ގޮނޯރިއާ ނުވަތަ އާންމު ބަހުން ނަމަ ކިހުނު ބައްޔަކީ އަކީ ނީސެރިއާ ގޮނޯރިއާ ބެކްޓީރިއަމްގެ ސަބަބުން ޖެހޭ ޖިންސީ ގޮތުން ފެތުރޭ އިންފެކްޝަން (އެސްޓީއައި) އެކެވެ. އޭގެ ސަބަބުން ދިގު މުއްދަތަކަށް ސިއްހީ މައްސަލަތަކާއި ދަރިމައިވުމަށްވެސް ހުރަސްތަކެއް އެޅިދާނެ ކަމެއް ކަމަށްވެއެވެ. އެހެން ނަމަވެސް އެންޓިބަޔޮޓިކްސް ނަގައި ރަނގަޅު ފަރުވާއެެއް ކުރެވިއްޖެނަމަ ރަނގަޅުވެ މިފަދަ ހުރަސްތައް ކުރިމަތިވުމުގެ ފުރުސަތު ކުޑަކޮށްދެ އެވެ.
މި އެސް.ޓީ.އައި އަސަރުކުރުވަނީ ހަށިގަނޑުގެ ހޫނު، އޮމާން ނާޒުކު ގުނަވަންތަކަށެވެ.
- ޔޫރެތްރާ، ނުވަތަ ބްލެޑާއިން ޔޫރިން ބޭރުކޮށްދޭ ޓިއުބް
- ކަރުތެރެ
- އަންހެނުންގެ ކުރިމަތި ފަރާތް
- އަންހެން ދަރިމައިވުމުގެ ނިޒާމު، އޭގެ ތެރޭގައި ފެލޯޕިއަން ޓިއުބްސް، ސަރވިކްސް އަދި މައިބަދަ މީގެ ތެރޭގައި ހިމެނެއެވެ.
ގޮނޯރިއާ ނުވަތަ ކިހުނު ވުމަށް ވަކި އުމުރެއް ނޯވެއެވެ. ކޮންމެ އުމުރެއްގެ މީހަކަށްވެސް މިބަލި ޖެހިދާނެއެވެ، އެނަޓޮމީއެއް ނޫނީ ޖިންސެއްގެ މީހުންނަށް ވެސް އަސަރު ކޮށްފާނެ ބައްޔެކެވެ. ނަމަވެސް މިއީ ހާއްސަކޮށް އުމުރުން 15 އަހަރާއި 24 އަހަރާ ދެމެދުގެ ޒުވާން އުމުރުގެ މީހުންނާއި ޒުވާން އުމުރުގެ މީހުންގެ މެދުގައި ބަލި ޖެހުން އާންމުކަމަށްވެއެވެ.
އަލާމާތްތައް ހަށިގަނޑުން ފެންނަން ފަށަނީ މި ޖަރާސީމް ޖެހޭތާ ހަތްދުވަހާއި އެކާވީހަކަށް ދުވަސް ނުވަތަ ތިން ހަފުތާއެއްހައި ދުވަހުގެ ތެރޭގައެވެ. މިއީ އަންހެނުންގެ ތެރޭގައި ވަރަށް އާންމުކޮށް ޖެހޭ ބައްޔެކެވެ.
ބަލި ފެތުރޭ ގޮތާއި ސަބަބުތައް: ގޮނޯރިއާ މައިގަނޑު ގޮތެއްގައި ފެތުރެނީ ބަލިޖެހިފައިވާ މީހަކާއެކު ހިންގޭ ޖިންސީ ގުޅުމުގެ ތެރެއިންނެވެ. މީގެ ތެރޭގައި ކުރިމަތިފަރާތުންނާއި، ފުރަގަސްފަރާތުން އަދި އަނގަބަހުން ހިންގާ ޖިންސީ ގުޅުންތައް ހިމެނެއެވެ. މީގެ އިތުރުން، ބަލިޖެހިފައިވާ މާބަނޑު އަންހެނެއްގެ ފަރާތުން ވިހެއުމުގެ ތެރޭގައި ތުއްތު ދަރިފުޅަށް މި ބަލި ފެތުރުމުގެ ފުރުސަތު އޮވެއެވެ. ނަމަވެސް، އާންމު އިޖުތިމާއީ ގުޅުންތަކުގެ ތެރެއިން، މިސާލަކަށް ސަލާމްކުރުމުން ނުވަތަ އެކުގައި ކައިބޮއި ހެދުމަކުން މި ބަލި ނުފެތުރެއެވެ.
ބަލީގެ އަލާމާތްތައް: މި ބަލީގެ އެންމެ ނުރައްކާތެރި އެއް ކަމަކީ ބައެއް މީހުންގެ ހަށިގަނޑުން އެއްވެސް އަލާމާތެއް ނުފެނި ބަލި ހުރުމެވެ. ޚާއްސަކޮށް އަންހެނުންގެ ފަރާތުން އަލާމާތްތައް ނުފެނުމަކީ އެކަށީގެންވާ ކަމެކެވެ. ފިރިހެނުންނަށް ބަލިޖެހުމުން ކުޑަކަމުދާއިރު ދިލަނެގުމާއި، ކުރިމަތިފަރާތުން ދޮސް ނުވަތަ އާދަޔާ ހިލާފު ދިޔައެއް ބޭރުވުން ފަދަ ކަންކަން މެދުވެރިވެއެވެ.
