ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ފީފާ ވޯލްޑް ކަޕް 2026 އަށް ތައްޔާރުވަމުންދާއިރު، އެ މުބާރާތުގައި “އަރަމްކޯ” އިން ސްޕޮންސަރ ކުރާ “ފީފާ ޔަންގް ޕްލޭޔަރ އެވޯޑް” ނުވަތަ އެންމެ މޮޅު ޒުވާން ކުޅުންތެރިޔާގެ މަގާމަށް ވާދަކުރާނެ ކަމަށް ބެލެވޭ ފާހަގަކޮށްލެވޭ ކުޅުންތެރިންގެ ލިސްޓެއް ފީފާ އިން ހާމަކޮށްފިއެވެ.
މި އެވޯޑަކީ ކުރިމަގުގައި ފުޓްބޯޅަ ދުނިޔޭގައި ރަސްކަން ކުރާނެ ތަރިން ދެނެގަތުމަށް ބޭނުންކުރާ މިންގަނޑެކެވެ. ފާހަގަކޮށްލެވޭ ގޮތުގައި، އެންމެ ފަހުން މި އެވޯޑް ހާސިލްކުރި ހަތަރު ކުޅުންތެރިންނަކީވެސް އެ އަހަރެއްގެ ވޯލްޑް ކަޕް ތަށި އުފުލާލި ޓީމުތަކަށް ނިސްބަތްވާ ކުޅުންތެރިންނެވެ. މީގެ ކުރިން މި ޝަރަފުވެރި އެވޯޑް ހޯދާފައިވާ ކުޅުންތެރިންގެ ތެރޭގައި ކީލިއަން އެމްބާޕޭ، ތޯމަސް މުލާ އަދި އެންމެ ފަހުން 2022 ގެ މުބާރާތުގައި އާޖެންޓީނާގެ އެންޒޯ ފެނާންޑޭޒް ހިމެނެއެވެ.
2026 ގެ ވޯލްޑް ކަޕްގައި މި އެވޯޑަށް ޝަރުތުހަމަވާނީ 1 ޖެނުއަރީ 2005 ގެ ފަހުން އުފަންވެފައިވާ ކުޅުންތެރިންނެވެ. މި މަގާމަށް ވާދަކުރާނެ ކަމަށް ބެލެވޭ ބައެއް ތަރިންނަކީ:
ޑެސިރޭ ޑުއޭ އަދި ވަރެން ޒައިރް-އެމެރީ (ފްރާންސް): ޕީ.އެސް.ޖީ އަށް ކުޅޭ މި ދެ ކުޅުންތެރިންނަކީ ފްރާންސްގެ ވަރުގަދަ ސްކޮޑުން ޖާގަ ހޯދައި، ތަފާތު ދައްކާނެ ކަމަށް ބެލެވޭ ދެ ތަރިންނެވެ.
ލަމީން ޔަމާލް އަދި ޕާއު ކުބާސީ (ސްޕެއިން): ބާސެލޯނާގައިވިދަމުންދާ ޔަމާލް އަކީ މިހާރުވެސް ދުނިޔޭގެ ސަމާލުކަން ހޯދާފައިވާ ކުޅުންތެރިއެކެވެ. ކުބާސީ އަކީ މި އެވޯޑް ހޯދާ ފުރަތަމަ ޑިފެންޑަރަށް ވުމުގެ ފުރުސަތު އޮތް ކުޅުންތެރިއެކެވެ.
އެންޑްރިކް (ބްރެޒިލް): ރެއާލް މެޑްރިޑްގެ މި ޒުވާން ފޯވާޑަކީ ބްރެޒިލްގެ އުންމީދެވެ. ލިޔޯންގައި އޭނާ ދެއްކި މޮޅު ކުޅުމާއެކު އޭނާ ހުރީ ފޯމުގައެވެ.
އަރުދާ ގުލާ އަދި ކެނާން ޔިލްޑިޒް (ތުރުކީ): ރެއާލް މެޑްރިޑްގެ ގުލާ އާއި ޔުވެންޓަސްގެ ޔިލްޑިޒް އަކީ ތުރުކީގެ އެންމެ ވަރުގަދަ ދެ ހަތިޔާރެވެ.
ނިކޯ ޕާޒް (އާޖެންޓީނާ): އާޖެންޓީނާގެ ތަށި ދިފާއުކުރުމުގެ ދަތުރުގައި މި ޒުވާން މިޑްފީލްޑަރު މުހިންމު ދައުރެއް އަދާކުރާނެ ކަމަށް ބެލެވެއެވެ.
ޖޮއާއޯ ނޭވްސް (ޕޯޗުގަލް): ޕީ.އެސް.ޖީގެ މިޑްފީލްޑުގައި މޮޅު ކުޅުމެއް ދައްކަމުން އަންނަ ނޭވްސް އަކީ ޕޯޗުގަލްގެ އުންމީދީ ތަރިއެކެވެ.
މީގެ އިތުރުން ނޯވޭގެ އެންޓޯނިއޯ ނޫސާ، އައިވަރީ ކޯސްޓްގެ ޔާން ދިއޮމާންޑޭ، އަލްޖީރިއާގެ އިބްރާހިމް މާޒާ، އިންގްލެންޑްގެ ނިކޯ އޯރައިލީ، އިކުއެޑޯގެ ކެންޑްރީ ޕައޭޒް، މެކްސިކޯގެ ގިލްބާޓޯ މޯރާ އަދި ކްރޮއޭޝިއާގެ ލޫކާ ވުސްކޮވިޗް ހިމެނެއެވެ.
މި ޒުވާން ތަރިންގެ ތެރެއިން 2026 ވަނަ އަހަރު އުތުރު އެމެރިކާގައި ބޭއްވޭ ވޯލްޑް ކަޕްގެ އެންމެ މޮޅު ޒުވާން ކުޅުންތެރިޔާގެ ޝަރަފުވެރި އެވޯޑް އުފުލާލާނީ ކާކުތޯ ބެލުމަށް މުޅި ދުނިޔެ އިންތިޒާރު ކުރެއެވެ. މި އެވޯޑް ހޮވާނީ ފީފާގެ ޓެކްނިކަލް ސްޓަޑީ ގްރޫޕުންނެވެ.