ރާއްޖެއިން ލިބެން ހުންނަ ސިއްހީ ފަރުވާތައް ހޯދުމުގައި ހުރި ދަތިތަކަށާއި ބަލިމީހާގެ ހާލަތަށް ރިއާޔަތްކޮށް، އާސަންދަ އެހީގެ ދަށުން ރާއްޖެއިން ބޭރަށް ފޮނުވޭ ގޮތަށް އާސަންދަ ސްކީމް ހިންގުމުގެ ގަވާއިދަށް މުހިންމު ބަދަލުތަކެއް ގެނެސް އިއްޔެ އާންމުކޮށްފިއެވެ. މިއީ ބޭސްފަރުވާގެ ކަންކަމުގައި އާންމުންނަށް ކުރިމަތިވާ ގޮންޖެހުންތަކަށް ލުޔެއް ހޯދައިދިނުމަށް ސަރުކާރުން ނިންމެވި ނިންމެވުމެކެވެ.
ކުރިން އަމަލުކުރަމުން އައި އުސޫލުގެ ދަށުން އާސަންދައިން ބޭރަށް ފޮނުވަނީ ހަމައެކަނި ރާއްޖެއިން ލިބެން ނެތް ފަރުވާތަކަށް އެކަނި ނަމަވެސް، އަލަށް ގެނައި އިސްލާހާއެކު މިވަނީ އެ އުސޫލު ދޫކޮށްލާފައެވެ. މިހާރު ގެނައި ބަދަލުގެ ދަށުން، ބަލީގެ ބާވަތާއި، ބަލިމީހާގެ ހާލަތުގެ އިތުރުން ރާއްޖޭގައި އެ ފަރުވާ ލިބުމުގައި ހުރި ދަތިތަކަށް ބެލުމަށްފަހު ބޭރުން ފަރުވާ ހޯދުމުގެ ހުއްދަ ދޫކުރާނެއެވެ. މީގެ އިތުރުން ބަލިމީހާގެ އިޖުތިމާއީ އަދި ސިއްހީ އެހެނިހެން ކަންކަމަށް ވެސް ރިއާޔަތްކުރާނެ ކަމަށް ގަވާއިދުގައިވެއެވެ.
އަތޮޅުތެރެއިން މާލެ އައިސް، މާލެއިން ބޭރަށް ފަރުވާއަށްދާ ފަރާތްތަކަށް ވެސް މި ބަދަލުގެ ސަބަބުން ބޮޑެތި ލުއިތަކެއް ލިބިގެންދާނެއެވެ. އެގޮތުން، އިތުރު ފަރުވާއެއް ދެވެން ނެތް ކަމަށް ސްޕެޝަލިސްޓް ޑޮކްޓަރުން ލަފާދޭ ހާލަތްތަކުގައި، ބަލިމީހާ އެނބުރި ރަށަށް ދިއުމާ ހަމައަށް ހިނގާ ހަރަދުތައް ވެސް ދެން ހަމަޖައްސައިދޭނީ އާސަންދަ ސްކީމުގެ ތެރެއިންނެވެ.
މި އިސްލާހުގެ ދަށުން ގެނައި އަނެއް މުހިންމު ބަދަލަކީ، ނުކުޅެދުންތެރިކަން ހުންނަ މީހުންނަށް ބޭނުންވާ ވީލްޗެއާ އަދި ހިއަރިން އެއިޑް ފަދަ ތަކެތި އާސަންދައިން ލިބޭ ގޮތަށް ހަމަޖެއްސުމެވެ. މީގެ ކުރިން މިފަދަ ތަކެތި ހޯދުމަށް އެންސްޕާގެ ވަކި ބަޖެޓަކަށް ބަރޯސާވާން ޖެހުނު ނަމަވެސް، މިހާރު އެ ތަކެތި ވަނީ އާސަންދައިން ހިދުމަތް ނުލިބޭ ތަކެތީގެ ލިސްޓުން އުނިކޮށްފައެވެ.
ސަރުކާރުގެ މި ނިންމުމަކީ ބޭސްފަރުވާގެ އެހީ ހޯދުމުގައި އާންމުން ކުރަމުން އައި ޝަކުވާތަކަށް، ހާއްސަކޮށް އެންސްޕާ މެދުވެރިކޮށް އެހީ ހޯދުމުގައި ހޭދަވާ ގިނަ ވަގުތުތަކަށް ހައްލެއް ހޯދައިދިނުމަށް އެޅުނު ފިޔަވަޅެކެވެ. މި ބަދަލާއެކު ބަލިމީހުންނަށް ފަސޭހަކަމާއެކު އަވަސް ފަރުވާ ލިބުމުގެ މަގު ތަނަވަސްވެގެންދާނެ ކަމަށް ބެލެވެއެވެ.