އިންޑިއާގެ މަހާރާޝްތުރާ އަށް އުފަން ސިންދުތައި ސަޕްކަލް އަކީ މުޅި ދުނިޔެ ދަންނަ އިންސާނީ ޚިދުމަތްތެރިއެކެވެ. "ޔަތީމުންގެ މަންމަ" ގެ ނަމުން މަޝްހޫރުވި ސިންދުތައިގެ ދިރިއުޅުމަކީ ހިތްދަތިކަމާއި، ބާކީވުމާއި، އަދި އެހެން މީހުންނަށްޓަކައި ގުރުބާނީގެ އާދަޔާޚިލާފު ނަމޫނާއެކެވެ. 14 ނޮވެމްބަރު 1948 ގައި ވަރުދާ ޑިސްޓްރިކްޓްގެ ޕިޕްރީ މޭގޭ އަށް އުފަންވި ސިންދުތައި އަކީ އާއިލާއަށް ބޭނުންނުވި ކުއްޖެކެވެ. މި ސަބަބަށްޓަކައި އޭނާއަށް އާއިލާއިން ދީފައިވާ ނަމަކީ "ޗިންދީ" އެވެ. މަރާޓީ ބަހުން މި ނަމުގެ މާނައަކީ "ކަރުދާސް ކޮޅެއް" ނުވަތަ "ނުކަަނޑާ ބާކީ އޮންނަ ފޮތިކޮޅެއް" އެވެ. ނިކަމެތި ފަގީރު އާއިލާއަކަށް އުފަންވި ނަމަވެސް، އޭނާގެ ބައްޕަ އަބިމަންޔޫ ސާތޭ ބޭނުންވީ ސިންދުތައި އަށް އުނގަންނައިދޭށެވެ. ނަމަވެސް އޭނާގެ މަންމަގެ ނުރުހުމާއި، ގޭތެރޭގެ މަސައްކަތްތައް ހުރި ގޮތުން ސިންދުތައި އަށް ތައުލީމު ހާސިލުކުރެވުނީ އެންމެ ހަތަރު ވަނަ ކުލާހާ ހަމައަށެވެ.
ސިންދުތައިގެ އުމުރުން އެންމެ 12 އަހަރުގައި، އޭނާއަށްވުރެ 20 އަހަރު ދޮށީ މީހެއް ކަމަށްވާ ސްރީހަރީ ސަޕްކަލް އާ ކައިވެނި ކުރެވުނެވެ. މި ކައިވެންޏަކީ އޭނާގެ ދިރިއުޅުމުގެ އެންމެ އަނދިރި ދުވަސްތަކުގެ ފެށުމެވެ. އުމުރުން އެންމެ 20 އަހަރުގައި، ނުވަ މަހުގެ ބަނޑަކާއެކު، ފިރިމީހާ އޭނާއަށް އަނިޔާކޮށް ގެއިން ބޭރުކޮށްލިއެވެ. ސިންދުތައި އޭނާގެ ފުރަތަމަ ދަރިފުޅު ވިހެއީ ގެރިކޮށްޓެއްގެ ތެރޭގައެވެ. އެއްވެސް އެހީތެރިއަކާނުލައި އެކަންޏެވެ. އެ ދުވަހު އަމިއްލަ ނަފްސާއި ދަރިފުޅުގެ ފުރާނަ ސަލާމަތް ކުރުމަށްޓަކައި، ބަނޑުހައިހޫނުކަމުގައި ސަލާންޖަހަން އޭނާއަށް މަޖުބޫރުވިއެވެ. މި ދަތި އުނދަގޫ ވަގުތުތަކުގައި ސިންދުތައި އަށް ފެނިގެންދިޔައީ އޭނާ ފަދައިން ބާކީވެފައި ތިބި އެތައް ކުޑަކުދިންނެކެވެ. އެހިސާބުން އޭނާގެ އަމިއްލަ ހިތާމަތައް އެއްފަރާތްކޮށް، އެހެން މީހުންނަށް އެހީތެރިވުމުގެ އަޒުމް ކަނޑައެޅިއެވެ.
