އިސްލާމީ ޢަޤީދާގެ މަތީގައި ބިނާވާ ވަފާތެރި ޖީލެއް ބިނާކުރުމަކީ ސަރުކާރުގެ އެންމެ މުހިއްމު އަމާޒުކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ، ހިޖުރީ އައު ފެށުމުގެ ތަހުނިޔާ އަރިސްކުރައްވާ ފޮނުއްވި ޚިޠާބުގައެވެ.
ދިވެހި ރައްޔިތުންނަށާއި އިސްލާމީ އުއްމަތަށް ރައީސް މުއިއްޒު ފޮނުއްވި އެ ޚިޠާބުގައި ވިދާޅުވެފައިވަނީ، ދިވެހިވަންތަ ރިވެތި އަޚްލާޤުގެ މަތީގައި ބޮޑުވާ، ދީނަށް ލޯބިކުރާ ޖީލެއް ބިނާކުރުމަށް ސަރުކާރުން އިސްކަންދޭނެ ކަމަށެވެ. އަދި ދިވެހީންގެ މެދުގައި އޮތް ސައްތައިންސައްތަ އިސްލާމީ ވަޙްދަތަކީ ޤައުމުގެ އެންމެ ބޮޑު ބާރުކަން ފާހަގަކުރައްވައި، އިސްލާމީ މަތިވެރި އުސޫލުތައް ހިމާޔަތްކޮށް، ޤައުމުގެ މިނިވަންކަމާއި ސިޔާދަތު ނަގަހައްޓައި، ހުރިހާ ރައްޔިތުންނަށް ޢަދުލުވެރިކަން ކަށަވަރުކޮށްދެއްވާނެ ކަމުގެ ޔަޤީންކަން އެމަނިކުފާނު އަރުއްވާފައިވެސް ވެއެވެ.
މީގެ އިތުރުން އެމަނިކުފާނު ވަނީ، ހިޖުރީ ސަނަތާ ގުޅޭ ގޮތުން ވެސް އަލިއަޅުވާލައްވާފައެވެ. އެގޮތުން މީގެ ސާދަސަތޭކަ އެތައް އަހަރެއް ކުރިން އަޅުގަޑުމެންގެ ލޮބުވެތި މާތް ނަބިއްޔާ صَلَّى اللهُ عَلَيْهِ وَسَلَّمَ އާއި އެކަލޭގެފާނުގެ އަޞްޙާބުން ކުރެއްވި މަތިވެރި ހިޖުރައިގެ ހާދިސާއިން ޢިބުރަތް ލިބިގަތުމަށް އިލްތިމާސްކުރައްވާފައިވެއެވެ. އެ ހާދިސާއަކީ ބައިބައިވުމުން އެއްބައިވަންތަކަމަށް އުއްމަތް ހުޅުވައިލަދިން އިންޤިލާބީ ބަދަލެއް ކަމަށާއި، ކިތަންމެ ބޮޑު ގޮންޖެހުމެއް އައި ނަމަވެސް ކެތްތެރިކަމާއެކު އިލާހީ މަގުގައި ސާބިތުވުމުގެ މުހިންމުކަން އެ ހާދިސާއިން ދަސްކޮށްދޭ ކަމަށް ރައީސް ވިދާޅުވިއެވެ.
ހަމައެހެންމެ، ޤައުމީ މަޞްލަޙަތު ހުރިހާ ކަމަކަށްވުރެ ކުރިއަށް ނެރުމަކީ، މިއަދު މި ބަރަކާތްތެރި މުނާސަބަތުން އަޅުގަނޑުމެން ހާސިލުކުރަންވީ އެންމެ މުހިންމު ފިލާވަޅުކަން ފާހަގަކރުައްވާ އެމަނިކުފާނު ވަނީ ސިޔާސީ ގޮތުންނާއި އިޖުތިމާޢީ ގޮތުން އުފެދޭ ޚިޔާލުތަފާތުވުންތައް އެއްކިބާކޮށް، އެންމެން އަތުގުޅާލައިގެން މަސައްކަތް ކުރުމަކީ ޤައުމު ބިނާކުރުމުގެ އަސާސް ކަމަށްވެސް ވިދާޅުވެފައެވެ.
ނޭދެވޭ ކަންކަމުން ދުރުވެ، ހެޔޮކަމުގެ މަގަށް ހިތާއި ނަފްސުން ހިޖުރަކުރުމަށް ހުރިހާ ދިވެހި ރައްޔިތުންނަށް ގޮވާލައްވާ ރައީސް މުއިއްޒު ވަނީ ފެށުނު އައު އަހަރަކީ އިޤްތިޞާދު އާރާސްތުކޮށް، އިޖުތިމާޢީ ފޭރާން ވަރުގަދަކުރުމަށް ލިބުނު ފުރުޞަތެއްގެ ގޮތުގައި ބަލައި، ހީވާގިކަމާއެކު މަސައްކަތް ކުރުމަށް ރައްޔިތުންނަށް އިލްތިމާސްކުރެއްވިއެވެ.
ރައީސްގެ ޚިޠާބު ނިންމަވާލެއްވީ، ދުނިޔޭގެ އެކި ކަންކޮޅުތަކުގައި، ޚާއްޞަކޮށް ފަލަސްޠީނުގައި އަނިޔާ ލިބެމުންދާ މުސްލިމް އަޚުންނާއި އުޚުތުންނަށް ހެޔޮދުޢާ ކުރުމުގައި ދެމިތިބުމަށް ހަނދާންކޮށްދެއްވަމުންނެވެ.