ރާއްޖޭގެ މަރުކަޒީ ބޭންކު، މޯލްޑިވްސް މަނިޓަރީ އޮޓޯރިޓީ (އެމްއެމްއޭ) ގެ ފަރާތުން މަތީ ތައުލީމަށް ހާއްސަ ސްކޮލާޝިޕްތަކަކަށް ކުރިމަތިލުމުގެ ފުރުސަތު މިއަދު އާންމުކޮށް ހުޅުވާލައިފިއެވެ. މިއީ ރާއްޖޭގެ މާލީ އަދި އިގްތިސާދީ ދާއިރާ އިތުރަށް ހަރުދަނާކުރުމަށް ބޭނުންވާ ފަންނީ މީހުން ބިނާކުރުމުގެ މަގްސަދުގައި ދޭ ފުރުސަތުތަކެކެވެ.
މި ޕްރޮގްރާމްގެ ދަށުން ބެޗްލާސް ޑިގްރީން ފެށިގެން ޕީއެޗްޑީއާ ހަމައަށް ކިޔެވުމުގެ ފުރުސަތު ވަނީ ހުޅުވާލާފައެވެ. މި ސްކޮލާޝިޕްތައް ހަމަޖެހިފައިވަނީ މެލޭޝިޔާގެ ފާހަގަކޮށްލެވޭ ޔުނިވާސިޓީތަކުންނެވެ. އެގޮތުން ހުޅުވާލާފައިވާ ދާއިރާތަކަކީ:
- ބެޗްލަރ އޮފް އެކައުންޓިން: ސެލަންގޯ އިސްލާމިކް ޔުނިވަާސިޓީ
- މާސްޓާ އޮފް ލޯސް އަދި މާސްޓާ އޮފް އިކޮނޮމިކްސް: އިންޓަނޭޝަލް އިސްލާމިކް ޔުނިވާސިޓީ
- ޕީއެޗްޑީ (އިސްލާމިކް ފައިނޭންސް ނުވަތަ އެޕްލައިޑް މުއާމަލާތު): އިންސީފް ޔުނިވާސިޓީ
މި ސްކޮލާޝިޕްތަކަށް ހޮވޭ ދަރިވަރުންގެ ކޯސް ފީގެ އިތުރުން ގިނަ ހަރަދުތަކެއް އެމްއެމްއޭއިން އުފުލުމަށް ވަނީ ނިންމާފައެވެ. މީގެ ތެރޭގައި ޓިއުޝަން ފީ، ދިރިއުޅުމުގެ ހަރަދު، ފޮތް ގަތުމަށް ދޭ އެލަވަންސް، އެސްޓެބްލިޝްމަންޓް އެލަވަންސް އަދި ޑިޕާޗާ އެލަވަންސް ހިމެނެއެވެ. މީގެ އިތުރުން ވިސާގެ ހަރަދާއި ހެލްތު އިންޝުއަރެންސްވެސް މި ސްކޮލާޝިޕްގެ ދަށުން ހަމަޖައްސައިދޭނެއެވެ.
އެމްއެމްއޭއިން ހާމަކުރި ގޮތުގައި މި ސްކޮލާޝިޕްތަކުގައި ކިޔަވާ ދަރިވަރުން ކިޔަވައި ނިމުމަށްފަހު މަދުވެގެން 5 އަހަރު ދުވަހުގެ މުއްދަތަށް ރާއްޖެއަށް ޚިދުމަތް ކުރުމަށް ބޮންޑު ކުރެވޭނެއެވެ. މިއީ ދައުލަތުގެ މާލީ ނިޒާމަށް ބޭނުންވާ ގާބިލު މީހުން ރާއްޖޭގައި ބޭތިއްބުމަށް އެޅޭ މުހިންމު ފިޔަވަޅެކެވެ.
މި ފުރުސަތުތަކަށް ޝައުގުވެރިވާ ފަރާތްތަކުން މިމަހުގެ 30 ވާ އާދީއްތަ ދުވަހުގެ މެންދުރުފަހު 14:00 ގެ ކުރިން އެމްއެމްއޭއިން ކަނޑައަޅާފައިވާ އުސޫލުތަކާ އެއްގޮތަށް ފޯމު ހުށަހަޅަން ޖެހޭނެއެވެ.