ކީރިތި ގުރުއާން ކިޔެވުމުގެ 38 ވަނަ ގައުމީ މުބާރާތުގައި ބައިވެރިވުމަށް އެދޭ ފަރާތްތަކަށް ބާއްވާ އޮޑިޝަންތައް މިއަދު މުޅި ރާއްޖޭގައި ވަނީ ފަށާފައެވެ. އިސްލާމީ ކަންތައްތަކާ ބެހޭ ވުޒާރާއިން އިންތިޒާމުކުރާ މި މުބާރާތުގެ އޮޑިޝަން ބުރުތައް ކުރިއަށް ގެންދިއުމަށް ހަމަޖެހިފައިވަނީ އަތޮޅުތައް ވަކިވަކި ސަރަހައްދުތަކަކަށް ބަހާލައިގެންނެވެ.
އެ ވުޒާރާއިން އާންމުކޮށްފައިވާ ތާވަލާ އެއްގޮތަށް، މިއަދާއި މާދަމާ އޮޑިޝަންތައް ކުރިއަށްދާނީ ހއ. ދިއްދޫ، ހއ. ހޯރަފުށި، ކުޅުދުއްފުށި ސިޓީ، ށ. ފުނަދޫ އަދި ނ. މަނަދޫގައެވެ. މީގެ އިތުރުން މި މަހުގެ 12 އާއި 13 ގައި ރ. އުނގޫފާރު، ބ. އޭދަފުށި، ޅ. ނައިފަރު، އއ. ރަސްދޫ އަދި އދ. މަހިބަދޫގައި އޮޑިޝަންތައް ބޭއްވުމަށް ވަނީ ތާވަލުކުރެވިފައެވެ.
މުބާރާތުގެ އޮޑިޝަންތައް ކުރިއަށްދާނެ އިތުރު ދުވަސްތަކަށް ބަލާއިރު، ޖޫން 19 އާއި 20 ގައި ވ. ފެލިދޫ، މ. މުލި، ފ. ނިލަންދޫ، ދ. ކުޑަހުވަދޫ އަދި ތ. ވޭމަންޑޫގައި އޮޑިޝަންތައް އޮންނާނެއެވެ. އަދި ޖޫން 26 އާއި 27 ގައި ލ. ފޮނަދޫ، ގއ. ވިލިނގިލި، ތިނަދޫ ސިޓީ، ފުވައްމުލައް ސިޓީ، އައްޑޫ ސިޓީ ހިތަދޫ އަދި މީދޫގައި އޮޑިޝަންތައް ކުރިއަށްދާނެއެވެ.
ކ. އަތޮޅުގެ ރަށްތަކަށް ހާއްސަ އޮޑިޝަންތައް ޖުލައި 3 އާއި 4 ގައި މާލޭގައި ބޭއްވުމަށް ހަމަޖެހިފައިވާއިރު، މާލެ ސިޓީގެ ބައިވެރިންނަށް ހާއްސަ އޮޑިޝަންތައް ކުރިއަށްދާނީ ޖުލައި 5 އިން 11 އަށެވެ.
އިސްލާމީ ކަންތައްތަކާ ބެހޭ ވުޒާރާއިން މައުލޫމާތު ދެއްވާ ގޮތުގައި، މިއަހަރުގެ ގައުމީ ގުރުއާން މުބާރާތަށް ވަނީ ވަރަށް ބޮޑު ތަރުހީބެއް ލިބިފައެވެ. އެގޮތުން މިފަހަރުގެ މުބާރާތުގައި ރާއްޖޭގެ އެކި ކަންކޮޅުތަކުން ޖުމްލަ 3053 ބައިވެރިން ބައިވެރިވެފައިވެއެވެ.