2026 ވަނަ އަހަރުގެ ފީފާ ވޯލްޑް ކަޕްގައި ރޭ ކުޅުނު މެޗުގައި ހެއިޓީގެ މައްޗަށް 3-0 ގެ ނަތީޖާއަކުން ކުރިހޯދައި، ބްރެޒިލުން މިފަހަރުގެ މުބާރާތުގެ ފުރަތަމަ މޮޅު ހޯދައިފިއެވެ. ފިލަޑެލްފިއާ ސްޓޭޑިއަމްގައި ކުޅުނު މި މެޗުން މޮޅުވުމާއެކު، ކާލޯ އަންޗެލޮޓީގެ އިރުޝާދުގެ ދަށުން ކުޅޭ ބްރެޒިލް ވަނީ ގްރޫޕް ސީގެ އެއްވަނައަށް ޖެހިލާފައެވެ.
މި މެޗުގައި ބްރެޒިލްގެ މެތިއަސް ކޫންޔާ ދެ ލަނޑު ކާމިޔާބުކުރިއިރު، އަނެއް ލަނޑު ޖަހައިދިނީ ވިނީޝިއަސް ޖޫނިއަރެވެ. މެޗުގެ ފުރަތަމަ ލަނޑު ކޫންޔާ ކާމިޔާބުކުރީ 23 ވަނަ މިނެޓުގައެވެ. އޭގެ އިރުކޮޅެއް ފަހުން ވިނީޝިއަސް ދިން ބޯޅައަކުން ކޫންޔާ ވަނީ ބްރެޒިލްގެ ދެވަނަ ލަނޑު ޖަހައި ލީޑު ފުޅާކޮށްދީފައެވެ. ބްރެޒިލްގެ ތިންވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ޖަހައިދިނީ ވިނީޝިއަސްއެވެ.
މި މެޗުގައި ބްރެޒިލްގެ ޒުވާން ތަރި އެންޑްރިކް ވަނީ ބަދަލު ކުޅުންތެރިއެއްގެ ގޮތުގައި ކުޅެން އަރައި، އޭނާގެ ފުރަތަމަ ވޯލްޑް ކަޕް މެޗު ކުޅެފައެވެ. އެންޑްރިކް ލަނޑެއް ޖެހި ނަމަވެސް، އޮފްސައިޑްވުމުގެ ސަބަބުން އެ ލަނޑު ބަލައިގެންފައެއް ނުވެއެވެ.
މި މެޗުން މޮޅުވި ނަމަވެސް، ބްރެޒިލަށް އޮތް އެންމެ ބޮޑު ކަންބޮޑުވުމަކީ މެޗުގެ 40 ވަނަ މިނެޓުގައި އަނިޔާގެ ސަބަބުން ރަފީނިއާ ބަދަލުކުރަން ޖެހުމެވެ. ބެލެވޭ ގޮތުގައި އޭނާގެ ފައިގެ ފަލަމަސްގަނޑަށް ވަނީ އަނިޔާވެފައެވެ.
ތަފާސްހިސާބުތަކަށް ބަލާއިރު، ވިނީޝިއަސް ވަނީ މި މުބާރާތުގެ ފުރަތަމަ ދެ މެޗުގައި ތިން ލަނޑު (ދެ ލަނޑާއި އެއް އެސިސްޓް) ގައި ބައިވެރިވެފައެވެ. މިއީ 21 ވަނަ ގަރުނުގައި ބްރެޒިލްގެ ކުޅުންތެރިއަކު މިފަދަ ކާމިޔާބީއެއް ހޯދި ތިންވަނަ ފަހަރެވެ. މީގެ ކުރިން މި ޝަރަފު ހޯދާފައިވަނީ 2002 ވަނަ އަހަރު ރިވާލްޑޯ އަދި 2010 ވަނަ އަހަރު އެލާނޯއެވެ.
މީގެ އިތުރުން، ބްރެޒިލްގެ ޑިފެންސްލައިނުން ވަނީ ފުރަތަމަ ހާފުގައި ހެއިޓީއަށް އެންމެ ހަމަލާއެއްވެސް އަމާޒުކުރިޔަ ނުދީ ހިފަހައްޓާފައެވެ. މިއީ 1990 ވަނަ އަހަރު ސްކޮޓްލޭންޑާ ދެކޮޅަށް ކުޅުނު މެޗަށްފަހު، ވޯލްޑް ކަޕް މެޗެއްގެ ފުރަތަމަ ހާފުގައި އިދިކޮޅު ޓީމަށް އެންމެ ހަމަލާއެއްވެސް އުފެއްދިޔަ ނުދީ ބްރެޒިލުން ހިފެހެއްޓި ފުރަތަމަ ފަހަރެވެ.