ކުރު ރާސްތާގައި ރާއްޖެއަށް ދަރަނި ނުދެއްކުމުގެ ހިރާސްތައް ވަނީ ކުޑަކުރެވިފައިވާ ކަމަށާ އެހެންކަމުން ކްރެޑިޓު ރޭޓިން ދަށްކުރުން ނާދިރު ކަމަށް ފިނޭންސް މިނިސްޓްރީއިން ހާމަކުރައްވައިފިއެވެ.
އެ މިނިސްޓްރީގެ ޑެޕިއުޓީ މިނިސްޓަރު އަހުމަދު ސާއިދު މުސްތަފާ، ފިޗް ރޭޓިން ރިޕޯޓާ ގުޅޭ ގޮތުން ދައުލަތުގެ މީޑިއާގައި ވާހަކަ ދައްކަވަމުން ވިދާޅުވެފައިވަނީ، ކުރު ރާސްތާގައި ރާއްޖެއަށް ދަރަނި ނުދެއްކުމުގެ ހިރާސްތައް ކުޑަކުރެވިފައިވާ ކަމަށާއި އެއީ އާމްދަނީ ހޯދުމުގައި ގެނެސްފައިވާ އިސްލާހުތަކުގެ ސަބަބުން ކަމަށް ފިޗުން ބުނެފައިވާ ކަމަށެވެ. އަދި މެދު ރާސްތާއަށް ބަލާއިރު ވެސް އިގުތިސާދު ކުރިއަރާނެ ކަމަށް އެ އިދާރާއިން ލަފާކޮށްފައިވާ ކަމަށެވެ.
މި އަހަރަކީ އީރާން ހަނގުރާމައާ ގުޅިގެން މުޅި ދުނިޔެއަށް ވެސް އަސަރު ކުރަމުން އަންނަ އަހަރަކަށްވުމުން ރާއްޖޭގެ އިގުތިސާދު ވެސް މީގެ ކުރިން އަންދާޒާ ކުރި ވަރަށް ކުރިނޭރުމަކީ އެކަށީގެންވާ ކަމެއް ކަމެއްކަން ފާހަގަކުރައްޗާ ސާއިދު އިތުރަށް ވިދާޅުވެފައިވަނީ، ނަމަވެސް އެ ހާލަތުން އަރައިގަނެވުމުން ރާއްޖެ ވަރަށް އަވަހަށް ކުރިއަރާނެ ކަމަށް ފިޗުގެ ރިޕޯޓުގައިވާ ކަމަށެވެ.
މި ސަރުކާރުން އަންދާޒާކޮށްފައިވަނީ ވެސް އެގޮތަށްކަން ފާހަގަކުރައްވައި ސާއިދު ވިދާޅުވެފައިވަނީ ދައުލަތުގެ ހަރަދު ކޮންޓްރޯލްކޮށް، ރާވައިގެން ކުރިއަށް ގެންދިއުމުގެ މުހިއްމު ކަމަށް ފިޗުން އަލިއަޅުވާލި ކަމަށެވެ. ރޭޓިން ދެން ދަށްކުރާނެ ކަމަށް ބުނެފައިވަނީ ދަރަނި އަދާކުރުމުގައި ދަތިވެއްޖެ ނަމަ ކަމަށް ވެސް ފިޗުގެ ރިޕޯޓުގައި ބުނެފައިވާ ކަމަށް ވެސް ސާއިދު ވިދާޅުވެފައިވެއެވެ.