ދުންފަތުގެ އިސްތިޢުމާލުކުރާ މިންވަރު މަދުކުރުމަށް ސަރުކާރުން ފަށާފައިވާ ޤައުމީ ކެމްޕެއިންގެ ދަށުން، ރާއްޖޭގެ ސްކޫލުތަކުގައި ހޭލުންތެރިކުރުވުމުގެ ފުޅާ ހަރަކާތްތަކެއް ހިންގުމަށް ނިންމައިފިއެވެ. މިކަން ހާމަކުރެއްވީ ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ ގުޅިގެން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ތަޢުލީމާއި މަތީ ތައުލީމާ ބެހޭ ވަޒީރު އިސްމާއިލް ޝަފީޢުއެވެ.
ވަޒީރު ވިދާޅުވި ގޮތުގައި، މި ކެމްޕެއިންގެ ތެރެއިން ދަރިވަރުންނާއި، ބެލެނިވެރިން އަދި މުދައްރިސުންނަށް ބޭނުންވާ މައުލޫމާތު ފޯރުކޮށްދިނުމުގެ އިތުރުން، ދުންފަތުގެ އިސްތިއުމާލުކުރުން ހުއްޓާލަން ބޭނުންވާ ފަރާތްތަކަށް ސިއްހީ ގޮތުން ބޭނުންވާނެ އެހީތެރިކަން ފޯރުކޮށްދިނުމުގެ އިންތިޒާމުތައްވެސް ހަމަޖެހިގެންދާނެއެވެ. މި މަސައްކަތުގައި ސްކޫލުތަކުގެ އިތުރުން މަދަނީ ޖަމިއްޔާތަކާއި، ކުލަބުތައް އަދި މަތީ ތައުލީމުދޭ މަރުކަޒުތަކުގެ ދަރިވަރުންގެ ޔޫނިއަންތަކުންވެސް ބައިވެރިވާނެއެވެ.
“މަދަރުސީ ނިޒާމުގެ ތެރެއިން ކުރިޔަށް އޮތް ދުވަސްތަކުގައި ހުރިހާ ސްކޫލެއްގައިވެސް ދުންފަތުގެ ނުރައްކަލާ އެކަމުގެ ސަބަބުން ލިބޭ ގެއްލުން، އެއީ ހަމައެކަނި ޞިއްޙީ ގެއްލުމެއް ނޫން އެއީ އިޤްތިޞާދީ ގޮތުންވެސް އާއިލާތަކަށް ކުރާ ގެއްލުމެއް މި ލެވެލުގައި މި މައުލޫމާތުތައް ކުދިންނަށް އާއިލާތަކަށް ފޯރުކޮށްލަދޭނަން،” ވަޒީރު ޝަފީޢު ވިދާޅުވިއެވެ. މީގެ އިތުރުން މިހާރު ކުރިއަށްދާ “ބިންގާ” ޕްރޮގްރާމުގެ ތެރޭގައިވެސް ދުންފަތާ ދެކޮޅު ހަރަކާތްތައް ހިމެނުމަށް ވަނީ ނިންމާފައެވެ.
ރާއްޖޭގައި ވޭޕް މަނާކުރުމަށް ސަރުކާރުން ނިންމި ނިންމުމާ ގުޅޭގޮތުން ވާހަކަދައްކަވަމުން ވަޒީރު ފާހަގަކުރެއްވީ، އެއީ ރާއްޖޭގެ 215 ސްކޫލެއްގެ ޕީޓީއޭއާ ބައްދަލުކޮށް ބެލެނިވެރިންގެ ކަންބޮޑުވުންތައް އޮޅުންފިލުވުމަށްފަހު، ރައީސުލްޖުމްހޫރިއްޔާގެ ސަމާލުކަމަށް އެކަން ގެނެސްގެން ނިންމެވި މުހިންމު ނިންމުމެއް ކަމަށެވެ. އަދި މިއީ އަންނަން އޮތް ޖީލުތަކުގެ ހައްގުގައި އަޅާފައިވާ ފިޔަވަޅެއްކަން ވަޒީރު ފާހަގަކުރެއްވިއެވެ.
މި ކެމްޕެއިންގެ މައިގަނޑު މަގްސަދަކީ ދިވެހިރާއްޖެއަކީ ދުންފަތުގެ ނުރައްކަލާ ބެހޭ ފުރިހަމަ މައުލޫމާތު ލިބިފައިވާ މުޖުތަމައަކަށް ހެދުމެވެ. މިގޮތުން ހިންގޭ ހޭލުންތެރިކުރުވުމުގެ ޕްރޮގްރާމްތަކުގެ ސަބަބުން ދުންފަތުގެ ސަބަބުން އާއިލާތަކަށް ކުރިމަތިވާ ސިއްހީ އަދި މާލީ ދަތިތަކަށް ހައްލެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.