އަންހެނުންނަށް ކުރިމަތިވާ އަލާމާތްތަކުގެ ތެރޭގައި
- ކުރިމަތިފަރާތުން ބޭރުވާ ދިޔައިގެ ކުލަ ފެހި ނުވަތަ ރީނދޫ ކުލައަކަށް ބަދަލުވުމާއި،
- ނުބައި ވަސް ދުވުމާއި،
- ދޭތެރެ ދޭތެރެއިން ލޭ އައުން
- ބަނޑުގައި ރިއްސުން
- މަޑުރީނދޫ ފާޑެއްގެ ކުލަ ގަދަވެ ފާޑެއްގެ ފެހިކުލައަކަށްދާ ދިޔައެއް ފައިބާ އިރު ވަސް ނުބައިވުމާއި
- ކުޑަކަމުދާއިރުގައާއި ޖިންސީގުޅުން ހިންގުމުގައި ތަދުވުން
- އާދަޔާހިލާފަށް އުނދަގޫވާ ވަރަށް ކަހާ ގޮތްވުން
- ފިނިވެފައި ހުރުމާއި ހުން އައުން
- ދަށްބަނޑާއި އުނަގަނޑުގައި ގަދަ ރިހުމެއް އުފެދި ހަރުލާފައި ހުރުން
- ހައިޟުވުމުގައި މާގިނައި ލޭ އައުމަކީވެސް ގޮނޯރިއާގެ އަލާމާތެއްކަމަށް ވެއެވެ.
ފަރުވާ ނުކޮށް ދޫކޮށްލުމުން ދިމާވާ ނުރައްކާތައް: ގޮނޯރިއާއަށް އެކަށީގެންވާ ފަރުވާ ނުދެވިއްޖެނަމަ، އަންހެނުންނަށް ޕެލްވިކް އިންފްލެމޭޓަރީ ޑިޒީޒް (PID) ޖެހި، އޭގެ ސަބަބުން ދަރިމައިވުމަށް ހުރަސް އެޅި، ދާއިމީކޮށް ބަނޑުގައި ރިއްސުން ފަދަ މައްސަލަތައް ކުރިމަތިވެއެވެ. ފިރިހެނުންނަށް ބަލިޖެހި ފަރުވާ ނުކުރެވިއްޖެނަމަ، އޮށް ދުޅަވުމާއި ދަރިމައިވުމުގެ ފުރުސަތު ކުޑަވުން ފަދަ ކަންކަން ދިމާވެއެވެ. އަދި ބެކްޓީރިއާ ލޭގެ ތެރެއަށް ފެތުރިއްޖެނަމަ ހުޅުތަކަށާއި ހަށިގަނޑުގެ އެހެން ގުނަވަންތަކަށް ބޮޑެތި ގެއްލުންތައް ލިބެއެވެ.
މި ބައްޔަކީ އެންޓިބަޔޮޓިކް ބޭނުންކޮށްގެން ފަރުވާކޮށް ރަނގަޅު ކުރެވޭ ބައްޔެކެވެ. ނަމަވެސް، ޑޮކްޓަރެއްގެ އިރުޝާދުގެ ދަށުން ފުރިހަމަ ފަރުވާ ހޯދުމަކީ ކޮންމެހެން މުހިންމު ކަމެކެވެ. ގޭގައި ކުރާ ފަރުވާތަކުން މި ބަލި ރަނގަޅެއް ނުކުރެވޭނެއެވެ. ބަލިން ރައްކާތެރިވުމަށްޓަކައި ޖިންސީ ގުޅުން ހިންގުމުގައި ރައްކާތެރި ގޮތްތައް އިޚްތިޔާރު ކުރުމާއި، ގަވާއިދުން ސިއްހީ ޗެކަޕް ހެދުމަކީ މުހިންމު ކަމެކެވެ.
“ބަލީގެ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިއެއްގެ ލަފާ ހޯދުމަކީ އޮތް އެންމެ ރަނގަޅު މަގެވެ.”
ގޮނޯރިއާ ފަދަ ޖިންސީގުނަވަންތަކަށް ޖެހޭ ނުރައްކާތެރި ބަލިތަކުން ތިމާ ރައްކާތެރިވުމަށް ޖިންސީ ގުޅުން ހިންގުމުގައި ރައްކާތެރިވެ އަމާނާތްތެރިވާށެވެ. ކައިވެނީގެ ބޭރުން ގުޅުން ހިންގުމުން ދުރުހެލިވާށެވެ.
މިއީ ބަލީގެ ކުރީކޮޅުގައި ފަރުވާ ކުރެވިއްޖެނަމަ ސަލާމަތްވެދާނެ ބައްޔެކެވެ.