ފީފާ ވޯލްޑް ކަޕްގައި ވީޑިއޯ އެސިސްޓަންޓް ރެފްރީ (VAR) އެއްގެ ގޮތުގައި މަސައްކަތްކުރާ އޮސްޓްރޭލިއާގެ ރެފްރީ، ޝޯން އިވަންސް، ނަސްލީ ތަފާތުކުރުމުގެ ރަމްޒެއް ދެއްކި ކަމަށް ބުނެ އުފެދުނު ބޮޑު ހޫނުގަނޑަކަށްފަހު، އާންމުކޮށް މާފަށް އެދުމުން އޭނާ ގެއަށް ފޮނުވާނުލުމަށް ފީފާއިން ނިންމައިފިއެވެ.
މި މައްސަލަ ފެންމަތިވީ ޖަރުމަނާއި ޑަލަސް ބައްދަލުކުރި މެޗުގެ ކުރިން އިވަންސް އޭނާގެ ކަނާތުން “ވައިޓް ޕަވަރ” ނުވަތަ ނަސްލީ ތަފާތުކުރުމަށް ހިތްވަރުދޭ ރަމްޒެއް ކުރި ކަމަށް ބުނެ ކުރެވުނު ތުހުމަތުތަކާ ގުޅިގެންނެވެ. މިކަމާ ގުޅިގެން ނަސްލީ ތަފާތުކުރުންތަކާ ދެކޮޅަށް މަސައްކަތްކުރާ ޖަމިއްޔާތަކުން ވަނީ އޭނާ މުބާރާތުން ވަކިކޮށް، ވަގުތުން ފޮނުވާލުމަށް ފީފާއަށް ގޮވާލާފައެވެ.
ނަމަވެސް، ފީފާގެ އިސްވެރިން މި މައްސަލަ ކުއްލި ގޮތަކަށް ތަހުގީގު ކުރުމަށްފަހު ނިންމާފައިވަނީ އޭނާއަށް މުބާރާތުގައި ކުރިއަށް ދިއުމުގެ ފުރުސަތު ދިނުމަށެވެ. އިވަންސް ބުނި ގޮތުގައި އޭނާ ކުރި އިޝާރާތަކީ އެއްވެސް މާނައެއް އޮވެގެން ކުރި ކަމެއް ނޫނެވެ. އަދި އެއީ އޭނާގެ ވޯލްޑް ކަޕްގެ ފުރަތަމަ މެޗަށް ވުމުން، ހާސްވެފައި ހުރުމުގެ ސަބަބުން ކުރެވުނު ކަމެއް ކަމަށް އޭނާ ވަނީ ބުނެފައެވެ.
މިކަމާ ގުޅިގެން އިވަންސް ނެރުނު ބަޔާނެއްގައި ބުނެފައިވަނީ، “އަހަރެން ސާފުކޮށްދޭން ބޭނުންވަނީ، އެއްވެސް ކަހަލަ މެސެޖެއް، ގުޅުމެއް ނުވަތަ ގަބޫލުކުރުމެއް ދެއްކުމުގެ ގަސްތުގައި އެއްވެސް އަތުގެ އިޝާރާތެއް ނުވަތަ ރަމްޒެއް ބޭނުންކޮށްފައި ނުވާނެ ކަމަށް،” ކަމަށެވެ.
އޭނާ އިތުރަށް ބުނީ، “މިކަމުގައި އަހަންނަށް ދެއްކޭނެ ހަމައެކަނި އުޒުރަކީ، އެއީ އަމިއްލަ އިޚްތިޔާރުން ބޭރުގައި، ނޭނގި ހުރެ އަތަށް އައި ލޮޅުމެއް (twitch) ކަމަށް. އެ ވަގުތު އެފަދަ ކަމެއް ކުރެވުނުކަންވެސް އަހަންނަށް ނޭނގޭ،” ކަމަށެވެ.
ފީފާއިން މި މައްސަލަ ބެލުމަށްފަހު އޭނާގެ މާފު ގަބޫލުކޮށްފައިވަނީ، އެއީ ގަސްތުގައި ކުރި ކަމެއް ނޫން ކަމަށް ބަލައިފައެވެ. އެހެންކަމުން، މި ހާދިސާއާއެކުވެސް އިވަންސް މުބާރާތުގެ ކުރިއަށް ހުރި މެޗުތަކުގައި VAR ރެފްރީއެއްގެ ގޮތުގައި ފެނިގެންދާނެއެވެ.