މާލޭގެ ބޮޑުތަކުރުފާނު މަގު ތަރައްގީކުރުމުގެ ބޮޑު މަޝްރޫއުގެ ދަށުން، އެ މަގުގެ ބައެއްގައި ތާރު އެޅުމުގެ އަމަލީ މަސައްކަތް ފެށުމަށްޓަކައި ކާނިވާ ސަރަހައްދުން ފެށިގެން ހެންވޭރު ފެރީ ޓާމިނަލާ ހަމައަށް އޮތް ސަރަހައްދުގައި ޕާކުކޮށްފައިވާ އުޅަނދުތައް ނެގުމަށް ފުލުހުން އަންގައިފިއެވެ. މި މަސައްކަތް ފެށުމަށް ހަމަޖެހިފައިވަނީ ކުރިއަށް އޮތް ބުދަ ދުވަހުއެވެ.
ފުލުހުންގެ އިދާރާއިން ހާމަކޮށްފައިވާ ގޮތުގައި، ތާރު އެޅުމަށް ތައްޔާރުވުމުގެ ގޮތުން މިރޭ 11:50 އިން ފެށިގެން ކާނިވާ ސަރަހައްދުން ކަނޑައެޅިފައިވާ ވަކި ބައެއް އާންމު ދަތުރުފަތުރަށާއި ޕާކުކުރުމަށް ބަންދުކުރެވޭނެއެވެ. އެހެންކަމުން، މިހާރު އެ ސަރަހައްދުގައި ހުރި އުޅަނދުތައް ވީ އެންމެ އަވަހަކަށް ނެގުމަށް ފުލުހުން ވަނީ އިލްތިމާސްކޮށްފައެވެ. އަދި އެންގުމާ އެއްގޮތަށް ނުނަގާ ހުންނަ އުޅަނދުތައް ފުލުހުންގެ ބެލުމުގެ ދަށަށް ގެންދާނެ ކަމުގެ އިންޒާރުވެސް ވަނީ ދީފައެވެ.
އެމްޓީސީސީން މައުލޫމާތު ދޭ ގޮތުގައި ބޮޑުތަކުރުފާނު މަގުގައި ތާރު އެޅުމުގެ މަސައްކަތް ކުރިއަށް ގެންދާނީ ދެ ފިޔަވައްސަކަށް ބަހާލައިގެންނެވެ. ފުރަތަމަ މަރުހަލާގައި ތާރު އަޅާނީ ހެންވޭރު ޓާމިނަލުން ފެށިގެން ފޮރިން މިނިސްޓްރީއާ ހަމައަށެވެ. އެ ބައި ނިމުމުން މަޝްރޫއުގެ ބާކީ އޮތް ބައިގެ މަސައްކަތްތައް ފެށުމަށް ވަނީ ތާވަލުކުރެވިފައެވެ.
މަގުގެ ބައެއް ބަންދުކުރި ނަމަވެސް، ކާނިވާގެ އެތެރޭގައި ހުންނަ ޕާކިން ޒޯނަށް ވަދެ ނުކުމެ ހެދުމުގެ ފުރުސަތު އޮންނާނެ ކަމަށް އެމްޓީސީސީން ބުނެއެވެ. އެގޮތުން ހެންވޭރު ޓާމިނަލުން ފެށިގެން ކާނިވާ ޕާކިން ޒޯނުގެ ދޮރާ ހަމައަށް މަގު ބަންދުވި ނަމަވެސް، ޒޯނުގެ އެތެރޭގައި އުޅަނދުތައް ބެހެއްޓޭނެއެވެ.
މިދިޔަ މާޗު މަހުގެ 23 ގައި އަމަލީ މަސައްކަތް ފެށި މި މަޝްރޫއަކީ ބޮޑުތަކުރުފާނު މަގުގެ ފަޅުން ބައެއް ހިއްކައިގެން މަގު ފުޅާކުރުމަށް ހިންގާ މަޝްރޫއެކެވެ. އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ ވިދާޅުވި ގޮތުގައި، “އަމާޒަކީ އަންނަ ޖުލައި މަހުގެ 26 ވަނަ ދުވަހުގެ ކުރިން މަސައްކަތް އެއްކޮށް ނިންމައި އާންމުންނަށް މަގު ހުޅުވާލުން” ކަމަށެވެ.
މިހާތަނަށް މި މަޝްރޫއުގެ ދަށުން އަޅަންޖެހޭ ނަރުދަމާ އާއި ފެން ހޮޅިތަކުގެ އިތުރުން ކޭބަލް ޖަންކްޝަންތަކުގެ މަސައްކަތް ވަނީ ނިމިފައެވެ. މިހާރު ކުރިއަށްދަނީ އިއްޒުއްދީން ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް އޮތް ހަތަރު ސެގްމެންޓެއްގެ ތަރައްގީގެ ފަހުގެ މަސައްކަތްތަކެވެ. މި މަސައްކަތުގެ ސަބަބުން އާންމުންނަށް ދިމާވެދާނެ ދަތިތަކަށް ފުލުހުން ވަނީ މާފަށް އެދިފައެވެ.