ކޮންމެ އަހަރެއްގެ ޖޫން 15 ވަނަ ދުވަހަކީ އުމުރުން ދުވަސްވީ މީހުންނަށް ކުރިމަތިވާ އެކި ކަހަލަ ގޯނާތަކާ މެދު މުޖުތަމައު ހޭލުންތެރިކުރުވުމަށް ބައިނަލްއަގުވާމީ ފެންވަރުގައި ފާހަގަކުރާ ދުވަހެކެވެ. މި ދުވަސް ހާއްސަކުރެވިފައިވަނީ ދުވަސްވީ މީހުންނަށް ކުރާ އަނިޔާތަކާއި، އެމީހުންނަށް އިހުމާލުވުން ފަދަ ނޭދެވޭ އަމަލުތައް ހުއްޓުވުމަށް ދުނިޔޭގެ ސަމާލުކަން ހޯދުމަށެވެ.
މީގެ އިތުރުން، މިއީ އަޅުގަނޑުމެންގެ މުޖުތަމައުގެ އިސްރަށްވެހިންނަށް ބޭނުންވާ ގަދަރާއި، ރައްކާތެރިކަމުގެ އިތުރުން އަބުރުވެރި ދިރިއުޅުމެއް ހޯދައިދިނުމުގެ މުހިންމުކަން ހަނދާންކޮށްދޭ ދުވަހެއްވެސް މެއެވެ.
އިސްރަށްވެހިންނަށް ކުރާ އަނިޔާގެ ތެރޭގައި ޖިސްމާނީ، ނަފްސާނީ، މާލީ އަދި ޖިންސީ އަނިޔާގެ އިތުރުން އިހުމާލުވުން ހިމެނެއެވެ. ޖިސްމާނީ އަނިޔާއަކީ ގަދަކަމުން ނުވަތަ އަނިޔާވެރިކަމުން ހަށިގަނޑަށް ގެއްލުން ދިނުމެވެ. ނަފްސާނީ އަނިޔާގެ ތެރޭގައި ބިރުދެއްކުމާއި، ދަށްކޮށްލުމާއި، އަދި އަބަދު ފާޑުކިޔުން ހިމެނޭއިރު، މާލީ އަނިޔާއަކީ އެމީހެއްގެ ފައިސާ ނުވަތަ މުދާ އެމީހެއްގެ ހުއްދަނެތި ނަހަމަ ގޮތުގައި ބޭނުންކުރުމެވެ. މީގެ އިތުރުން މުޖުތަމައުން އެކަހެރިކުރުމާއި، އަޅާނުލާ ދޫކޮށްލުމަކީ ވެސް ދުވަސްވީ މީހުންނަށް ކުރެވޭ ބޮޑު އަނިޔާއެކެވެ.
ކޮންމެ މީހަކީ ވެސް ދުވަސްވީ މީހުންނަށް އަޅާލާ، އެމީހުންގެ ހައްގުތައް ހިމާޔަތްކުރާ މީހަކަށް ވާންޖެހޭ—-އޭއއި ފޮޓޯތައްޔާރުކުރީ ޝައްފަ
ރާއްޖެއަކީ އާއިލީ ގުޅުންތަކާއި އިސްރަށްވެހިންނަށް އިހުތިރާމްކުރުމުގެ މުއްސަނދި ސަގާފަތެއް އޮތް ގައުމަކަށް ވީނަމަވެސް، އިޖުތިމާއީ އަދި އިގްތިސާދީ ބަދަލުތަކާއެކު އާއިލީ އޮނިގަނޑަށް ވަނީ ބަދަލުތަކެއް އައިސްފައެވެ. ތަފާސްހިސާބުތަކުން ދައްކާގޮތުގައި 2025 ވަނަ އަހަރު އެކަނިވެސް ދުވަސްވީ މީހުންނަށް ކުރާ އަނިޔާގެ 58 މައްސަލައެއް ރާއްޖޭގައި ރިޕޯޓްކޮށްފައިވެއެވެ. މިއީ މުޅި މުޖުތަމައު މިކަމަށް ސަމާލުވާންޖެހޭ ކަމެކެވެ. ދުވަސްވީ މީހުންނަށް ރައްކާތެރި މާހައުލެއް ގާއިމުކުރުމަކީ ހަމައެކަނި އާއިލާގެ ޒިންމާއެއް ނޫން ކަމަށާއި، އެއީ މުޅި މުޖުތަމައުގެ ޒިންމާއެއް ކަމުގައި ދެކެންޖެހެއެވެ.
