ތައިލެންޑުގެ ރަސްގެފާނު މަހާ ވަޖިރަލޮންގްކޯންގެ ދަރިކަނބަލުން ބަޖްރަކިތިޔާބާ ނަރެންދިރާ ދެބްޔަވަތީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އެ ގައުމުގެ ޝާހީ އާއިލާއަށާއި ރައްޔިތުންނަށް ތައުޒިޔާ ފޮނުއްވައިފިއެވެ.
ރައީސުލްޖުމްހޫރިއްޔާ ތައިލެންޑުގެ ރަސްގެފާނަށް ފޮނުއްވި ތައުޒިޔާގެ މެސެޖުގައި، އަމީރާ އަވަހާރަވި ހަބަރު އަޑުއެއްސެވީ ނުހަނު ފުން ހިތާމައާއެކު ކަމުގައި ވިދާޅުވެފައިވެއެވެ. އަދި މި ހިތާމަވެރި ދަނޑިވަޅުގައި ދިވެހި ސަރުކާރާއި ރައްޔިތުންގެ ފަރާތުން ތައިލެންޑުގެ ޝާހީ އާއިލާއަށާއި ބޮޑުވަޒީރަށާއި އެ ގައުމުގެ ރައްޔިތުންނަށް އިޚްލާސްތެރި ތައުޒިޔާ ރައީސް ވަނީ ރައްދު ކުރައްވައިފައެވެ.
ރައީސްގެ މެސެޖުގައި، ޕްރިންސެސް ތައިލެންޑުގެ ކުރިއެރުމަށާއި ރައްޔިތުންގެ ލާބައަށްޓަކައި ކޮށްދެއްވާފައިވާ އަގުހުރި ހިދުމަތްތަކުގެ މައްޗަށް އަލިއަޅުއްވާލެއްވިއެވެ. ވަކިން ހާއްސަކޮށް، އެކަމަނާގެ ހިދުމަތްތަކުގައި ބެހެއްޓެވި ސާބިތުކަމާއި، ގާނޫނީ ދާއިރާއިން ގެންނެވި އިސްލާހީ ބަދަލުތަކުގެ އިތުރުން، އަދުލު އިންސާފުގެ ނިޒާމު ހަރުދަނާކުރެއްވުމަށް ކުރެއްވި ވަކާލާތުތަކާއި މަސައްކަތްޕުޅުތައް ރައީސް ފާހަގަކުރެއްވިއެވެ.
މީގެއިތުރުން، ތައިލެންޑުގެ ރައްޔިތުންގެ މަންފާއަށްޓަކައި އެކަމަނާ ގެންގުޅުއްވި ދުރުވިސްނުމާއި، ކުރެއްވި މަސައްކަތްޕުޅުތަކަކީ އަބަދުވެސް ހަނދާން ހުންނާނެ ކަންތައްތަކެއް ކަމުގައި ރައީސް ވިދާޅުވިއެވެ. އަދި އެކަމަނާ ދެއްކެވި ވަފާތެރި އަދި ނަމޫނާ ހިދުމަތްތަކަކީ ތައިލެންޑުގެ އަންނަން އޮތް ޖީލުތަކަށް ލިބިގެންދާނެ ވަރަށް ބޮޑު ހިތްވަރެއްގެ ގޮތުގައިވެސް ރައީސްގެ މެސެޖުގައި ސިފަކުރައްވާފައިވެއެވެ.
ތައިލެންޑުގެ ރަސްގެފާނުގެ ދޮށީ ދަރިކަނބަލުން އަމީރާ ބަޖްރަކިތިޔާބާ އަވަހާރަވީ ތިން އަހަރު ވަންދެން ކޯމާއެއްގައި އޮންނެވުމަށްފަހު އުމުރުފުޅުން 47 އަހަރުގައެވެ. 2022 ވަނަ އަހަރު ކުއްލިއަކަށް ހޭފުޅުނެތިގެން ވެއްޓުނު ފަހުން އެކަމަނާއަށް ފަރުވާ ދެމުންދިޔައީ މެޝިންތަކުގެ އެހީގައެވެ. އެކަމަނާއަކީ ގާނޫނީ ދާއިރާއިން ޕީއެޗްޑީ ހާސިލުކުރައްވާފައިވާ، އަދި އދ. ގެ ގުޑްވިލް އެމްބެސެޑަރެއްގެ ގޮތުން އިންސާފުގެ ނިޒާމު އިސްލާހުކުރުމަށް ގިނަ މަސައްކަތްތަކެއް ކުރެއްވި ބޭފުޅެކެވެ.