ފީފާ ވޯލްޑް ކަޕް 2026 ގެ ގްރޫޕް "އީ" ގައި ރޭ ކިއުރަސާއޯ އާއި އިކުއެޑޯރު ބައްދަލުކުރި ފޯރިގަދަ މެޗު 0-0 އިން އެއްވަރުވެ، ކިއުރަސާއޯއިން ވޯލްޑް ކަޕްގެ ތާރީޚުގައި އެ ގައުމުގެ ފުރަތަމަ ޕޮއިންޓް ހޯދައިފިއެވެ.
ކެންސަސް ސިޓީ ސްޓޭޑިއަމްގައި ކުޅުނު މި މެޗުގެ ބަތަލަކީ ކިއުރަސާއޯގެ ތަޖުރިބާކާރު ކީޕަރު އެލޯއީ ރޫމްއެވެ. މުޅި މެޗުގައި އިކުއެޑޯރުން ފޮނުވާލި ނުރައްކާތެރި 15 ހަމަލާއެއް އޭނާ ވަނީ ދިފާއުކޮށްފައެވެ. "ލަ ޓްރައިކަލާ" ނުވަތަ އިކުއެޑޯރުން މެޗުގެ ބޮޑުބައި ކޮންޓްރޯލްކޮށް ގިނަ ފުރުސަތުތަކެއް ތަނަވަސްކުރި ނަމަވެސް، ރޫމްގެ ހުޝިޔާރުކަމުން އެންމެ ބޯޅައެއްވެސް ގޯލުގެ ރޭގަނޑުގެ ތެރެއަށް ވަނަނުދީ ވަނީ ހިފަހައްޓާފައެވެ.
މެޗު ފެށިގެން މޮއިސަސް ކައިސޭޑޯ ތަނަވަސްކޮށްދިން ފުރުސަތަކުން އެނާ ވެލެންސިއާއަށް ލިބުނު ހުސް ފުރުސަތު ރޫމް ވަނީ ހުޝިޔާރުކަމާއެކު ދިފާއުކޮށްފައެވެ. މިއީ މުޅި މެޗުގައިވެސް ފެނިގެންދިޔަ މަންޒަރެވެ. އިކުއެޑޯރުން 30 އާ ގާތްކުރާ އަދަދަކަށް ހަމަލާ އުފެއްދިއިރު، ތިން ފަހަރެއްގެ މަތިން ބޯޅަ ވަނީ ގޯލުގެ ދަނޑީގައި ޖެހިފައެވެ.
ކިއުރަސާއޯގެ ފަރާތުން ބަކޫނާ އަދި ލޮކާޑިއާ އިސްވެ ތިބެ ބައެއް ކައުންޓަރ އެޓޭކްތައް އުފެއްދި ނަމަވެސް، އެންމެ ފަހު ވަގުތާ ހަމައަށްވެސް މެޗުގެ ފޯކަސް ހުރީ އިކުއެޑޯރުގެ ހަމަލާތަކާއި ރޫމްގެ ދިފާއީ ކުޅުމަށެވެ. މެޗުގެ ފަހުކޮޅު ވެލެންސިއާ ފޮނުވާލި ބާރުގަދަ ބޯޅަވެސް ރޫމް ވަނީ ހުއްޓުވާފައެވެ.
މި ނަތީޖާއާއެކު ގްރޫޕް "އީ" އިން ޖަރުމަނުވިލާތް ވަނީ ގްރޫޕްގެ އެއްވަނަ ޓީމުގެ ގޮތުގައި ގަދަ 32 އަށް ދަތުރުކޮށްފައެވެ. އަދި މި ގްރޫޕްގައި ހިމެނޭ އަނެއް ތިން ޓީމަށްވެސް މުބާރާތުގެ ނޮކްއައުޓް ބުރަށް ދިއުމުގެ ފުރުސަތު މިހާރު ވަނީ ފަހިވެފައެވެ. ނަމަވެސް މި މެޗުން ޕޮއިންޓަކުން ފުއްދާލަން ޖެހުމުން، އިކުއެޑޯރު މުބާރާތުން ކެޓުމުގެ ބިރު ވަނީ ބޮޑުވެފައެވެ.
ކިއުރަސާއޯއަށް މިއީ ފީފާ ވޯލްޑް ކަޕްގެ ތާރީޚުގައި ލިބުނު ފުރަތަމަ ޕޮއިންޓަށް ވުމާއެކު، އެ ގައުމުން މި ނަތީޖާ ފާހަގަކުރަނީ ބޮޑު ކާމިޔާބީއެއްގެ ގޮތުގައެވެ.