މީގެ ސާދަސަތޭކަ އަހަރު ކުރިން މަދީނާގެ އަންޞާރީންނާއި މުހާޖިރުން ދެއްކެވި ފަދަ ނަމޫނާ އެކުވެރިކަމާއި އޯގާތެރިކަމުގެ ރޫޙު، ދިވެހި މުޖުތަމަޢުގައި ދިރުވައި އާލާކުރަން ޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ހިޖުރީ އައު އަހަރުގެ މުނާސަބަތުގައި ދިވެހި ރައްޔިތުންނާއި އިސްލާމީ އުންމަތަށް ފޮނުއްވި ތަހުނިޔާގެ ޚިޠާބުގައެވެ.
ރައީސުލްޖުމްހޫރިއްޔާގެ ބަޔާނުގައި ހިޖުރީ ތާރީޚުގެ މުހިންމުކަމަށް އަލިއަޅުއްވާލައްވަމުން ވިދާޅުވީ، ކީރިތި ރަސޫލާ صَلَّى اللهُ عَلَيْهِ وَسَلَّمَ އާއި އެކަލޭގެފާނުގެ އަޞްޙާބުން މައްކާ ދޫކުރައްވައި މަދީނާއަށް ކުރެއްވި ހިޖުރައަކީ އަނިޔާވެރިކަމުގެ މައްޗަށް ޢަދުލުވެރިކަން ހޯދި ނަޞްރެއް ކަމަށެވެ. އަދި އެއީ ބައިބައިވުމުގެ ތެރެއިން އެއްބައިވަންތަކަމަށް އުންމަތް ހުޅުވައިލަދިން ތާރީޚީ ބަދަލެއްކަން އެމަނިކުފާނު ފާހަގަކުރެއްވިއެވެ.
ޤައުމީ އެއްބައިވަންތަކަމުގެ މުހިންމުކަމާ ގުޅޭގޮތުން ރައީސް ވިދާޅުވީ، “ދިވެހި އުންމަތުގެ ކުރިއެރުމާއި ހަމަޖެހުން ބިނާވެގެންވަނީ، އަޅުގަނޑުމެންގެ މެދުގައި އޮންނަ އެއްބައިވަންތަކަމާއި އަޚުވަންތަކަމުގެ މައްޗަށް” ކަމަށެވެ. އެހެންކަމުން ސިޔާސީ އަދި އިޖުތިމާޢީ ޚިޔާލުތަފާތުވުންތައް އެއްކިބާކޮށް، ޤައުމީ މަޞްލަޙަތު އިސްކުރުމަކީ މިއަދު ހާސިލުކުރަންވީ އެންމެ މުހިންމު ފިލާވަޅު ކަމުގައި އެމަނިކުފާނު ވިދާޅުވިއެވެ.
މި ސަރުކާރުގެ ސިޔާސަތުތަކަށް އަލިއަޅުއްވާލައްވަމުން ރައީސް ވިދާޅުވީ، އިސްލާމީ ޞައްޙަ ޢަޤީދާގެ ބިންގަލުގެ މަތީގައި ދީނާއި ޤައުމަށް ވަފާތެރި ޖީލެއް ބިނާކުރުމަކީ އެންމެ އިސް އަމާޒު ކަމަށެވެ. އަދި ދިވެހީންގެ މެދުގައި އޮތް އިސްލާމީ ވަޙްދަތަކީ ޤައުމުގެ އެންމެ ބޮޑު ބާރުކަން ފާހަގަކުރައްވައި، ރައްޔިތުންނަށް ޢަދުލުވެރިކަމާއި ހަމަހަމަކަން ކަށަވަރުކޮށްދެއްވާނެ ކަމުގެ ޔަޤީންކަން އެމަނިކުފާނު އެރުވިއެވެ.
ޚިޠާބު ނިންމަވާލައްވަމުން ރައީސުލްޖުމްހޫރިއްޔާ ވަނީ ނޭދެވޭ ކަންކަމުން ދުރުވެ، ހެޔޮކަމުގެ މަގަށް ހިތާއި ނަފްސުން ހިޖުރަކުރުމަށް ޢަޒުމް ކަނޑައެޅުމަށް އިލްތިމާސްކުރައްވާފައެވެ. އަދި ދުނިޔޭގެ އެކި ކަންކޮޅުތަކުގައި، ޚާއްޞަކޮށް ފަލަސްޠީނުގައި އަނިޔާ ލިބެމުންދާ މުސްލިމް އަޚުންނާއި އުޚުތުންނަށް ހެޔޮދުޢާ ކުރުމުގައި ދެމިތިބުމަށްވެސް އެމަނިކުފާނު ހަނދާންކޮށްދެއްވިއެވެ.