ހެމަރޮއިޑްސް ނުވަތަ އާންމު ނަމުން ނަމަ ޕައިލްސް އަކީ ފުރަގަސްފަރާތުގެ ތިރީބައިގައިވާ ލޭނާރުތައް ދުޅަވެ ފުފުމުގެ ސަބަބުން ދިމާވާ ސިއްހީ މައްސަލައެކެވެ. މިއީ ދުނިޔޭގެ އެކި ކަންކޮޅުތަކުގައި މިލިއަނުން މީހުންނަށް ދިމާވާ އާންމު ބައްޔެކެވެ. މިއީ އުނދަގޫ އަދި ބައެއް ފަހަރު ވޭންދެނިވި ކަމަކަށް ވީނަމަވެސް، ދިރިއުޅުމުގެ އާދަތަކަށް ގެނެވޭ ބަދަލުތަކާއި އެކަށީގެންވާ ފަރުވާއާއެކު މި ބަލި ކޮންޓްރޯލް ކުރެވިދާނެއެވެ.
ޕައިލްސް މައިގަނޑު ގޮތެއްގައި ދެ ބަޔަކަށް ބެހިގެންވެއެވެ. އެއީ އެތެރެހަށީގެ ޕައިލްސް އަދި ބޭރުފުށުގެ ޕައިލްސް އެވެ. އެތެރެހަށީގެ ޕައިލްސް އާންމުކޮށް ރިހުމެއް ނުހުންނަ އިރު، ބޮޑުކަމުދާއިރު ލޭ އައުން މެދުވެރިވެއެވެ. ނަމަވެސް ބޭރުފުށުގެ ޕައިލްސްގެ ސަބަބުން ކަސްވުމާއި، ދުޅަވުމާއި، އަދި ބޮޑުކަމުދާއިރު ގަދައަށް ރިއްސުން ފަދަ އުނދަގޫތައް ކުރިމަތިވެއެވެ.
މި ބަލި ޖެހުމަށް މަގުފަހިވާ މައިގަނޑު ސަބަބަކީ ބޮޑުކަމުދާއިރު ބާރުލާން ޖެހުމެވެ. މީގެ އިތުރުން ގިނަ ވަގުތު ފާޚާނާގައި އިށީނދެ އިނުމާއި، ފައިބަރު މަދު ކާނާ ބޭނުންކުރުމާއި، ބަނޑުހިކުމާއި، ބަރުދަން އިތުރުވުމުގެ އިތުރުން މާބަނޑު ދުވަސްވަރުވެސް މި މައްސަލަ ދިމާވުމުގެ ފުރުސަތު ބޮޑެވެ. އުމުރުން ދުވަސްވާ ވަރަކަށް ފުރަގަސްފަރާތުގެ ޓިޝޫތައް ބަލިކަށިވުމަކީވެސް ޕައިލްސް އުފެދުމަށް މެދުވެރިވާ ސަބަބެކެވެ.
ޕައިލްސްގެ އުނދަގޫތަކަށް ލުޔެއް ހޯދުމަށް ގޭގައި ބައެއް ފަރުވާތައް ކުރެވިދާނެއެވެ. އޭގެ ތެރޭގައި ލޮނުމެދާއި، ކިރު އަދި މާމުއި އެއްކޮށްގެން ތައްޔާރުކުރާ ޕޭސްޓެއް ބޭނުންކުރުމާއި، އެޕްސަމް ސޯލްޓާއި ގްލިސަރިން އެއްކޮށްގެން ދުޅަވެފައިވާ ތަނުގައި އެޅުން ހިމެނެއެވެ. މީގެ އިތުރުން ތާފަނާ ފެނުގެ ތެރޭގައި 15 މިނެޓް ވަންދެން އިށީނދެގެން އިނުމަކީ ވޭން ކުޑަކޮށްދޭނެ ކަމެކެވެ.
ގޭގައި ދެވިދާނެ ފަރުވާ
ޕައިލްސްގެ އުނދަގޫތަކަށް ގޭގައި ތައްޔާރުކޮށްގެން ބޭނުންކުރެވިދާނެ ޚާއްޞަ ބައެއް ފަރުވާ ތިރީގައި މިވަނީއެވެ.
ބޭނުންވާ ތަކެތި:
- 6 ލޮނުމެދު
- 50 މިލިލީޓަރ ކިރު
- 1 ސަމްސާ މާމުއި
- ސާފު ކަފަގަނޑެއް، މާބޮޑުނޫން
ތައްޔާރުކުރާނެ ގޮތް:
- ގާނާފައިވާ ލޮނުމެދާއި، ކިރު އަދި މާމުއި ތަވައަކަށް އަޅައި، މަޑުގިނީގައި ކައްކާލާށެވެ.
- ތައްޔާރުކުރި ޕޭސްޓް މަތިޖެހި ތައްޓަކަށް އަޅާ، ފްރިޖުގައި ގަޑިއެއްހާއިރު ވަންދެން ބަހައްޓައި، ފިނިކޮށްލާށެވެ.
- ސާފު ކަފަގަނޑަކަށް 1 ސަމްސާ އަޅައި، 20-30 މިނެޓް ވަންދެން ފުރަގަސްފަރާތު ދުޅަވެ، ފައިބާފައި ހުރި ތަނުގައި އަޅާށެވެ.
މި ބަލިން ރައްކާތެރިވުމަށްޓަކައި ގިނައިން ފެން ބުއިމާއި، ފައިބަރު ގިނަ ކާނާ (މޭވާ، ތަރުކާރީ، ގްރެއިންސް) ބޭނުންކުރުމާއި، ގަވާއިދުން ކަސްރަތު ކުރުން މުހިންމެވެ. ޕައިލްސްގެ މައްސަލަ ބޮޑުވާނަމަ ޑޮކްޓަރެއްގެ އިރުޝާދުގެ ދަށުން ބޭސް ބޭނުންކުރުމާއި، ބައެއް ހާލަތްތަކުގައި ސާޖަރީ ހެދުން ފަދަ ސިއްހީ ފަރުވާ ހޯދަންޖެހެއެވެ. “ޕައިލްސްއަކީ ފަރުވާ ހޯދަންޖެހޭ ޖިސްމާނީ އުނދަގުލެކެވެ. ދާއިމީ ހައްލެއް ހޯދުމަށް ސިއްހީ ފަރުވާ ހޯދުމަކީ މުހިންމު ކަމެކެވެ.”