އަނިޔާ ހުއްޓުވުމަށްޓަކައި އޭގެ ނިޝާންތައް ދެނެގަތުމަކީ މުހިންމު ކަމެކެވެ. ސަބަބެއް ނޭނގި ލިބިފައިވާ އަނިޔާތައް، އުޅުމަށް އަންނަ ކުއްލި ބަދަލުތައް، ސާފުތާހިރުކަން ކުޑަވުން، އަދި މާލީ މުއާމަލާތްތަކަށް އަންނަ އާދަޔާ ހިލާފު ބަދަލުތަކަކީ ސަމާލުވާންޖެހޭ ކަންކަމެވެ. ގިނަ ފަހަރަށް އަނިޔާ ލިބޭ މީހުން ލަދުގަތުމުގެ ސަބަބުން ނުވަތަ ބިރުން އެވާހަކަ ނުދައްކާ ތިބެއެވެ. އެހެންކަމުން، ރައްޓެހިންނާއި، އަވަށްޓެރިން އަދި އާއިލާގެ މެންބަރުން މިފަދަ ކަންކަމަށް ފާރަވެރިވެ، މައްސަލަތައް ރިޕޯޓްކުރުމަކީ ކޮންމެހެން ބޭނުންތެރި ކަމެކެވެ.
ކޮންމެ މީހަކީ ވެސް ދުވަސްވީ މީހުންނަށް އަޅާލާ، އެމީހުންގެ ހައްގުތައް ހިމާޔަތްކުރާ މީހަކަށް ވާންޖެހޭ—-އޭއއި ފޮޓޯތައްޔާރުކުރީ ޝައްފަ
އިސްރަށްވެހިންނަށް އިހުތިރާމްކުރުމަކީ އިސްލާމީ އަދި ދިވެހި ސަގާފަތުގެ މުހިންމު ބައެކެވެ. މި އިހުތިރާމް އަމަލުން ދެއްކުމަށްޓަކައި، ދުވަސްވީ މީހުންގެ ވާހަކަތައް އަޑުއެހުމާއި، އާއިލީ ނިންމުންތަކުގައި އެމީހުން ބައިވެރިކުރުމާއި، އަދި އެމީހުންގެ މިނިވަންކަމަށް އެހީތެރިވުން ހިމެނެއެވެ. ޒުވާނުންނަށް ވެސް އިސްރަށްވެހިންނާއެކު ވަގުތު ހޭދަކޮށް، އެމީހުންގެ ތަޖުރިބާއިން ފިލާވަޅު ލިބިގަނެވިދާނެއެވެ. 2026 ވަނަ އަހަރުގެ ޝިއާރު ކަމަށްވާ "ހޭލުންތެރިކަމުގެ ބޭރުން: ދުވަސްވީ މީހުންނަށް ކުރާ އަނިޔާ ހުއްޓުވުމަށް އަމަލީ މަސައްކަތް ކުރުން" ބާރުއަޅަނީ ހަމައެކަނި ވާހަކަދެއްކުމުގެ ބަދަލުގައި އަމަލީ ގޮތުން މިކަން ހުއްޓުވުމަށް މަސައްކަތް ކުރުމަށެވެ.
ނިންމާލަމުން ދަންނަވާނީ، ކޮންމެ މީހަކީ ވެސް ދުވަސްވީ މީހުންނަށް އަޅާލާ، އެމީހުންގެ ހައްގުތައް ހިމާޔަތްކުރާ މީހަކަށް ވާންޖެހޭ ކަމަށެވެ. އަޅުގަނޑުމެންގެ އިސްރަށްވެހިންނަކީ މިއަދުގެ މުޖުތަމައު ބިނާކުރުމަށް ބުރަ މަސައްކަތްތަކެއް ކޮށްފައިވާ ބައެކެވެ. އެމީހުންގެ ހަޔާތުގެ ފަހު ދުވަސްތަކަކީ ބިރުވެރިކަމެއް ނެތް، އަމާން އަދި އޯގާތެރި ދުވަސްތަކަކަށް ހެދުމަކީ އަޅުގަނޑުމެން އެންމެންގެ މައްޗަށް އޮތް ވާޖިބެކެވެ.