ހައްޖުގެ މަތިވެރި އަޅުކަން އަދާކުރުމަށްފަހު، ދިވެހި ޙައްޖުވެރިންގެ ދެވަނަ ގްރޫޕް ރާއްޖެއަށް އައުމަށް ސައުދީ އަރަބިއްޔާއިން ފުރައިފިއެވެ. މަދީނާ އެއަރޕޯޓުން ފުރި މި ގްރޫޕްގައި ޖުމްލަ 262 ޙައްޖުވެރިން ދަތުރުކުރެއެވެ.
މިފަހަރުގެ ޙައްޖުވެރިން ރާއްޖެ ގެނައުމުގެ ދަތުރުތައް ކުރިއަށްގެންދަނީ ސައުދިއާ އެއަރލައިންގެ އިތުރުން ގައުމީ އެއަރލައިން، މޯލްޑިވިއަން މެދުވެރިކޮށެވެ. ދެވަނަ ފްލައިޓްގައި ޙައްޖުވެރިން ރާއްޖެއަށް ދަތުރުކުރަނީ މޯލްޑިވިއަންގެ ފްލައިޓެއްގައެވެ.
ޙައްޖުވެރިންނަށް ދަތުރުގެ ކަންކަން ލުއިފަސޭހަކޮށްދިނުމުގެ ގޮތުން މޯލްޑިވިއަންއިން ވަނީ ޚާއްޞަ އިންތިޒާމްތަކެއް ހަމަޖައްސާފައެވެ. އެގޮތުން ޙާޖީން އެއަރޕޯޓަށް ދިޔުމުގެ ކުރިން ލަގެޖްތައް ޕްރީ-ޗެކިންކޮށް، ބޯޑިން ޕާސްތައްވެސް ވަނީ ކުރިއާލާ ހަވާލުކޮށްފައެވެ. މިއީ ޙައްޖުވެރިން އެއަރޕޯޓުގައި ހޭދަކުރަންޖެހޭ ވަގުތު ކުޑަކުރުމަށް ކުރެވުނު މަސައްކަތެކެވެ.
ޙައްޖުވެރިންގެ ފުރަތަމަ ފްލައިޓް ރާއްޖެ އައިސްފައިވަނީ ނިމިދިޔަ ހުކުރު ދުވަހުގެ ރޭގައެވެ. އެ ފްލައިޓުގައި 240 އަށްވުރެ ގިނަ ޙާޖީން ރާއްޖެ އައިސްފައިވާއިރު، ބާކީ ތިބި ޙައްޖުވެރިން ރާއްޖެ ގެނައުމަށް ހަމަޖެހިފައިވާ ފަހު ފްލައިޓްތައް އޮންނާނީ ކުރިއަށް އޮތް ހޯމަ އަދި އަންގާރަ ދުވަހުއެވެ.
މިއަހަރުގެ ޙައްޖު ދަތުރުގައި ދިވެހި ޙައްޖުވެރިންނަށް ބޮޑެތި ލުއިފަސޭހަތަކެއް ލިބިފައިވެއެވެ. އެގޮތުން “މައްކާ ރޫޓް އިނީޝިއޭޓިވް” ގެ ދަށުން ރާއްޖެއިން އިމިގްރޭޝަންގެ ހުރިހާ ކަމެއް ނިންމައިގެން ދަތުރުކުރުމުގެ ފުރުސަތު ލިބުނެވެ. މީގެ ސަބަބުން ޖިއްދާ އެއަރޕޯޓުގައި މަޑުކުރަން ނުޖެހި، ސީދާ ހޮޓަލަށް ދިޔުމުގެ މަގު ފަހިވެގެންދިޔައެވެ.
ޙައްޖު ކޯޕަރޭޝަންގެ ފަރާތުން ޙާޖީންގެ ދަތުރުފަތުރާއި އެހެނިހެން އިންތިޒާމްތައް ވަރަށް ފުރިހަމައަށް ރާވާފައިވާކަން ފާހަގަކުރެވެއެވެ. މިއަހަރު ރާއްޖެއިން ގިނަ އަދަދެއްގެ މީހުން ޙައްޖުގެ އަޅުކަން އަދާކުރުމަށް ސައުދީ އަރަބިއްޔާއަށް ދަތުރުކުރިއެވެ.