ރައީސް ޑރ މުހައްމަދު މުއިއްޒުގެ ދުރު ވިސްނުންފުޅާއެކު އަލަށް އެކުލަވާލި ބޭރު ފައިސާ މާރުކުރުމުގެ ގަވާއިދުގެ ދަށުން، ފާއިތުވި އެއް އަހަރު ދުވަހުގެ ތެރޭގައި ރިސޯޓުތަކުން ބޭންކުތަކަށް ޖުމްލަ 671 މިލިއަން ޑޮލަރު މާރުކޮށްފިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކާއެކު އެ އޮތޯރިޓީއިން ނެރުނު ނެރުނު 2025 ވަނަ އަހަރުގެ އަހަރީ ރިޕޯޓުގައިވާ ގޮތުން، މިދިޔަ ޖެނުއަރީ މަހުން ފެށިގެން އަމަލުކުރަން ފެށި މި ގަވާއިދުގެ ދަށުން މިހާތަނަށް 182 ރިސޯޓަކުން ވަނީ އެމްއެމްއޭގައި ރަޖިސްޓްރީކޮށް، ޑޮލަރު މާރުކުރަން ފަށާފައެވެ.
ތަފާސްހިސާބުތަކަށް ބަލާއިރު، ރިސޯޓުތަކުން ބޭންކުތަކަށް މާރުކުރި ޑޮލަރުގެ 78 އިންސައްތަ ނުވަތަ 523.4 މިލިއަން ޑޮލަރު ބޭންކުތަކުން ވަނީ އެމްއެމްއޭއަށް ވިއްކާފައެވެ. މިއީ ގަވާއިދުން ލާޒިމުކުރާ 70 އިންސައްތައަށް ވުރެ އިތުރު އަދަދެކެވެ. މި ބަދަލާއެކު ދައުލަތުގެ ރިޒާވަށް ހެޔޮ އަސަރެއް ކޮށްފައިވާކަމަށް އެމްއެމްއޭއިން ފާހަގަކުރެއެވެ
އިގްތިސޯދުގައި ދައުރުވާ ފައިސާގެ މިންވަރު ކޮންޓްރޯލްކޮށް، ރުފިޔާގެ އަގު ހިފެހެއްޓުމަށްޓަކައި އެމްއެމްއޭއިން ވަނީ އޯޕަން މާކެޓް އޮޕަރޭޝަންސް މެދުވެރިކޮށް ތިން ބިލިއަން ރުފިޔާ ނިޒާމުގެ ތެރެއިން އަނބުރާ ނަގާފައެވެ. އެމްއެމްއޭގެ ރިޕޯޓުގައި ފާހަގަކޮށްފައިވާ ގޮތުގައި، މިދިޔަ އަހަރު ބޭންކުތަކަށް ފޯރުކޮށްދިން ޑޮލަރުގެ އަދަދަކީ އޭގެ ކުރީ އަހަރާ އަޅާބަލާއިރު 29 އިންސައްތަ އިތުރު އަދަދެކެވެ.
ހިސާބުތަކުން އިތުރަށް ހާމަވެފައިވާ ގޮތުގައި، ބާޒާރުގައި ޑޮލަރުގެ އަގު ހިފެހެއްޓުމަށާއި އަސާސީ ބޭނުންތަކަށް ބޭންކުތަކަށް ދޫކުރި ޑޮލަރުގެ މިންވަރު 10 އިންސައްތަ ވަނީ އިތުރުވެފައެވެ. އެގޮތުން ބޭންކުތަކުން އެކި ބޭނުންތަކަށް ދޫކުރި ޑޮލަރުގެ އަދަދު ވަނީ، 1.1 ބިލިއަން ޑޮލަރަށް އަރާފައެވެ.
އޭގެ ތެރޭގައި ހިމެނެނީ، ސަރުކާރު ހިއްސާވާ ކުންފުނިތަކަށް މުދާ ގެނައުމާއި ދަރަނި ދެއްކުމަށް 651 މިލިއަން ޑޮލަރު، ބޭންކުތައް މެދުވެރިކޮށް އާންމުންނާއި ވިޔަފާރިތަކަށް 447.6 މިލިއަން ޑޮލަރު، އަދި ސަރުކާރުގެ ދަރަންޏާއި ބޭސްފަރުވާއަށް ދޫކުރި 436 މިލިއަން ޑޮލަރެވެ.
ރައީސް މުއިއްޒުގެ އިސްނެންގެވުމާ އެކު އަލަށް އެކުލަވާލި ބޭރު ފައިސާ މާރު ކުރުމުގެ އުސޫލުގެ ދަށުން ރިސޯޓުތަކަށް އަންނަ ކޮންމެ ފަތުރުވެރިއަކަށް 500 ޑޮލަރު ނުވަތަ ލިބޭ އާމްދަނީގެ 20 އިންސައްތަ ބޭންކުތަކަށް މާރުކުރަން ޖެހެއެވެ. އަދި ގެސްޓްހައުސްތަކާއި ސަފާރީތަކުން ކޮންމެ ފަތުރުވެރިއަކަށް 25 ޑޮލަރު ނުވަތަ އާމްދަނީގެ 20 އިންސައްތަ މާރުކުރުން ލާޒިމުވެއެވެ.