ކުންފުނީގެ ތެރެއިން މާޒީގައި ހިނގާފައިވާ ޒިންމާދާރުކަން ކުޑަ އަމަލުތައް ތަކުރާރުވިޔަ ނުދިނުމަކީ މި ސަރުކާރުގެ އެންމެ ބޮޑު އެއް އަމާޒުކަމަށް، ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުހައްމަދު އަފީފު ހުސެއިން ވިދާޅުވެއްޖެއެވެ.
އޭނާ މިފަދައިން ވިދާޅުވެފައިވަނީ، ދައުލަތުގެ މީޑީޔާ، ޕީއެސްއެމްގެ، “ރާއްޖެ މިއަދު” ޕްރޮގްރާމުގައި ވާހަކަ ދައްކަވަމުންނެވެ. އަފީފު ވިދާޅުވީ، ކުންފުނީގެ މާލީ ހާލަތު ރަނގަޅުކޮށް، ހިދުމަތްތައް މެދުނުކެނޑި ކުރިއަށް ގެންދިއުމަށްޓަކައި މިހާރު އޮތް ޕްރޮކިއުމެންޓް އުސޫލުތައް އިތުރަށް ހަރުދަނާކުރަން ޖެހިފައިވާ ކަމަށެވެ.
ހަމަ އެހެންމެ ކުންފުނިން ހިންގާ މުއާމަލާތްތަކަކީ މާލިއްޔަތު ޤަވާއިދާ އެއްގޮތަށް ކުރެވޭ މުއާމަލާތްކަން ކަށަވަރުކުރަންޖެހޭ ކަމަށާ ދައުލަތުގެ ކުންފުނިތަކުން މާލިއްޔަތު ޤާނޫނާއި އެއްގޮތަށް އަމަލުކުރުން ލާޒިމް ނުކުރާ ނަމަވެސް، އެކުންފުނީގެ ޕްރޮކިއުމެންޓް ޕޮލިސީއަކީ ހަރުދަނާ ޕޮލިސީއަކަށް ވާންޖެހޭ ކަމަށް ވެސް އަފީފު ވަނީ ވިދާޅުވެފައެވެ.
އެގޮތުން ކުންފިނީގެ އެކި އެކި ބޭނުމަށް ފެންވަރު ރަނގަޅު ސާމާނު ހޯދަން އެންމެ އެކަށީގެންވާ ފަރާތްތަކާއި ހަވާލުކުރެވޭކަން ޔަގީންކުރުމުގެ މުހިއްމުކަން ފާހަގަކުރައްވާ އަފީފު ވަނީ ނަމަވެސް މާޒީގައި އެގޮތަށް މަސައްކަތް ކުރުމުން ކުންފުންޏަށް ފައިދާވާން އޮވެމެ ގެއްލުންވާ ގޮތަށް ކަންކުރެވިފައި ހުރިކަން ވެސް ސަމާލުކަމަށް ގެންނަވާފައެވެ.
ރަށްރަށުގައި އެ ކުންފުނީގެ ދަށުން ހިންގާ އިންޖީނުގެތަކަށް ބޭނުންވާ ސްޕެއާ ޕާޓްސް ފަދަ ތަކެތި ހޯދުމުގައި ދިމާވާ ދަތިތަކަށް ދާއިމީ ހައްލެއް ހޯދުމަށް މަސައްކަތް ކުރަމުންދާ ކަމަށާ ކުއްލި ހާލަތްތަކުގައި ތަކެތި ހޯދުމުގެ ބަދަލުގައި، ދުރާލާ ރޭވިގެން ތަކެތި ގެނެސް ރައްކާކުރެވޭނެ އިންތިޒާމެއް ހަމަޖެއްސުމަށް ރާވާފައިވާ ކަން ވެސް އަފީފު ވަނީ ހާމަކުރައްވާފައެވެ.
ނަމަވެސް އެކަމުގައި ވެސް ދަތިތަކެއް ހުރިކަން ފާހަގަކުރައްވާ އަފިފު ވަނީ ފެނަކައިގެ އައު އިމާރާތް ނިމި ބޭނުންކުރަން ފެށުމުން އެކަމަށް ހައްލު ލިބިގެން ދާނެ ކަން ފާހަގަކުރައްވާފައެވެ. އައު އިމާރާތާއެކު ތަކެތި ރައްކާކުރާނެ އެކަށީގެންވާ ޖާގަ ލިބި، އިންވެންޓްރީ މެނޭޖްކުރުމަށް ބޮޑެތި ފަސޭހަތަކެއް ލިބިގެންދާނެ ކަމަށް އޭނާ ވިދާޅުވިއެވެ.
ފެނަކައިގެ ޕްރޮކިއުމެންޓް ނިޒާމަށް މި ގެނެވޭ ބަދަލަކީ ކުންފުނީގެ ދަރަނި ކުޑަކޮށް، ރައްޔިތުންނަށް ދޭ ހިދުމަތުގެ ފެންވަރު މަތިކުރުމަށް އެޅޭ މުހިންމު ފިޔަވަޅެއްގެ ގޮތުގައި އަފީފު ވަނީ ފާހަގަކުރައްވާފައެވެ.
ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކޮށް، އިސްރާފު ކުޑަކުރުމަށް ގިނަ ފިޔަވަޅުތަކެއް ސަރުކާރުން މިހާރު ގެންދަވަނީ އަޅުއްވަމުންނެވެ.