އދ. ގެ އިގްތިސާދީ އަދި އިޖުތިމާއީ މަޖިލިސް (އިކޮސޮކް) އިން ދިވެހިރާއްޖެއަށް ލިބުނު ގޮނޑިއަކީ، ތަރައްގީވަމުން އަންނަ ކުދި ޖަޒީރާ ގައުމުތަކުގެ ބޭނުންތަކާއި އިސްކަންދޭ ކަންކަމުގައި ބައިނަލްއަގުވާމީ މައިދާނުގައި ވަކާލާތުކުރުމަށް ލިބުނު ވަރުގަދަ ބާރެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
2027 އިން 2029 އަށް އޮންނަ އިކޮސޮކްގެ ދައުރަށް ރާއްޖެ އިންތިޚާބުވުމާ ގުޅިގެން ދެއްވި މެސެޖެއްގައި ރައީސް ވިދާޅުވީ، މިއީ އދ. ގެ މެންބަރަކަށް ރާއްޖެވިތާ 60 އަހަރުގެ ތާރީޚުގައި މި މަޖިލީހުގެ ގޮނޑިއެއް ރާއްޖެއަށް ކާމިޔާބު ކުރެވުނު ފުރަތަމަ ފަހަރު ކަމަށެވެ. އެހެންކަމުން މިއީ ގައުމީ ތާރީޚުގައި ފާހަގަކޮށްލެވޭ ފަޚުރުވެރި ކާމިޔާބީއެއްގެ ގޮތުގައި އެމަނިކުފާނު ވަނީ ސިފަކުރައްވާފައެވެ.
ރައީސް މުއިއްޒު ފާހަގަކުރެއްވި ގޮތުގައި، މި އިންތިޚާބުން ރާއްޖެއަށް ލިބުނު ކާމިޔާބީއަކީ ބައިނަލްއަގުވާމީ މުޖުތަމައުގައި ރާއްޖެއަށް އޮތް އިތުބާރު ހާމަކޮށްދޭ ކަމެކެވެ. ރާއްޖެއަކީ ކުދި ޖަޒީރާ ގައުމަކަށްވުމުން، މޫސުމީ ނުރައްކާތަކާއި އިގްތިސާދީ ގޮންޖެހުންތަކުގެ އިތުރުން ތަރައްގީއަށް ހުރި ހުރަސްތައް ވަރަށް ބޮޑަށް އިހުސާސްކުރެވޭ ކަމަށާއި، މި ގޮނޑީގެ އެހީގައި އެފަދަ ގައުމުތަކުގެ އުންމީދުތައް ހާސިލުކޮށްދިނުމަށް މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ.
މީގެއިތުރުން، ދުނިޔޭގެ އެހެން ގައުމުތަކާ ގުޅިގެން ދެމެހެއްޓެނިވި ތަރައްގީގެ ލަނޑުދަނޑިތަކަށް ވާސިލުވުމަށާއި، އިންސާފުވެރި މާލީ ނިޒާމެއް ބިނާކުރުމުގައި ރާއްޖެއިން އިސްދައުރެއް އަދާކުރާނެ ކަމުގެ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ. އިކޮސޮކް މެދުވެރިކޮށް ގައުމުތަކުގެ ކުރިމަގު އުޖާލާކުރުމަށް އަމަލީ ގޮތުން ރާއްޖެއިން މަސައްކަތް ކުރާނެ ކަމަށްވެސް އެމަނިކުފާނު ވިދާޅުވިއެވެ.