2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް ސްޓޭޖުގައި އެންމެ ގިނަ ބަޔަކު އިންތިޒާރުކުރާ އެއް މެޗު މިއަދު ނިއު ޖާރޒީގެ މެޓްލައިފް ސްޓޭޑިއަމްގައި ބައްދަލު ކުޅޭނެއެވެ. ގްރޫޕް “އައި” ގެ މި ފޯރިގަދަ ކުރިމަތިލުމުގައި ބައްދަލުކުރާނީ ދުނިޔޭގެ ފުޓްބޯޅައިގެ ދެ ބާރު ކަމަށްވާ ފްރާންސާއި ސެނެގާލެވެ.
މި މެޗަކީ ތާރީޚީ ގޮތުން ބަލާއިރު ވަރަށް މުހިންމު މެޗެކެވެ. މިއީ 2002 ވަނަ އަހަރުގެ ވޯލްޑް ކަޕަށްފަހު މި ދެ ގައުމު މި މުބާރާތުގައި ބައްދަލުކުރާ ފުރަތަމަ ފަހަރެވެ. 2002 ވަނަ އަހަރުގެ ވޯލްޑް ކަޕް ހުޅުވި މެޗުގައި ސެނެގާލުން ވަނީ އޭރުގެ ޗެމްޕިއަން ފްރާންސް 1-0 އިން ބަލިކޮށް، ދުނިޔެ ސިއްސުވާލާފައެވެ. ޚާއްސަ ކަމަކީ، އޭރު ސެނެގާލް ޓީމުގައި ހިމެނުނު ޕާޕޭ ތިއޯ މިހާރު ހުރީ އެ ގައުމުގެ ކޯޗުގެ މަގާމުގައެވެ.
މިއަދުގެ މެޗަށް ދެ ޓީމުން ނުކުންނައިރު، ދުނިޔޭގެ ފެންވަރުގެ މޮޅު ކުޅުންތެރިން ފެނިގެންދާނެއެވެ. ފްރާންސް ޓީމުގެ ކެޕްޓަން ކީލިއަން އެމްބާޕޭ އާއި އޮސްމާނޭ ޑެމްބެލޭގެ ހަމަލާތައް ހުއްޓުވުމަށް، ސެނެގާލްގެ ތަޖުރިބާކާރު ޑިފެންޑަރު ކަލިދޫ ކުލިބާލީ އާއި ގޯލްކީޕަރު އެޑޮއާޑް މެންޑީ އަށް ބޮޑު ޒިންމާއެއް އޮންނާނެއެވެ. މީގެ އިތުރުން މެދުތެރޭގައި ފްރާންސްގެ އެންގޯލޯ ކާންޓޭ އާއި ސެނެގާލްގެ ޕާޕޭ މަޓާ ސާރްގެ ކުރިމަތިލުންތައް ވެގެންދާނީ މެޗުގެ ނަތީޖާ އަނބުރާލާނެ ކަންތައްތަކަށެވެ.
ނިއު ޔޯކް ނިއު ޖާރޒީ ސްޓޭޑިއަމްގައި ކުޅޭ މި މެޗު ފެށުމަށް ހަމަޖެހިފައިވަނީ ރާއްޖެ ގަޑިން ދަންވަރު 12:00 ގައެވެ. މި ގްރޫޕްގައި ނޯވޭ އާއި އިރާގުވެސް ހިމެނޭއިރު، މުބާރާތުގެ ދެވަނަ ބުރަށް ދިއުމަށް މިއަދުގެ މެޗުން ތިން ޕޮއިންޓް ހޯދުމަކީ ދެ ގައުމަށްވެސް ނުހަނު ބޭނުންތެރި ކަމެކެވެ.