ސެޕްޓެމްބަރުގެ ކުރިން ޒުވާން ޚަތީބުންގެ އަދަދު 1000އަށް އަރާނެ ކަމަށް އިސްލާމިކު މިނިސްޓަރު ޑރ މުހައްމަދު ޝަހީމު އަލީ ސައީދު ހާމަކުރައްވައިފިއެވެ.
ރާއްޖެ އިސްލާމްވިތާ 900 އަހަރު ފުރޭ މުނާސަބަތާ ގުޅުވައިގެން “ޒުވާން ހަތީބުންގެ ގައުމީ މަހާސިންތާ” އެއް ބޭއްވުމަށް މިނިސްޓްރީން ނިންމާފައިވާކަން އިއުލާންކުރައްވާ ވަޒީރު ޝަހީމު ވިދާޅުވެފައިވަނީ، ހާސިންތާ ބޭއްވުމަށް ހަމަޖެހިފައިވަނީ ރާއްޖެ އިސްލާމްވީ ދުވަހުގެ ގޮތުގައި ފާހަގަކުރާ 13 ސެޕްޓެމްބަރު 2026 ގައި ކަމަށެވެ.
މަހާސިންތާގެ އެންމެ ހާއްސަ އެއް ކަމަކީ މައްކާގެ މަސްޖިދުލް ޙަރަމްގެ އިމާމު ފަޟީލަތުއްޝައިޚު ޑރ. ޔާސިރް އައްދައުސަރީ ބައިވެރިވެވަޑައިގަތުންކަން ހާމަކުރައްވާ ޑރ. ޝަހީމް ވިދާޅުވީ ޝައިޚް ޔާސިރަށް މަހާސިންތާއަށް މިހާރު ވަނީ ދައުވަތު އަރުވާފައި ކަމަށެވެ.
މިނިސްޓްރީގެ އަމާޒަކީ އަތޮޅުތަކުގައި ތިބި ޒުވާން ޚަތީބުންނަށް ވެސް މި މަހާސިންތާގައި ބައިވެރިވުމަށް މާލެ އައުމުގެ އިންތިޒާމްތައް ހަމަޖައްސައިދިނުން ކަން ފާހަގަކުރައްވާ ވަޒީރު ވިދާޅުވެފައިވަނީ މި ބައްދަލުވުމުގައި މިނިސްޓްރީން ތަމްރީންކުރާ 1000 ޒުވާން އިމާމުންނާއި ޚަތީބުންގެ އިތުރުން ރާއްޖޭގެ ޒުވާން ހާފިޒުންވެސް ބައިވެރިވާނެ ކަމަށާއި، މިވަގުތު ރާއްޖޭގެ ހާފިޒުންގެ ދަފްތަރުގައި 307 ހާފިޒުން ތިއްބެވިއިރު، ޒުވާން ހަތީބުންގެ އަދަދަކީ 532 ކަމަށެވެ.
މަހާ ސިންތާ ވެގެންދާނީ، ދިވެހިރާއްޖޭގެ ކުރިއަށް އޮތް އިސްލާމީ ގަރުނަށް، ރާއްޖޭގެ އިސްލާމީ ޝިއާރު ފާޅުކުރުމުގެ އިސްދައުރު އަދާކުރާނެ ޒުވާން ހަތީބުންނާއި ހާފިޒުންނަށް މުހިންމު މުނާސަބަތަކަށް ކަމަށްވެސް ޑރ ޝަހީމު ވަނީ ވިދާޅުވެފައެވެ.
މަހާސިންތާއަށް ތައްޔާރުވުމުގެ ގޮތުން އިމާމުކަމުގެ ހެދުންކޮޅާއި ތާކިހާކޮޅު ތައްޔާރުކުރެއްވުމަށް ޒުވާން ހަތީބުންގެ ކިބައިން ވަޒީރު ވަނީ އެދިވަޑައިގެންފައެވެ. އަދި މި މަހާސިންތާގައި ބައިވެރިވާން ބޭނުންވާ ފަރާތްތަކުން ފޯމް ހުށަހެޅުމުގެ ފުރުސަތު މި މަސްތެރޭގައި ހުޅުވާލާނެ ކަމަށްވެސް މިނިސްޓްރީން މަޢުލޫމާތު ދެއެވެ.
ޒުވާން ހަތީބުންނާއި އިމާމުން ތަމްރީންކުރުމަށް ދެއްވާ އަހަންމިއްޔަތުގެ ދަށުން ކުރިއަށްގެންދާ މި މަސައްކަތަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން ރާއްޖޭގެ ދީނީ އޮނިގަނޑު ހަރުދަނާކުރުމަށް ގަދަ އަޅާ މަސައްކަތް ކުރާކަމުގެ އަލި ގަދަ ދަލީލެއްގެ ގޮތުގައި ފާހަގަކޮށްލެވެއެވެ.