ސަރުކާރުގެ މައި ދެ އެއަރޕޯޓް ކުންފުނި ކަމަށްވާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި އައްޑޫ އިންޓަރނޭޝަނަލް އެއަރޕޯޓް (އޭއައިއޭ) ގެ ޑިރެކްޓަރުންގެ ބޯޑަށް އާ މެންބަރުންތަކެއް މިއަދު އައްޔަނުކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ހާމަކޮށްފައިވާ ގޮތުގައި، ވެލާނާ އިންޓަރނޭޝަނަލް އެއަރޕޯޓް ހިންގާ އެމްއޭސީއެލްގެ ބޯޑަށް އައްޔަނުކުރެއްވީ ސ. ހުޅުދޫ، ރިވަރސައިޑް އަޙްމަދު ނާޞިފު އެވެ. ނާޞިފު މި މަޤާމަށް އައްޔަނުކުރައްވާފައިވަނީ މިއަދުން ފެށިގެންނެވެ.
މީގެ އިތުރުން، އައްޑޫ ސިޓީގެ ގަން އިންޓަރނޭޝަނަލް އެއަރޕޯޓް ހިންގާ އައްޑޫ އިންޓަރނޭޝަނަލް އެއަރޕޯޓް ޕްރައިވެޓް ލިމިޓެޑްގެ ބޯޑަށް އައްޔަނުކުރެއްވީ ސ. ހިތަދޫ، ވެލްކަމްވިލާ ޝެރީނާ ޞާލިޙް އެވެ. ޝެރީނާ ވެސް އެ މަޤާމުގެ މަސްއޫލިއްޔަތުތަކާ ރަސްމީކޮށް ހަވާލުވެވަޑައިގަތީ މިއަދު ކަމަށް ޕީސީބީން މައުލޫމާތު ދެއެވެ.
މި ދެ ބޭފުޅުންނަކީ ވެސް ކުންފުނިތަކުގެ ހިންގުން ހަރުދަނާކުރުމަށްޓަކައި ޕީސީބީން ކަނޑައަޅާފައިވާ އުސޫލުތަކުގެ ތެރެއިން އައްޔަނުކުރެވުނު ދެ ބޭފުޅުންނެވެ. ސަރުކާރު ހިއްސާވާ ކުންފުނިތަކުގެ ބޯޑުތަކަށް ބަދަލުތައް ގެނައުމަކީ ކުންފުނިތަކުގެ ހިންގުން ހަރުދަނާކުރުމަށްޓަކައި ކުރަމުންދާ މަސައްކަތުގެ ތެރެއިން ކުރިއަށްދާ ކަމެކެވެ.