ކުޅިވަރު ކުޅޭ ހުރިހާ ތަނެއްގައި ނަމާދުކުރެވޭ ގޮތަށް އިންތިޒާމުތައް ހަމަޖެއްސުމާއެކު، ބަންގި ގޮވުމުން ނަމާދުކުރުމަށް ވަގުތުކޮޅަކަށް ކުޅިވަރު ކުޅުން މެދުކަނޑައިލުން ލާޒިމުކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިކަން އިއުލާނުކުރެއްވީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.
ރައީސް ވިދާޅުވީ ކުޅިވަރުގެ ތެރޭގައި އުޅޭއިރު ނަމާދު ގަޑިޖެހިގެން ގޮސް ގަޑި ފާއިތުވާއިރުވެސް ކުޅިވަރު ކުޅުމުގެ ތެރޭގައި އުޅުމަކީ އެންމެ ރަނގަޅު ގޮތް ނޫންކަމަށެވެ. ނަމަވެސް ޒަމާނުއްސުރެ ރާއްޖޭގައި އެކަން ހިނގަމުންދަނީ އެހެން ކަމަށްވާތީ، މިހާރު ސަރުކާރުން އަޅާފައި ހުރި އަދި އަލަށް އަޅާ ކުޅިވަރުގެ އެކި ފެސިލިޓީތަކުގައި ޒަމާނީ ވަސީލަތްތަކާއެކު ވުޟޫކޮށް ނަމާދުކުރެވޭނެ ގޮތަށް އިންތިޒާމުތައް ހަމަޖެއްސެވުމަށް ވަނީ ނިންމަވާފައެވެ.
މިހާރު މާލޭގައި އެންމެ ގިނައިން ކުޅިވަރު ކުޅުމަށް ބޭނުންކުރާ ކުޅިވަރު އެކުވެނީގައިވެސް ވުޟޫކޮށް ނަމާދުކުރެވޭނެ ގޮތެއް ނެތްކަން ފާހަގަކުރައްވަމުން ރައީސް ވިދާޅުވީ، ކުޅިވަރު އެކުވެންޏާއި މާފަންނު ސްޓޭޑިއަމް ފަދަ ތަންތަނުގައި ޒަމާނީ ފެންވަރުގައި ނަމާދުކުރެވޭނެ ވަސީލަތްތައް ގާއިމުކުރައްވާނެ ކަމަށެވެ. އަދި މިހާރު ސަރުކާރުން ކުރިއަށްގެންދާ ކުޅިވަރުގެ އުމްރާނީ ވަސީލަތްތައް ގާއިމުކުރުމުގެ ހުރިހާ މަޝްރޫއެއްގައިވެސް މި ވަސީލަތްތައް ހިމެނުމަށް ވަނީ ނިންމަވާފައެވެ.
“މާފަންނު ސްޓޭޑިއަމުގައި ނަމާދުކުރާ ފެސިލިޓީ ގާއިމުކުރުމާ ހުރިހާ ކަމެއް ނިމިގެންދާނެ. ސަރުކާރުން އަޅާ ސްޕޯޓްސް ކޮމްޕްލެކްސްތަކާއި އެކި ކަހަލަ ކުޅިވަރު ފެސިލިޓީތައް އެޅިގެންދާއިރު އެގޮތަށް އެކަން ހަމަޖެހިގެންދާނެ،” ރައީސް ވިދާޅުވިއެވެ. މީގެ އިތުރުން ބަންގި ގޮވާ ވަގުތުން ފެށިގެން ނަމާދުކުރެވޭ ވަރުގެ ވަގުތުކޮޅަކަށް ހުރިހާ ކުޅިވަރެއް މެދުކަނޑައިލުން ލާޒިމުވާ ގޮތަށް ކަންކަން ހަމަޖެއްސެވުމަށްވެސް ވަނީ ނިންމަވާފައެވެ.
ރައީސް ވިދާޅުވި ގޮތުގައި މިފަދަ ނިންމެވުންތައް ނިންމަވަނީ ދިވެހިރާއްޖެއަކީ ސައްތައިން ސައްތަ އިސްލާމީ ގައުމަކަށްވާއިރު، ރާއްޖޭގައި އަމަލީ ގޮތުން ކަންކަން ހިނގަންޖެހޭނީ އެ ހަގީގަތާ އެއްގޮތްވާ ގޮތަށް ކަމުގައި ދެކެވަޑައިގަންނަވާތީއެވެ. ކުރިއަށް އޮތް މަސްތަކުގެ ތެރޭގައި ކުޅިވަރު ކުޅޭ ހުރިހާ ތަނެއްގައި މިފަދަ ވަސީލަތްތައް ގާއިމުކުރެވިގެންދާނެކަމަށް އެމަނިކުފާނު ވިދާޅުވިއެވެ.