ސިއެޓްލް ސްޓޭޑިއަމްގައި ކުޅުނު ފޯރިގަދަ މެޗުގައި 2-0 އިން އޮސްޓްރޭލިއާ ބަލިކޮށް، އެމެރިކާ އިން ވޯލްޑް ކަޕްގެ ގަދަ 32 ގެ ޖާގައެއް ކަށަވަރުކޮށްފިއެވެ. ގްރޫޕް ޑީގައި ކުޅުނު ފުރަތަމަ ދެ މެޗުން ވެސް މޮޅުވެ، އެމެރިކާ މިވަނީ ތާރީޚީ ކާމިޔާބީއެއް ހޯދާފައެވެ.
މެޗު ފެށިގެން 40 ވަނަ ސިކުންތުގައި އޮސްޓްރޭލިއާގެ މުޙައްމަދު ތޫރޭއަށް ލަނޑު ޖަހާނެ ރަނގަޅު ފުރުސަތެއް ލިބުނު ނަމަވެސް، އެމެރިކާގެ ކީޕަރު މެޓް ފްރީޒް ވަނީ އެ ހަމަލާ ހުށިޔާރުކަމާއެކު ދިފާއުކޮށްފައެވެ. އެމެރިކާއިން މެޗުގެ ލީޑު ނެގީ 11 ވަނަ މިނެޓުގައެވެ. ފޮލަރިން ބަލޯގަން ތަނަވަސްކޮށްދިން ފުރުސަތެއްގައި އޮސްޓްރޭލިއާގެ ކެމަރަން ބާޖެސް އަތުން ބައިކޮށް ވަން މި ލަނޑަކީ އެމެރިކާއަށް ލިބުނު ވަރަށް ބޮޑު ހިތްހަމަޖެހުމެކެވެ.
އެމެރިކާގެ ދެވަނަ ލަނޑު ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ކާމިޔާބުކޮށްދިނީ ޑިފެންޑަރު އެލެކްސް ފްރީމަންއެވެ. ސާޖީނިއޯ ޑެސްޓް ފޮނުވާލި ހަމަލާއެއް ރީބައުންސްވެގެން އައި ވަގުތު ފްރީމަން ވަނީ ބޮލުން ބޯޅަ ގޯލުގެ ތެރެއަށް ފޮނުވާލާފައެވެ. މިއީ 1994 ވަނަ އަހަރަށްފަހު ވޯލްޑް ކަޕެއްގައި އެމެރިކާގެ ޑިފެންޑަރަކު ޖެހި ދެވަނަ ލަނޑެވެ.
އަނިޔާގެ ސަބަބުން ޓީމުގެ ތަރި ކްރިސްޓިއަން ޕުލިސިކް ނުލައި ކުޅުނު ނަމަވެސް، އެމެރިކާގެ ކުޅުމަށް މާބޮޑު ބަދަލެއް ނާދެއެވެ. ޕުލިސިކްގެ ބަދަލުގައި ކުޅުނު ރިކާޑޯ ޕެޕީ އާއި އެހެން ކުޅުންތެރިން ވަނީ އޮސްޓްރޭލިއާގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ.
މި މުބާރާތުގައި މިހާތަނަށް އެމެރިކާއިން ވަނީ 6 ލަނޑު ޖަހާފައެވެ. މިއީ އެ ގައުމުން 1930 އަދި 2002 ވަނަ އަހަރުގެ ވޯލްޑް ކަޕްގައި ހެދި 7 ލަނޑުގެ ރެކޯޑާ އަރާ ހަމަކުރުމަށް ބޭނުންވަނީ އެންމެ ލަނޑެކެވެ.
ގްރޫޕްގެ ފަހު މެޗުގައި އެމެރިކާ ބައްދަލުކުރާނީ ތުރުކީއާއެވެ. އަދި އޮސްޓްރޭލިއާއަށް މުބާރާތުގައި ކުރިއަށް ދިއުމަށް އޮތް ފަހު ފުރުސަތަކީ ޖޫން 25 ގައި ޕެރަގުއޭއާ ދެކޮޅަށް ކުޅޭ މެޗުން މޮޅުވުމެވެ.