އިންޑިއާގެ އުތުރާއި މެދުތެރޭގެ ބޮޑު ސަރަހައްދަކަށް ފެތުރިފައިވާ، ގާތްގަނޑަކަށް 2,500 ކިލޯމީޓަރުގެ ދިގުމިން ހުރި ބިޔަ ވިލާގަނޑެއް އުފެދިގެން ދަތުރުކުރަމުންދާކަން އިންޑިއާގެ މީޓިއަރލޮޖީ ޑިޕާރޓްމަންޓުން ހާމަކޮށްފިއެވެ. އިންޑިއާގެ މޫސުމީ ސެޓެލައިޓް ‘އިންސެޓް-3ޑީއެސް، އިން ނަގާފައިވާ ތާމަލް އިންފްރަރެޑް ފޮޓޯތަކުން މި ބިޔަ ނިޒާމު ފެންނަން ހުރިއިރު، މިއީ މި ސީޒަނުގައި އުފެދުނު އެންމެ ބޮޑު ވިލާގަނޑު ކަމަށް މޫސުމީ މާހިރުން ވިދާޅުވެއެވެ.
މި ބިޔަ ވިލާގަނޑު ޕާކިސްތާނާއި އިންޑިއާގެ ހުޅަނގު އުތުރުން ފެށިގެން ޕަންޖާބު، ހަރިޔާނާ، ދިއްލީ، އުއްތަރަ ޕްރަދޭޝް އަދި މެދުތެރޭ އިންޑިއާގެ ބައެއް ސަރަހައްދުތަކަށް ފެތުރި، ބެންގާލް ކަނޑުއޮޅިއާ ހަމައަށް ވަނީ ދެމިގެން ގޮސްފައެވެ. މޫސުމީ މާހިރުން ވިދާޅުވާ ގޮތުގައި މިއީ "ވެސްޓަން ޑިސްޓާބަންސް" ނުވަތަ ހުޅަނގުން އަންނަ މޫސުމީ ބަދަލުތަކާއި، އަރަބި ކަނޑާއި ބެންގާލް ކަނޑުއޮޅިން އަންނަ ތެތްފިނީގެ ސަބަవుން އުފެދިފައިވާ ބޮޑު ނިޒާމެކެވެ.
ފާއިތުވި ދުވަސްތަކުގައި އިންޑިއާގެ އުތުރުގެ ސަރަހައްދުތަކަށް ވަނީ ގަދަ ހޫނުގެ އަސަރު އިންތިހާއަށް ކޮށްފައެވެ. އެގޮތުން ރާޖަސްތާނުގެ ފްރީ ގަންގަނަގަރްއިން ދުނިޔޭގެ އެންމެ މަތީ ހޫނުމިން ކަމަށްވާ 48.2 ޑިގްރީ ސެލްސިއަސް ރެކޯޑުކުރެވުނު ނަމަވެސް، މި ފެނުނު ބިޔަ ވިލާގަނޑާއެކު ގަދަ ހޫނަށް ކުޑަ ނަމަވެސް ލުޔެއް ލިބޭނެ ކަމުގެ އުންމީދު ވަނީ އާވެފައެވެ. މި ނިޒާމު އުފެދެން ދިމާވީ ބިމުގެ ހޫނުމިން މަތިވެފައި ހުއްޓާ، ކަނޑުން އަންނަ ތެތްފިނި މީގެ ތެރެއަށް ވަނުމުން އުފެދުނު ނުތަނަވަސްކަމުގެ ސަބަބުންނެވެ.
ސެޓެލައިޓް ފޮޓޯތަކުން ފެންނަ ގޮތުގައި ވިލާތަކުގެ މަތީބައި ވަނީ ވަރަށް ބޮޑަށް ފިނިވެފައެވެ. މިއީ ޖައްވުގެ މަތީ ފަށަލައަށް އުފުލިފައިވާ ބިޔަ ގުގުރާ ވިލާތަކުގެ ނިޝާނަކަށް ވާއިރު، މީގެ ސަބަބުން ބޯކޮށް ވާރޭވެހުމާއި، ގުގުރުމާއި، ގަނޑުފެން ފޭބުމުގެ އިތުރުން ގަދަވަޔާއެކު ކޮޅިގަނޑު އައުން އެކަށީގެންވެއެވެ. މީގެ އިތުރުން ޕާކިސްތާނުގެ އުތުރާއި ޖައްމޫ އެންޑް ކަޝްމީރު ސަރަހައްދުގައި "ސައިކްލޯނިކް ސްވީލް" އެއް ނުވަތަ އެނބުރޭ ވައިގެ ބުރެއް އުފެދިފައިވާކަން ވެސް ވަނީ ދެނެގަނެވިފައެވެ.
މި ބިޔަ ވިލާގަނޑަކީ އިންޑިއާގެ އުތުރާއި މެދުތެރޭގެ ސަރަހައްދުތަކަށް އަމާޒުވެފައިވާ ނިޒާމަކަށް ވުމުން، މީގެ ސީދާ އަސަރެއް ރާއްޖެއަށް ކުރާނެ ކަމަކަށް ނުބެލެވެއެވެ. ނަމަވެސް، ސަރަހައްދީ ވައިގެ ދައުރުވުމަށް ބަދަލުތަކެއް އައުމަކީ އެކަށީގެންވާ ކަމެއް ކަމަށް މާހިރުން ލަފާކުރެއެވެ. ރާއްޖެއަށް މިހާރު ކުރަމުންދާ ވިއްސާރައަކީ ރާއްޖެ ސަރަހައްދުގައި އުފެދިފައިވާ މޫސުމީ ބަދަލުތަކާ ގުޅިފައިވާ ކަމެކެވެ.
މުޅި ސަރަހައްދުގެ މޫސުމަށް އަންނަ މިފަދަ ބޮޑެތި ބަދަލުތައް ރާއްޖޭގެ މޫސުމާ ބެހޭ އިދާރާއިންވެސް ދަނީ މޮނިޓަރު ކުރަމުންނެވެ. އިންޑިއާގެ މޫސުމީ އިދާރާތަކުން ލަފާކުރާ ގޮތުގައި ކުރިއަށް އޮތް ދުވަސްތަކުގައި އެ ގައުމުގެ އުތުރުގެ ގިނަ ސަރަހައްދުތަކަށް ގުގުރުމާއެކު ވާރޭވެހި، ވެލީގެ ތޫފާންތައް ކުރިމަތިވުން އެކަށީގެންވެއެވެ.