މަސްތުވާތަކެތި ބޭނުންކުރުމުގެ ހިދުމަތް ނުވަތަ "ކެފޭ އުސޫލުން" މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި އައްޑޫސިޓީގެ މަރަދޫފޭދޫގައި ހުރި ގެއެއް ކޯޓު އަމުރެއްގެ ދަށުން ފުލުހުން ބަންދުކޮށްފިއެވެ. ފުލުހުން ހާމަކުރި ގޮތުގައި މިގޮތަށް ބަންދުކޮށްފައިވަނީ ސ. މަރަދޫފޭދޫ، އުއްމީދުގެއެވެ.
މި ގެ ބަންދުކުރުމަށް މަރަދޫފޭދޫ މެޖިސްޓްރޭޓް ކޯޓުން އަމުރު ނެރެފައިވަނީ 15 ޖޫން 2026 އިން ފެށިގެން 90 ދުވަހުގެ މުއްދަތަށެވެ. މިއީ މަސްތުވާތަކެތީގެ އައްޑާތައް ހުއްޓުވުމަށް ފުލުހުން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.
މަސްތުވާތަކެތީގެ އައްޑާތައް ބަންދުކުރުމުގެ ސިލްސިލާގެ ތެރެއިން އެންމެ ފުރަތަމަ ކޯޓު އަމުރެއްގެ ދަށުން ތަނެއް ބަންދުކުރީ މިދިޔަ މެއި މަހުގެ 5 ވަނަ ދުވަހުއެވެ. އެއީ މާލޭގެ ހ. ގުންޒަރު 90 ދުވަހަށް ބަންދުކުރުމަށް ކްރިމިނަލް ކޯޓުން ނެރުނު އަމުރެކެވެ. މީގެ އިތުރުން ފުވައްމުލައް ސިޓީގެ ފުނާޑު، ގުލިސްތާނުގެ ވެސް 85 ދުވަހުގެ މުއްދަތަށް ބަންދުކުރުމަށް އެ ސިޓީގެ މެޖިސްޓްރޭޓް ކޯޓުން ވަނީ އަމުރުކޮށްފައެވެ.
ފުލުހުން ވިދާޅުވި ގޮތުގައި ކޯޓު އަމުރެއްގެ ދަށުން ބަންދުކޮށްފައިވާ މިފަދަ ތަންތަނަށް، އަމުރުގެ މުއްދަތުގައި ހުއްދައަކާ ނުލައި ވަދެނިކުމެ ހެދުމަކީ ކުށެކެވެ. "މިފަދަ ތަންތަނަށް ހުއްދައާ ނުލައި ވަންނަ ފަރާތްތަކާއި، އެ ތަންތަނަށް އެކި ގޮތްގޮތުން ގެއްލުންދޭ ފަރާތްތަކާ މެދު ގާނޫނީ ގޮތުން އެޅޭނެ އެންމެ ހަރުކަށި ފިޔަވަޅު އަޅާނަން،" ފުލުހުން އިންޒާރު ދެއްވާފައިވެއެވެ.
މަސްތުވާތަކެއްޗާ ބެހޭ ގާނޫނުން ފުލުހުންނަށް ލިބިދީފައިވާ ބާރުގެ ދަށުން، މަސްތުވާތަކެތީގެ ވިޔަފާރިކޮށް، އެފަދަ ހިދުމަތްތައް ދޭ ތަންތަން ހޯދައި ބަންދުކުރުމުގެ މަސައްކަތް ހުއްޓުމެއްނެތި ކުރިއަށް ގެންދާނެ ކަމަށް ވެސް ފުލުހުން ވަނީ ވިދާޅުވެފައެވެ.