މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، ދައުލަތުގެ އިދާރާތަކުން އަމިއްލަ އިސްނެގުމަށް ހާމަކުރަންޖެހޭ މައުލޫމާތުތައް ސަރުކާރުގެ ހުރިހާ ވުޒާރާއަކުން މި ހަފުތާ ނިމުމުގެ ކުރިން ހާމަކުރުމުގެ މަސައްކަތް ކުރަމުންދާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.
2014 ވަނަ އަހަރު އަމަލުކުރަން ފެށި މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 37 ވަނަ މާއްދާގައި، ދައުލަތުގެ އިދާރާތަކުން މަދުވެގެން އަހަރަކު އެއްފަހަރު އަމިއްލަ އިސްނެގުމަށް ހާމަކުރަންޖެހޭ މައުލޫމާތުތަކެއް ބަޔާންކޮށްފައިވެއެވެ. އޭގެ ތެރޭގައި އިދާރާގެ ދައުރާއި، މަސްއޫލިއްޔަތުތަކާއި، އޮނިގަނޑާއި، ރައްޔިތުންނަށް ދޭ ހިދުމަތްތަކުގެ އިތުރުން ޝަކުވާ ހުށަހެޅޭނެ އުސޫލުތައް ފަދަ މުހިއްމު މައުލޫމާތުތައް ހިމެނެއެވެ.
މި ގާނޫނަށް އަމަލުކުރާތާ 12 އަހަރުވެފައިވާއިރު، މީގެ ކުރިން ދައުލަތުގެ އިދާރާތަކުން މި ޒިންމާ އެކަށީގެންވާ ގޮތެއްގައި އަދާކުރަމުން ނުދާކަން އިންފޮމޭޝަން ކޮމިޝަނަރުގެ އޮފީހުން ވަނީ ފާހަގަކޮށްފައެވެ. ނަމަވެސް، މިހާރު ހުރިހާ ވުޒާރާތަކަކުންވެސް އެ މައުލޫމާތުތައް އާންމުކުރުމުގެ މަސައްކަތް ބާރަށް ކުރިއަށްގެންދާ ކަމަށް ރައީސް ވިދާޅުވިއެވެ.
ރައީސް މުޢިއްޒު ވިދާޅުވި ގޮތުގައި، ސަރުކާރުގެ ވުޒާރާތަކުގެ ތެރެއިން ހަތަރު ވުޒާރާއަކުން މިހާރު ވަނީ ގާނޫނުގައި ބަޔާންކުރާ ހުރިހާ މައުލޫމާތެއް ހާމަކޮށް ނިންމާފައެވެ. އަދި އެކަން އިންފޮމޭޝަން ކޮމިޝަނަރުގެ އޮފީހުން އެ ވުޒާރާތަކަށް އަންގާފައިވާ ކަމަށްވެސް އެމަނިކުފާނު ވިދާޅުވިއެވެ.
“ދެން ހުރި މިނިސްޓްރީތަކުންވެސް ގާތްގަނޑަކަށް ނިމެމުންދަނީ. މިބަލަނީ މި ހަފުތާ ނިމުމުގެ ކުރިން ހުރިހާ މިނިސްޓްރީއަކުންވެސް ހަންޑްރެޑް ޕަސެންޓު އެޗީވްކުރެވޭތޯ، އެ މައުލޫމާތުތައް ޕަބްލިޝްކޮށް ނިންމަން،” ރައީސް ވިދާޅުވިއެވެ.
މީގެ އިތުރުން، މައުލޫމާތު ހޯދުމަށް އެކި ފަރާތްތަކުން ހުށަހަޅާފައިވާ އާރްޓީއައި (RTI) ތަކަށް ޖަވާބުދިނުމުގެ މަސައްކަތްވެސް ހަލުވިކަމާއެކު ކުރިއަށްދާކަން ރައީސް ފާހަގަކުރެއްވިއެވެ. އެމަނިކުފާނު ވިދާޅުވީ މުއްދަތު ހަމަވެފައި ހުރި ހުރިހާ ހުށަހެޅުންތަކަށް ޖަވާބުދީ ނިންމުމަކީ ސަރުކާރުގެ އަމާޒެއް ކަމަށެވެ.