ސިންދުތައިގެ އިންސާނީ ޚިދުމަތުގެ ފެށުމަކީ ރޭލު ދަތުރުކުރާ ސަރަހައްދުތަކާއި މަގުމަތީގައި ސަލާންޖަހައިގެން ލިބޭ ފައިސާއިން އެހެން ޔަތީމު ކުދިންނަށް ކާންބޯން ދިނުމެވެ. އޭނާ ބޭނުންވީ އެއްވެސް ކުއްޖަކީ "އާއިލާއަށް ބޭނުންނުވާ" ކުއްޖަކަށް ވިޔަނުދިނުމަށެވެ. މި މަސައްކަތް އިތުރަށް ފުޅާކުރުމަށްޓަކައި، އޭނާގެ އަމިއްލަ ދަރިފުޅާއި އެހެން ކުދިންނާ ދެމެދު ތަފާތުކުރުމެއް އަތުވެދާނެތީ، އަމިއްލަ ދަރިފުޅު ޕޫނޭގެ ޓްރަސްޓަކާ ހަވާލުކުރިއެވެ. މިއީ މުޅި ދުނިޔެއަށް އޭނާ ދެއްކި ލާމަސީލު މިސާލެކެވެ. އޭނާގެ މުޅި އުމުރު ހުސްކޮށްލީ އާއިލާއެއް ނެތް، އަޅާލާނެ މީހަކު ނެތް ކުދިންނަށް އުންމީދެއް ހޯދައިދިނުމަށެވެ.
ގަބީލާތަކުގެ ހައްގުތަކާއި އިންސާނީ ކަރާމާތަށްޓަކައި ކުރި މަސައްކަތްތައް
ސިންދުތައި ސަޕްކަލްގެ ޚިދުމަތްތައް ހަމައެކަނި ޔަތީމު ކުދިން ބެލެހެއްޓުމާ ހިސާބުން ނުނިމެއެވެ. އޭނާ ވަނީ އިންޑިއާގެ މަހާރާޝްތުރާގެ އަމްރަވަތީ ޑިސްޓްރިކްޓްގައި އޮންނަ މެލްގަޓް ސަރަހައްދުގެ ގަބީލާތަކުގެ (Adivasis) ހައްގުތަކަށްޓަކައި ވަރުގަދަ ޖިހާދެއް ކޮށްފައެވެ. އެ ސަރަހައްދުގައި ހިންގުނު "ޓައިގަރ ޕްރޮޖެކްޓް" އެއްގެ ސަބަބުން 84 އަވަށެއްގެ މީހުން އެ ސަރަހައްދުން ބޭރުކޮށްލަން ޖެހުނު ވަގުތު، އެ ނިކަމެތި ރައްޔިތުންގެ ހައްގުގައި އަޑުއުފުލީ ސިންދުތައި އެވެ. ސަރުކާރުގެ އިސް އޮފިޝަލުންނާއި ވަޒީރުންނާ ބައްދަލުކޮށް، އެ މީހުންނަށް ބަދަލު ދިނުމަށާއި އެކަށީގެންވާ ބޯހިޔާވަހިކަން ފޯރުކޮށްދިނުމަށް އޭނާ ވަނީ ބާރުއަޅާފައެވެ.
