހިދުމަތްތައް އެއް ތަނަކުން ލިބޭ ގޮތަށް ތައްޔާރުކޮށްފައިވާ "ނޭޝަނަލް ސިންގަލް ވިންޑޯ" މަންސަ ކަމަށެވެ. މިއީ ކަނޑު މަގުންނާއި ވައިގެ މަގުން ރާއްޖެއަށް މުދާ އެތެރެކުރާ ފަރާތްތަކަށް ބޭނުންވާ ހިދުމަތްތައް ފަސޭހައިން ލިބޭނެ ގޮތަށް ފަރުމާކޮށްފައިވާ ނިޒާމެކެވެ.
މި ދާއިރާއިން ކުރިމަތިވާ އެންމެ ބޮޑު ގޮންޖެހުމަކީ ފަންނީ މީހުން މަދުވުން ކަމަށްވާތީ، އެކަން ހައްލުކުރުމަށް "ފިއުޗާ އިންސްޓިޓޫޓް" ގެ ނަމުގައި ހާއްސަ މުއައްސަސާއެއް ގާއިމުކޮށް، ފަންނީ މީހުން ތަމްރީނުކުރުމުގެ ކޯސްތައް ފެށުމަށް ތައްޔާރުވަމުންދާކަންވެސް މައިންޑްކޯއިން ވަނީ ހާމަކޮށްފައެވެ. މިއީ ރާއްޖޭގެ ޑިޖިޓަލް އިންފްރާސްޓްރަކްޗަރ ވަރުގަދަކުރުމަށް އެޅޭ މުހިއްމު ފިޔަވަޅެކެވެ.