ތިނަދޫސިޓީ އަބްދުއްސަމަދު މެމޯރިއަލް ހޮސްޕިޓަލް (އޭ.އެސް.އެމް.އެޗް) ގެ ތާރީޚުގައި ފުރަތަމަ ފަހަރަށް، ބޮޑު އޮޕަރޭޝަނެއް ނުކޮށް ކުޑަ ލޯވަޅެއް އަޅައިގެން ކުރާ ލެޕަރޮސްކޯޕިކް ގައިނަކޮލޮޖިކަލް ސާޖަރީއެއް ކާމިޔާބުކަމާއެކު ނިންމާލައިފިއެވެ.
އެ ހޮސްޕިޓަލުން މައުލޫމާތު ދެއްވި ގޮތުގައި، މި އޮޕަރޭޝަނަކީ އަންހެނުންގެ ބަލިތަކާ ގުޅުންހުރި އޮޕަރޭޝަނެކެވެ. މި ސާޖަރީގައި ބަލިމީހާގެ ވާތްފަރާތުގެ އޯވަރީގައި އުފެދިފައިވާ ސިސްޓެއް ނެގުމުގެ އިތުރުން، ފެލޯޕިއަން ޓިއުބުގައި އުފެދިފައިވާ ފައިބްރޯމާއެއް ވަނީ ކާމިޔާބުކަމާއެކު ނަގާފައެވެ.
މި ތާރީޚީ ސާޖަރީ އިސްވެ ހުންނަވައި ކުރިއަށް ގެންދެވީ ޑރ. ޢުބައިދު އަބްދުﷲ އެވެ. އޭނާގެ އިތުރުން މި މަސައްކަތުގައި ތަޖުރިބާކާރު ޑޮކްޓަރުންގެ ޓީމެއް ބައިވެރިވެވަޑައިގަތެވެ. މި ޓީމުގައި ހިމެނިވަޑައިގަންނަވަނީ ޑރ. އާމިނަތު ނުޞްރާ، ޑރ. ޖުމައިލަތު ބޭގަމް، ޑރ. މުޙައްމަދު އަމީން މުޙައްމަދު ޙަމްޒާ، ޑރ. މަޙްމޫދު ސަޢީދު އަދި އަޙްމަދު މުޙައްމަދު ސާދު އެވެ.
އޭ.އެސް.އެމް.އެޗް އިން ވަނީ މި އޮޕަރޭޝަން ކާމިޔާބު ކުރުމަށް ޑޮކްޓަރުންގެ ޓީމުން ދެއްކެވި ފަރުވާތެރިކަމާއި ކުރެއްވި ބުރަ މަސައްކަތަށް ޚާއްޞަ ޝުކުރެއް އަދާކޮށްފައެވެ. މިއީ އެ ހޮސްޕިޓަލުގެ ޚިދުމަތްތަކުގެ ފެންވަރު މަތިކޮށް، ސިއްހީ ދާއިރާއިން އައު އުސްމިންތަކަކަށް ވާޞިލުވުމަށް ކުރަމުންދާ މަސައްކަތަށް ލިބުނު ވަރަށް ބޮޑު ކުރިއެރުމެއްގެ ގޮތުގައި އެ ހޮސްޕިޓަލުން ސިފަކުރެއެވެ.
މިފަދަ ޒަމާނީ ސާޖަރީތައް އަތޮޅުތެރޭގެ ހޮސްޕިޓަލްތަކުގައި ފެށުމަކީ، ސިއްހީ ފަރުވާ ހޯދުމަށް މާލެއަށް ކުރަންޖެހޭ ދަތުރުތައް މަދުވެ، ރައްޔިތުންނަށް ލިބިގެންދާނެ ވަރަށް ބޮޑު ލުޔެކެވެ.