މި މުޒާހަރާތަކުގެ ތެރޭގައި އޭނާ އޭރުގެ އިންޑިއާގެ ބޮޑުވަޒީރު އިންދިރާ ގާންދީއާ ވެސް ބައްދަލުކުރިއެވެ. ސިންދުތައި ބޮޑުވަޒީރަށް ދެއްކީ ވަލު ޖަނަވާރެއްގެ ހަމަލާއަކުން ލޯ ފިސްފިސްވެފައިވާ ގަބީލާގެ މީހެއްގެ ފޮޓޯއެކެވެ. އޭނާ ސުވާލުކުރީ ޖަނަވާރަކު ގެރިއެއް ނުވަތަ ކުކުޅެއް މަރާލުމުން ސަރުކާރުން ބަދަލުދޭއިރު، އިންސާނަކަށް ލިބޭ މިފަދަ ބޮޑެތި ގެއްލުންތަކަށް ބަދަލު ނުދެނީ ކީއްވެގެންތޯއެވެ؟ މި ސުވާލުގެ ނަތީޖާއަކަށްވީ ބޮޑުވަޒީރު ވަގުތުން އެކަމަށް ބަދަލު ދިނުމަށް އަމުރުކުރެއްވުމެވެ. މިއީ ސިންދުތައިގެ ހިތްވަރާއި، އޭނާގެ ބަސްމަގުގައި ހުރި ބާރު ދޭހަކޮށްދޭ ކަމެކެވެ.
ގަބީލާތަކުގެ ކުދިންނަށް ތައުލީމާއި ސިއްހީ އެހީތެރިކަން ފޯރުކޮށްދިނުމަށް އޭނާ ވަނީ ގިނަގުނަ މަސައްކަތްތަކެއް ކޮށްފައެވެ. ވަލު ޖަނަވާރުންގެ ނުރައްކަލާއި، ބޯހިޔާވަހިކަމެއް ނެތް ހާލަތުގައި ތިބި އެތައް ސަތޭކަ ކުދިންނެއް އޭނާގެ ބެލުމުގެ ދަށަށް ގެންގޮސް، އެކުދިންނަށް އާ ދިރިއުޅުމެއް ހޯދައިދިނެވެ. ސިންދުތައި ގަބޫލުކުރި ގޮތުގައި ކޮންމެ އިންސާނަކީ ވެސް ކަރާމާތްތެރި ދިރިއުޅުމެއް އުޅުމުގެ ހައްގު ލިބިގެންވާ މީހެކެވެ. އެހެންކަމުން، އޭނާގެ މުޅި ހަކަތަ ހުސްކޮށްލީ މުޖުތަމައުގެ އެންމެ ނިކަމެތި ފަންތީގެ މީހުންގެ އަޑު އިއްވައިދިނުމަށެވެ. އޭނާގެ މި އިޚްލާޞްތެރި މަސައްކަތުގެ ސަބަބުން އެތައް ހާސް ބައެއްގެ ދިރިއުޅުމަށް ހެޔޮ ބަދަލުތަކެއް އައެވެ.
އިންސާނީ ޚިދުމަތުގެ މުއައްސަސާތަކާއި ބައިނަލްއަގުވާމީ ފެންވަރުގައި ލިބުނު ޝަރަފު
ސިންދުތައި ސަޕްކަލްގެ ޚިދުމަތްތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި އޭނާ ވަނީ ގިނަ މުއައްސަސާތަކެއް ބިނާކޮށްފައެވެ. އޭގެ ތެރޭގައި ޕޫނޭގައި ހުންނަ "މަަމަތާ ބާލް ސަދަން" އާއި "ސަންމަތީ ބާލް ނިކޭތަން" ފާހަގަކޮށްލެވެއެވެ. މި މަރުކަޒުތަކަކީ ހަމައެކަނި ބޯހިޔާވަހިކަންދޭ ތަންތަނެއް ނޫނެވެ. އެއީ އޯގާތެރިކަމާއި ލޯތްބާއެކު ކުދިން ބޮޑުކުރާ އާއިލީ މާހައުލުތަކެވެ. އޭނާގެ ބެލުމުގެ ދަށުން 1،500 އަށްވުރެ ގިނަ ޔަތީމު ކުދިން ވަނީ ތަރުބިއްޔަތުވެފައެވެ. މީގެ ތެރެއިން ގިނަ ކުދިންނަކީ މިއަދު މުޖުތަމައުގެ އިސް މަގާމުތަކުގައި ތިބި ޑޮކްޓަރުންނާއި، އިންޖީނޭރުންނާއި، ވަކީލުންނެވެ. އޭނާގެ މި ބޮޑު އާއިލާގައި 382 ދަނބިދަރިންނާއި 49 ޅީދަރިން ހިމެނެއެވެ.
