ދިވެހިރާއްޖޭގެ ތިމާވެށި ރައްކާތެރިކޮށް، ގައުމުގެ ފެހިކަން ދެމެހެއްޓުމަށްޓަކައި ގަސް އިންދުމަކީ ކޮންމެހެން ބޭނުންތެރި ކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ. ސަރުކާރުން ފަށާފައިވާ ފަސް މިލިއަން ގަސް އިންދުމުގެ ބޮޑު މަޝްރޫއުގައި ޒުވާނުންގެ ބައިވެރިވުން އިތުރުކުރުމަށް އެމަނިކުފާނު ވަނީ ބާރުއަޅުއްވައި ހިތްވަރު ދެއްވާފައެވެ.
މި މަޝްރޫއަކީ 5 ޖޫން 2024 ގައި ރައީސްގެ ފަސް އަހަރުގެ ދައުރުގެ ތެރޭގައި ފުރިހަމަކުރުމަށް ފެށި މަސައްކަތެކެވެ. މިވީ ދެ އަހަރުގެ ތެރޭގައި ރާއްޖޭގެ އެކި ހިސާބުތަކުގައި 1.5 މިލިއަނަށް ވުރެ ގިނަ ގަސް މިހާރު ވެސް ވަނީ އިންދާފައެވެ. ސަރުކާރުގެ ރޭވުމަކީ މިއަހަރުގެ ތެރޭގައި އެއް މިލިއަން ގަސް، އަންނަ އަހަރު 1.5 މިލިއަން ގަސް، އަދި 2028 ވަނަ އަހަރުގެ ނިޔަލަށް އިތުރު އެއް މިލިއަން ގަސް އިންދައި ނިންމުމެވެ.
ރައީސް އޮފީހުން އަލަށް ފެށި “ދަ ޕަލްސް” ޕޮޑްކާސްޓްގެ ފުރަތަމަ ބައިގައި ވާހަކަފުޅު ދައްކަވަމުން ރައީސް ވިދާޅުވީ، ގައުމު ފެހިކުރުމުގެ މި ހަރަކާތުގައި ޒުވާނުން އަމަލީގޮތުން ބައިވެރިވުމަށް ދައުވަތު އަރުވާ ކަމަށެވެ. “ޒުވާނުން އިންދާ ގަސްތައް ވެސް މި މަޝްރޫއުގެ ތަފާސްހިސާބުތަކުގައި ހިމަނާނެ،” ކަމަށް ވިދާޅުވެ، އެންވަޔަރަމަންޓް މިނިސްޓްރީއާ ގުޅިގެން މިކަމުގައި ކުރިއަށް ދިއުމަށް އެމަނިކުފާނު އެދިވަޑައިގަތެވެ.
ތަރައްގީގެ އެކި މަޝްރޫއުތައް ހިންގާއިރު ވެސް ތިމާވެށީގެ ފެހިކަމަށް ހާއްސަ ސަމާލުކަމެއް ދެއްވާކަން ފާހަގަކުރައްވަމުން، ބޮޑުތަކުރުފާނު މަގު ތަރައްގީކުރުމުގެ މަސައްކަތް ރައީސް މިސާލެއްގެ ގޮތުގައި ދެއްކެވިއެވެ. އެމްޓީސީސީއާ ހަވާލުކޮށްގެން ކުރިއަށްދާ އެ މަސައްކަތުގައި، ކުރިއަށް ވުރެ ބޮޑަށް އެ ސަރަހައްދު ފެހިކޮށް، ގިނަ އަދަދެއްގެ ގަސް އިންދުމަށް ވަނީ ރޭވިފައެވެ.
ރައީސް އިތުރަށް ވިދާޅުވީ، އަމާޒަކީ މަގުތަކުގައި “ގްރީން ބެލްޓް” އެއް ނުވަތަ ފެހި ސަރަހައްދެއް އުފެއްދުން ކަމަށެވެ. ބިންމަތީގައި އިންދާ ގަސްތަކުގެ އިތުރުން، ބޮޑެތި މާޕޮޓްތަކުގައި ގަސް ބަހައްޓައިގެން ނަމަވެސް ކުރިއަށް ވުރެ ބޮޑަށް މާލެތެރެ ފެހިކޮށް، ހިތްގައިމު މާހައުލެއް ބިނާކުރުމަކީ ސަރުކާރުގެ މަގްސަދެކެވެ. މިކަމުގައި އާންމުންގެ އެއްބާރުލުން ލިބިއްޖެނަމަ ބޮޑު ބަދަލެއް ފެންނާނެ ކަމަށް އެމަނިކުފާނު ވިދާޅުވިއެވެ.
ބައެއް ރަށްރަށާއި ސިޓީތަކުގައި ފެހިކަން މަދުވަނީ ތަރައްގީގެ މަޝްރޫއުތަކުގެ ސަބަބުން ކަމަށް ވިޔަސް، ގިނަ ގަސް އިންދައިގެން އެކަން ހައްލުކުރެވޭނެ ކަމުގެ ޔަގީންކަން ރައީސް ދެއްވިއެވެ. ކުރިއަށް އޮތް އަހަރުތަކުގައި ކަނޑައެޅިފައިވާ އަމާޒަށް ވާސިލްވުމަށްޓަކައި، ކޮންމެ ރައްޔިތަކު ވެސް އަމިއްލަ އިސްނެގުމާއެކު މި މަސައްކަތުގައި ބައިވެރިވުމަށް އެމަނިކުފާނު ގޮވާލެއްވިއެވެ.