އައު ހިޖުރީ އަހަރެއް ފެށިގެންދާއިރު، ރަސޫލާ (ޞައްލަﷲ ޢަލައިހި ވަސައްލަމަ) މައްކާއިން މަދީނާއަށް ކުރެއްވި ހިޖުރައާ މެދު ފުންކޮށް ފިކުރުކުރުމަކީ މުނާސަބު ކަމެއްކަމަށް މިއަދުގެ ޚުޠުބާގައި ބުނެފިއެވެ. ހިޖުރައިގެ އެންމެ މަތިވެރި މާނައަކީ ނުބައިކަންތައްތައް ދޫކޮށް، ސީދާވެގެންވާ ތެދުމަގަށް ރުޖޫޢަވުންކަން ފާހަގަކޮށް، މާތް ﷲ ނުރުހުންތެރިވެވޮޑިގަންނަވާ ކަންތައްތައް ދޫކޮށްލުމަށް މިއަދުގެ ހުތުބާގައި ވަނީ ނަސޭޙާތްތެރިވެފައެވެ.
ކީރިތި ރަސޫލާ (ޞައްލަﷲ ޢަލައިހި ވަސައްލަމަ) އިސްލާމްދީނުގެ ދިފާޢުގައި ކުރެއްވި މަތިވެރި ޤުރުބާނީގެ މައްޗަށް އަލިއަޅުވާލަމުން، އެކަލޭގެފާނު އުފަންވި ރަށް ދޫކުރައްވައި ކުރެއްވި ދަތުރުފުޅަކީ ދީނަށްޓަކައި ދުނިޔަވީ ހުރިހާ ގުޅުންތަކެއް ޤުރުބާން ކުރެއްވި ނަމޫނާއެއްކަމަށް ހުތުބާގައި ބުންޏެވެ. މީގެ އިތުރުން، އުއްމު ސަލަމާ (ރަޟިޔަﷲ ޢަންހާ) އާއި ޞުހައިބު އައްރޫމީ (ރަޟިޔަﷲ ޢަންހު) ފަދަ ބޭކަލުން ދީނަށްޓަކައި އާއިލާއާއި މުދާ ގުރުބާންކުރެއްވިކަން ހުތުބާގައި ވަނީ ހާމަކޮށްފައެވެ.
ހިޖުރައިގެ ހާދިސާއިން ލިބޭ އެންމެ މުހިންމު އެއް ފިލާވަޅަކީ ފުރިހަމަ ރޭވުންތެރިކަން ކަމުގައި ހުތުބާގައި ބުންޏެވެ.
އަބޫބަކުރުގެފާނު ދަތުރަށް ތައްޔާރުވެވަޑައިގަތުމާއި، ޢަލީގެފާނު ރަސޫލާގެ ދާންކޮޅުގައި ނިދިކުރެއްވުމާއި، އަދި އަސްމާގެފާނާއި ޢަބްދުﷲ ބިން އަބީ ބަކުރު ކުރެއްވި މަސައްކަތްޕުޅުތަކަކީ ކާމިޔާބީގެ ބިންގާ ކަމުގައިވާ ރޭވުންތެރިކަމުގެ މިސާލުތައްކަމަށް ހުތުބާގައި ހާމަކޮށްފައިވެއެވެ.
ދަތި އުނދަގޫ ވަގުތުތަކުގައި ﷲ އަށް ވަކީލުކުރުމާއި ސާބިތުކަން ދެއްކުމުގެ މުހިންމުކަން ފާހަގަކުރަމުން، ޘައުރު ފަރުބަދައިގެ ހޮހަޅައިގައޮ ރަސޫލާ ﷺ ވިދާޅުވި ބަސްފުޅު ހުތުބާގައި ހަނދާންކޮށްދިނެވެ. “ކަލޭގެފާނު ހިތާމަނުކުރައްވާށެވެ! ހަމަކަށަވަރުން، ﷲ ވޮޑިގެންވަނީ ތިމަންމެންނާ އެކުގައެވެ.” މިފަދަ ބަސްފުޅުތަކުން އިބުރަތް ލިބިގަނެ، ކޮންމެ ވަގުތެއްގައިވެސް އިސްލާމްދީނުގެ މަގުގައި ސާބިތުވެ ތިބުމަށް ހުތުބާގައި ވަނީ ނަސޭޙާތްތެރިވެފައެވެ.
ޚުޠުބާ ނިންމާލަމުން، ހިޖުރައިގެ ސަބަބުން މަދީނާގައި ފުރަތަމަ އިސްލާމީ ދައުލަތުގެ ބިންގާ އެޅިގެންދިޔަކަން ފާހަގަކޮށް، ތަވައްކަލް ކުރުމަކީ މަސައްކަތް ކުރުމާއެކު ﷲ އަށް ވަކީލުކުރުންކަން ވަނީ ހާމަކޮށްފައެވެ. އަދި އިސްލާމްދީނުގެ މަތީގައި އަޅަމެންގެ ހިތްތައް ސާބިތުކޮށްދެއްވުމަށް އެދި ދުޢާކުރުމަށް ހުތުބާގައި ބުންޏެވެ.