މާތްﷲއަށް އީމާންވުމާއި، ހެޔޮކަންތަކަށް އަމުރުކުރުމާއި، ނުބައިކަންތައް ނަހީކުރުމަކީ އިސްލާމްދީނުގެ އަސާސީ އުސޫލުތަކުގެ ތެރޭގައި ހިމެނޭ ކަންކަން ކަމަށާއި، މިއީ މުޖުތަމައު ރައްކާތެރިކުރުމަށްޓަކައި ކޮންމެހެން ކުރަންޖެހޭ މަސައްކަތެއްކަމަށް މިއަދުގެ ހުކުރު ހުތުބާގައި ބުނެފިއެވެ. ހުތުބާގައި ބަޔާންކޮށްފައިވާ ގޮތުގައި، މީސްތަކުންނަށްޓަކައި ނެރުއްވި އެންމެ ހެޔޮ އުންމަތުގެ ސިފައަކީ ހެޔޮކަންތަކަށް އަމުރުކޮށް ނުބައިކަންތައް ނަހީކުރުމެވެ.
ހުތުބާގައި ބުނީ، ހެޔޮކަންތަކަށް އަމުރުކުރުމާއި ނުބައިކަންތައް ނަހީކުރުމަކީ މާތްﷲ ބާރާއި ވެރިކަން ދެއްވާފައިވާ މީހުންގެ މައްޗަށް އޮތް އެންމެ އިސް ވާޖިބުތަކުގެ ތެރޭގައި ހިމެނޭ ކަމެއް ކަމަށެވެ. ހަމައެފަދައިން، ކޮންމެ ފަރުދަކުވެސް އެމީހެއްގެ ކުޅަދާނަކަން ހުރި މިންވަރަކުން މި ޒިންމާ އަދާކުރަންޖެހޭނެ ކަމަށް ހުތުބާގައި ހަނދާންކޮށްދިނެވެ. މިކަމާ ގުޅޭގޮތުން ރަސޫލާ (ޞައްލަﷲ ޢަލައިހި ވަސައްލަމަ) ގެ ހަދީޘްފުޅެއްގައިވަނީ: “ތިޔަބައިމީހުންގެ ތެރެއިން ނުބައިކަމެއް ފެނިއްޖެ މީހާ، ފަހެ އޭނާގެ އަތުން އެކަން ބަދަލުކުރާހުށިކަމެވެ. އެކަމަށް ކުޅަދާނަވެގެން ނުވާނަމަ، އޭނާގެ ދުލުންނެވެ. އެކަމަށްވެސް ކުޅަދާނަވެގެން ނުވާނަމަ، އޭނާގެ ހިތުންނެވެ.”
މިއަދު ރާއްޖޭގެ އިޖުތިމާއީ އަދި އަހުލާގީ ހާލަތަށް ބަލާއިރު، އިސްލާހުކުރަންޖެހޭ ގިނަ ދާއިރާތަކެއް ހުރިކަން ހުތުބާގައި ފާހަގަކުރިއެވެ. ހާއްސަކޮށް، މީހުންގެ ފުރާނައާއި، މުދަލާއި، އަބުރު ރައްކާތެރިކުރުމަށް މަސައްކަތް ކުރަންޖެހޭ ކަމަށާއި، މިފަދަ މައްސަލަތައް ހައްލުކުރެވޭނީ އިޖުތިމާއީ ޒިންމާ އަދާކޮށްގެން ކަމަށް ބުނެފައިވެއެވެ. އަލްއިމާމް އަލްޣަޒާލީގެ ބަސްފުޅަކާ ހަވާލާދީ ހުތުބާގައި ބުނީ، މި ވާޖިބަށް އިހުމާލުވެއްޖެނަމަ މަގުފުރެދުމާއި ފަސާދަ އާންމުވެ، މުޅި އިންސާނިއްޔަތު ހަލާކާ ކުރިމަތިލާންޖެހިދާނެ ކަމަށެވެ.
އަހުލާގީ ގޮތުން ސާލިޙު ޖީލެއް ބިނާކުރުމަށްޓަކައި ހުރިހާ ފަރާތްތަކަކުން އަތްގުޅާލުމަށް ހުތުބާގައި ގޮވާލިއެވެ. މީގެ ތެރޭގައި މައިންބަފައިން ދަރިން ހެޔޮގޮތުގައި ތަރުބިއްޔަތު ކުރުމާއި، މުދައްރިސުން ނަމޫނާ ބަޔަކަށް ވުމާއި، ދީނީ އިލްމުވެރިން ހެޔޮ ނަސޭހަތް ދިނުން ހިމެނެއެވެ. އަދި ވެރިންނާއި ނުފޫޒުގަދަ ފަރާތްތަކުން ގައުމުގެ އާންމު މަސްލަހަތަށް އިސްކަންދިނުމަކީ އަމާން އަދި ތަހުޒީބު މުޖުތަމައެއް ބިނާކުރުމަށް ކޮންމެހެން ބޭނުންތެރި ކަމެއް ކަމަށްވެސް ހުކުރު ހުތުބާގައި ބަޔާންކުރިއެވެ.