ރާއްޖޭގެ ފަތުރުވެރިކަމުގެ ދާއިރާގައި ބޭނުންކޮށްފައިވާ އާކިޓެކްޗަރަލް ފަރުމާތަކާއި އޭގެ މުއްސަނދި ތާރީޚު ދައްކާލުމަށް ބޭއްވި “މޯލްޑިވިއަން ރިސޯޓު އާކިޓެކްޗާ: އައިޑެންޓިޓީ، މެމަރީ އެންޑް ލެގަސީ” މައުރަޒު އިއްޔެ ކާމިޔާބުކަމާއެކު ނިންމާލައިފިއެވެ. މި މަހުގެ 2 އިން 18 އަށް ނޭޝަނަލް އާޓް ގެލެރީގައި ކުރިއަށްދިޔަ މި މައުރަޒަކީ ރާއްޖޭގެ އިމާރާތްކުރުމުގެ ފަންނުގެ ތަޖުރިބާކާރު މައުރޫފު ޖަމީލުގެ މަސައްކަތްތައް ދައްކާލުމަށް ބޭއްވި މައުރަޒެކެވެ.
މި މައުރަޒު ނިމުމުގެ ކުރިން ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވަނީ މައުރަޒަށް ޒިޔާރަތްކުރައްވައި، އެތަނުގައި ހުރި އާޓްވޯކްތައް ބައްލަވާލައްވާފައެވެ. މި މައުރަޒުގައި 1972 ވަނަ އަހަރުން ފެށިގެން 2021 ވަނަ އަހަރާ ހަމައަށް ރާއްޖޭގެ ރިސޯޓުތަކުގެ އާކިޓެކްޗާއަށް އައިސްފައިވާ ބަދަލުތައް ތަރުތީބީ ގޮތެއްގައި ވަނީ ދައްކާލާފައެވެ.
މައުރަޒަށް ކުރެއްވި ޒިޔާރަތަށްފަހު ވަޒީރު ހީނާ ވަލީދު ވިދާޅުވީ، “މިފަދަ އެގްޒިބިޝަނެއް ބޭއްވުމުގެ އެންމެ ބޮޑު އެއް ބޭނުމަކީ ރާއްޖޭގެ ރިސޯޓު އާކިޓެކްޗާގެ ކުރީކޮޅުގެ އުފެއްދުންތަކަކީ ތާރީޚުގެ ވަރަށް މުހިންމު ބައެއްކަން އަންގައިދިނުން” ކަމަށެވެ. މި މައުރަޒުގެ ސަބަބުން ރާއްޖޭގެ ރިސޯޓު އާކިޓެކްޗާގެ މުއްސަނދިކަން އާންމުންނަށް އެނގި، މި ދާއިރާގެ ކުރެހުންތަކާއި ފަރުމާތައް ތާރީޚަށްޓަކައި ރައްކާކުރުމަށް މަގުފަހިވެގެންދާނެކަން ވަޒީރު ފާހަގަކުރެއްވިއެވެ.
މައުރަޒުގައި ދައްކާލި ތަކެތީގެ ތެރޭގައި މައުރޫފްގެ އަމިއްލަ އާކިޓެކްޗަރަލް ކުރެހުންތަކުގެ އިތުރުން، ރިސޯޓުތަކުގެ ފްލޯ ޕްލޭންތަކާއި، ކުރީގެ ބައެއް ފޮޓޯތަކާއި، ކުދި ތްރީޑީ (3D) މޮޑެލްތައް ހިމެނެއެވެ. ޚާއްޞަކޮށް، ފާއިތުވި ވިއްސަކަށް އަހަރުގެ ތެރޭގައި ރިސޯޓުތަކުން ނެތިގެން ގޮސްފައިވާ ބައެއް މުހިންމު އާކިޓެކްޗަރަލް ފަރުމާތަކުގެ މޮޑެލްތައް ފެންނަން ހުއްޓެވެ.
އިމާރާތް ކުރުމާއި ފަރުމާކުރުމުގެ ދާއިރާއިން ޝަރަފުވެރިކަމުގެ ޤައުމީ އިނާމު ލިބިވަޑައިގެން ހުންނެވި މައުރޫފު ޖަމީލު ފާހަގަކުރެއްވި ގޮތުގައި، މި މައުރަޒަށް ގިނަ އަދަދެއްގެ އާންމުންނާއި ދާއިރާގެ މާހިރުންގެ ބޮޑު ތަރުހީބެއް ވަނީ ލިބިފައެވެ. މިއީ ރާއްޖޭގެ ފަތުރުވެރިކަމުގެ އާކިޓެކްޗަރަލް ތާރީޚު ދިރުވައި އަންނަން އޮތް ޖީލުތަކަށް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.