ސިންދުތައިގެ އާދަޔާޚިލާފު ޚިދުމަތްތަކުގެ އަގުވަޒަންކުރުމުގެ ގޮތުން އިންޑިއާ ސަރުކާރާއި ބައިނަލްއަގުވާމީ ޖަމިއްޔާތަކުން 700 އަށްވުރެ ގިނަ އެވޯޑް އޭނާއަށް އަރުވާފައިވެއެވެ. އޭގެ ތެރޭގައި 2021 ވަނަ އަހަރު އިންޑިއާގެ ސަރުކާރުން އެރުވި "ޕަދްމާސްރީ" އެވޯޑާއި، 2017 ވަނަ އަހަރު އިންޑިއާގެ ރައީސް އެރުވި "ނާރީ ޝަކްތީ ޕުރަސްކާރު" ހިމެނެއެވެ. މީގެ އިތުރުން 2013 ވަނަ އަހަރު "މަދަރ ޓެރޭސާ އެވޯޑް ފޯ ސޯޝަލް ޖަސްޓިސް" ވެސް އޭނާއަށް ލިބިފައިވެއެވެ. ސިންދުތައި އަށް ލިބުނު ކޮންމެ ފައިސާގެ އިނާމެއް އޭނާ ހޭދަކުރީ ޔަތީމު ކުދިންނަށް ބޯހިޔާވަހިކަން ހޯދައިދިނުމަށާއި، އާ މަރުކަޒުތައް ބިނާކުރުމަށެވެ. އޭނާގެ ހަށިގަނޑުގައި އެންމެ ފަހު ނޭވާ ހުރި ދުވަހާ ހަމައަށް ވެސް އޭނާ ދެމިހުރީ އެހެން މީހުންނަށްޓަކައި ޚިދުމަތް ކުރުމުގައެވެ.
ސިންދުތައި ސަޕްކަލް މި ދުނިޔެއާ ވަކިވީ 4 ޖެނުއަރީ 2022 ގައި އުމުރުން 73 އަހަރުގައެވެ. އޭނާގެ މަރުގެ ޚަބަރާއެކު މުޅި އިންޑިއާއަށް ބޮޑު ހިތާމައެއް ލިބިގެންދިޔައެވެ. ނަމަވެސް އޭނާ ދޫކޮށްފައިދިޔަ ތަރުބިއްޔަތާއި، އިންސާނީ ލޯތްބާއި، އޯގާތެރިކަމުގެ ބިނާ އަކީ ދުވަހަކުވެސް ފަނޑުވެގެންދާނެ އެއްޗެއް ނޫނެވެ.
ސިންދުތައިގެ ދިރިއުޅުމުގެ މައްޗަށް ބިނާކޮށް "މީ ސިންދުތައި ސަޕްކަލް" ގެ ނަމުގައި ފިލްމެއް ވެސް ވަނީ އުފައްދާފައެވެ. މިއަދު އޭނާ އަޅުގަނޑުމެންނާ ވަކިވެފައިވީ ނަމަވެސް، އޭނާގެ މަސައްކަތްތަކުން އުފެދުނު އެތައް ހާސް "ދަރިންނެއް" އަންނަނީ އޭނާގެ މިޝަން ކުރިއަށް ގެންދަމުންނެވެ. ސިންދުތައި އަކީ އިންސާނިއްޔަތަށްޓަކައި މީހަކަށް ކޮށްދެވިދާނެ އެންމެ މަތިވެރި ޚިދުމަތުގެ ދިހުންގަދަ މިސާލެކެވެ.
ސިންދުތައިގެ ދިރިއުޅުމުން ދަސްކޮށްދެނީ، އަމިއްލަ ނަފްސަށް ދިމާވާ ކޮންމެ ހިތާމައަކީ އެހެން ބަޔަކަށް އުފާވެރިކަން ގެނެސްދިނުމަށް ލިބޭ ފުރުސަތެއް ކަމެވެ.