މޯލްޑިވްސް ކަރެކްޝަނަލް ސަރވިސްގެ އިންސްޓިޓިއުޓް ފޮރ ކަރެކްޝަނަލް ސްޓަޑީޒް (އައިކޯސްޓް) އިން ކުރިއަށްގެންދިޔަ ތަފާތު ތަމްރީނު ޕްރޮގްރާމްތައް ފުރިހަމަކުރި ގައިދީންނަށް ސެޓްފިކެޓް ދިނުމުގެ ހާއްސަ ރަސްމިއްޔާތެއް މާފުށީ ޖަލުގައި އިއްޔެ ބާއްވައިފިއެވެ. މި ރަސްމިއްޔާތު ޝަރަފްވެރިކޮށްދެއްވީ މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީ ޢަލީ އިޙްސާންއެވެ.
މި ރަސްމިއްޔާތުގައި ކޮމިޝަނަރ އޮފް ޕްރިޒަންސް ޙަސަން ޒަރީރުގެ އިތުރުން ދައުލަތުގެ ސަލާމަތީ ހިދުމަތްތަކުގެ އިސްވެރިން ބައިވެރިވެވަޑައިގެންނެވިއެވެ. އޭގެ ތެރޭގައި ކޮންޓްރޯލަރ ޖެނެރަލް އޮފް އިމިގްރޭޝަން އަޙްމަދު ފަޞީޙް އާއި ކަސްޓަމްސްގެ ކޮމިޝަނަރ ޖެނެރަލް ފާޠިމަތު ދިޔާނާ ހިމެނިވަޑައިގަންނަވައެވެ. މީގެ އިތުރުން ކަރެކްޝަންސްގެ އެގްޒެކެޓިވް އޮފިސަރުންނާއި މުވައްޒަފުންވެސް މި ބައްދަލުވުމުގައި ބައިވެރިވިއެވެ.
ގައިދީންނަށް ސެޓްފިކެޓް ހަވާލުކުރުމުގެ އިތުރުން، ގައިދީންނާއި ޖަލު އޮފިސަރުންގެ ކުރިއެރުމަށް އަމާޒުކޮށްގެން އަލަށް ފަށާ 10 ކޯހެއް މި ރަސްމިއްޔާތުގައި ވަނީ ރަސްމީކޮށް އިފްތިތާހުކޮށްފައެވެ. މީގެ ތެރޭގައި ދީނީ އިލްމާއި، ފަންނީ މަސައްކަތްތެރިކަމުގެ އިތުރުން މެނޭޖްމަންޓް ދާއިރާގެ ކޯސްތައް ހިމެނެއެވެ.
އަލަށް ތައާރަފްކުރި ކޯސްތަކުގެ ތެރޭގައި ގިރާއާތު ކޯހުގެ ތިން ލެވެލް އަކާއި، ކަރެކްޝަނަލް މެނޭޖްމަންޓްގެ ޑިޕްލޮމާ އަދި ސެޓްފިކެޓް ލެވެލްތައް ހިމެނެއެވެ. މީގެ އިތުރުން ޕްރިޒަން އިންޓެލިޖެންސް، ހައުސް ވަޔަރިން، ދަނޑުވެރިކަން، އަދި ފެހުމުގެ ދާއިރާއިން ސެޓްފިކެޓް ލެވެލްގެ ތަމްރީނުތައް ހިމެނެއެވެ. އަދި މަތީ ތައުލީމަށް މަގުފަހިކުރުމަށް ޔުނިވަރސިޓީ ޕްރިޕްރޭޝަން ޕްރޮގްރާމެއް ވެސް ވަނީ ހިމަނާފައެވެ.
މޯލްޑިވްސް ކަރެކްޝަނަލް ސަރވިސް އިން ހާމަކުރި ގޮތުގައި، މިފަދަ ތަމްރީނުތަކުގެ މައިގަނޑު މަގްސަދަކީ ގައިދީން އިސްލާހުކޮށް، އެމީހުން އަނބުރާ މުޖުތަމައަށް ނުކުންނައިރު އަމިއްލަ ފައިމައްޗަށް ތެދުވެވޭނެ ފަދަ ބޭނުންތެރި، މަސައްކަތްތެރި ބަޔަކަށް ހެދުމެވެ. މި ޕްރޮގްރާމްތަކަކީ ގައިދީން ރިހެބިލިޓޭޓް ކުރުމަށް ކުރެވޭ މުހިންމު މަސައްކަތްތަކެއްގެ ގޮތުގައި އެ ސަރވިސްއިން ފާހަގަކުރެއެވެ.