ފީފާ ވޯލްޑް ކަޕްގެ ގްރޫޕް "އެޗް" ގައި ކޭޕް ވާޑާއި ސްޕެއިން ބައްދަލުކުރި މެޗު 0-0 އިން އެއްވަރުވެ، ކޭޕް ވާޑުން ތާރީޚީ ނަތީޖާއެއް ހޯދައިފިއެވެ.
ދުނިޔޭގެ އެންމެ ބޮޑު ކުޅިވަރު އީދު، ފީފާ ވޯލްޑް ކަޕްގެ ތާރީޚުގައި ފުރަތަމަ ފަހަރަށް ކޭޕް ވާޑޭއިން ވާދަކޮށް، މުޅި ދުނިޔޭގެ ސަމާލުކަން ހޯދައިފިއެވެ. މިއީ އެ ގައުމުގެ ފުޓްބޯޅަ ތާރީޚުގައި ލިޔެވިގެންދާނެ އެންމެ ފަޚުރުވެރި އެއް ކާމިޔާބީއެވެ.
މުޅި މެޗަށް ބަލާއިރު، ދުނިޔޭގެ ފުޓްބޯޅައިގެ ގަދަބާރެއް ކަމަށްވާ ސްޕެއިންއިން ވަނީ ބޯޅަ ހިފަހައްޓައިގެން މެޗު ކޮންޓްރޯލްކޮށް، ގޯލު ޖަހާނެ ގިނަ ފުރުސަތުތަކެއް އުފައްދާފައެވެ. ނަމަވެސް، ސްޕެއިންގެ "ޓިކި ޓަކާ" އަށް މި މެޗުގައި ކުރިމަތިވި އެންމެ ބޮޑު ހުރަހަކީ ކޭޕް ވާޑުގެ އުމުރުން 40 އަހަރުގެ ތަޖުރިބާކާރު ކީޕަރު ވޮޒީނިއާއެވެ.
ސްޕެއިންގެ ފަރާތުން ފެނިގެންދިޔަ ނުރައްކާތެރި ހަމަލާތައް ހުއްޓުވުމުގައި ވޮޒީނިއާ ވަނީ އާދަޔާ ހިލާފު މޮޅު ކުޅުމެއް ދައްކާފައެވެ. އޭނާ ވަނީ މެޗުގެ އެކި ދަނޑިވަޅުތަކުގައި ސްޕެއިންގެ ފޯވާޑުން ފޮނުވާލި ހަމަލާތައް އެއްވެސް ބިރެއް ނެތި ދިފާއުކޮށް، މެޗުގެ ނަތީޖާ ސުމަކުން އެއްވަރުކޮށް ހިފަހައްޓައިދީފައެވެ.
ބިމުގެ ގޮތުންނާއި އާބާދީގެ ގޮތުން ބަލާއިރު، ކޭޕް ވާޑޭއަކީ ވޯލްޑް ކަޕަށް މިހާތަނަށް ކޮލިފައިވި އެންމެ ކުދި ގައުމުތަކުގެ ތެރޭގައި ހިމެނޭ ގައުމެކެވެ. އެ ގައުމުގެ މުޅި އާބާދީގައި ހިމެނެނީ ގާތްގަނޑަކަށް 500,000 (ފަސްލައްކަ) މީހުންނެވެ. މިއާ ޚިލާފަށް، އެ ގައުމާ ދެކޮޅަށް ނުކުތް ސްޕެއިނުގެ އާބާދީއަކީ ގާތްގަނޑަކަށް 48,000,000 (ސާޅީސް އަށެއް މިލިއަން) އެވެ.
މިއީ ވޯލްޑް ކަޕް ތާރީޚުގައި މިހާތަނަށް ފެނިގެންދިޔަ އެންމެ ހައިރާންކުރުވަނިވި އެއް ނަތީޖާއެވެ. އަލަށް ވޯލްޑް ކަޕަށް ކޮލިފައިވި ކޭޕް ވާޑުން މިފަދަ ވަރުގަދަ ޓީމެއް ހިފެހެއްޓުމަކީ އެ ގައުމަށް ލިބުނު ވަރަށް ބޮޑު ކާމިޔާބީއެކެވެ. މި ނަތީޖާއާއެކު ގްރޫޕް "އެޗް" ގެ ވާދަވެރިކަން މިހާރު ވަނީ ވަރަށް ބޮޑަށް އިތުރުވެފައެވެ.