މިސަރުކާރުން މަޝްރޫޢުތައް ކުރިއަށް ގެންދަނީ ތަރައްޤީއާއި ތިމާވެށި ގުޅިލާމެހިގެންދާނެ ގޮތަކަށް ކަމަށާއި، މީގެ ސަބަބުން ތިމާވެށި ޙިމާޔަތްކުރުމުގައި ދުނިޔޭގެ އެހެން ޤައުމުތަކަށް ނަމޫނާ ދައްކާނެ ޤައުމަކަށް ރާއްޖެވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރައީސް އޮފީހުން ގެނެސްދޭ “ދަ ޕަލްސް” ޕްރޮގްރާމުގައި ވާހަކަފުޅު ދައްކަވަމުންނެވެ.
ކުރިއަށް އޮތް ދެ އަހަރު ދުވަހުގެ ތެރޭގައި ހާސިލުކުރަން ބޭނުންވާ މުހިންމު ލަނޑުދަނޑިތަކަށް އަލިއަޅުއްވާލައްވަމުން ރައީސް ވިދާޅުވީ، ރާއްޖޭގެ މީހުން ދިރިއުޅޭ ހުރިހާ ރަށެއްގައި ޒަމާނީ ކުނިކޮށިތައް ޤާއިމުކުރުމާއި، ގޮނޑުދޮށްތައް ޙިމާޔަތްކުރުމަކީ ސަރުކާރުގެ ބޮޑު އަމާޒެއް ކަމަށެވެ. މީގެ އިތުރުން ރާއްޖެ ފެހިކުރުމުގެ ބޮޑު މަޝްރޫޢެއް ނިންމުމާއި، އިޔާދަކުރަނިވި ހަކަތައިގެ 33 އިންސައްތައިގެ އަމާޒު ހާސިލްކުރުމަށް މަސައްކަތް ކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
ބިން ހިއްކުމުގެ މަޝްރޫޢުތަކާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ބިން ހިއްކުމަކީ ތަރައްޤީގެ މަޝްރޫޢުތައް ކުރިއަށް ގެންދިއުމަށް ކޮންމެހެން ބޭނުންތެރި ކަމެއް ކަމަށެވެ. ނަމަވެސް އެ މަސައްކަތްތައް ކުރިއަށްދާނީ ތިމާވެށި ޙިމާޔަތްކުރެވޭނެ ފަދަ ގޮތަކަށް ކަމަށް އެމަނިކުފާނު ފާހަގަކުރެއްވިއެވެ.
“އަޅުގަނޑު ދެންނެވި ގޮތަށް ބިން ހިއްކުމަކީ، ތަރައްޤީގެ މަޝްރޫޢުތައް ކުރިއަށް ގެންދިއުމަށް ކުރިއަށްގެންދާ ކަމެއް. ތަރައްޤީއާއެކީގައި ތިމާވެށި ޙިމާޔަތްވާން ޖެހޭ. މިސާލަކަށް އަޅުގަނޑުމެން ރަސްމާލެ ހިއްކާއިރުގައި އަޅުގަނޑުމެން އެބަ ހިންގަން މުރަކަ އާލާކުރުމުގެ ޕްރޮގްރާމުތައް އަދި އެހެންތަނެއްގައި މުރަކަ އިންދުމާއި، އެހެންގޮސް ތަރައްޤީއާއި ތިމާވެއްޓާއި އެކުއެކީގައި ގުޅިލާމެހިގެންދާނެ ގޮތަކަށް އަޅުގަނޑުމެން މި މަޝްރޫޢުތައް ކުރިއަށް ގެންދަން ބޭނުންވަނީ.” ރައީސް
މީގެ އިތުރުން، ބިން ހިއްކުމުގެ ސަބަބުން އެންވެރިކަމަށް ކުރާ އަސަރުތަކަށް ރިޢާޔަތްކޮށް، އެންވެރިކަން ނުގެއްލޭނެ ފަދަ ގޮތަކަށް އިޔާދަ ކުރެވޭނެ ޕްރޮގްރާމުތައް ހިންގުމަކީވެސް ސަރުކާރުގެ އަމާޒެއް ކަމަށް ރައީސް ވިދާޅުވިއެވެ. އެމަނިކުފާނު ފާހަގަކުރެއްވި ގޮތުގައި މި ސަރުކާރުން ތިމާވެށީގެ ވާހަކަ ދައްކަނީ ނަތީޖާ ނެރެވޭނެ އަދި ވަށާޖެހޭ ނިޒާމެއްގެ ތެރެއިންނެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލެއްވީ، ކުރިއަށް އޮތް އަހަރުތަކުގައި ކަނޑައެޅިފައިވާ ތިމާވެށީގެ ލަނޑުދަނޑިތައް ހާސިލްކޮށް، ރާއްޖެއަކީ ތިމާވެށި ޙިމާޔަތްކުރުމުގައި ދުނިޔެއަށް ނަމޫނާ ދައްކާނެ ޤައުމަކަށް ހައްދަވާނެ ކަމުގެ ޔަޤީންކަން ދެއްވަމުންނެވެ.